ਓਟਵਾ, 27 ਅਕਤੂਬਰ (ਪੋਸਟ ਬਿਊਰੋ) : ਕੋਵਿਡ-19 ਮਹਾਂਮਾਰੀ ਨੂੰ ਲਿਬਰਲਾਂ ਵੱਲੋਂ ਜਿਸ ਤਰ੍ਹਾਂ ਹੈਂਡਲ ਕੀਤਾ ਗਿਆ ਹੈ ਉਸ ਸਬੰਧ ਵਿੱਚ ਜਾਂਚ ਕਰਵਾਉਣ ਦੀ ਵਿਰੋਧੀ ਪਾਰਟੀਆਂ ਦੀ ਮੰਗ ਪੂਰੀ ਹੋਣ ਜਾ ਰਹੀ ਹੈ| ਇੱਥੇ ਦੱਸਣਾ ਬਣਦਾ ਹੈ ਕਿ ਚਾਰੇ ਵਿਰੋਧੀ ਪਾਰਟੀਆਂ ਦੇ ਐਮਪੀਜ਼ ਵੱਲੋਂ ਟਰੂਡੋ ਸਰਕਾਰ ਦੀ ਕਰੋਨਾਵਾਇਰਸ ਨਾਲ ਨਜਿੱਠਣ ਲਈ ਕੀਤੀ ਗਈ ਕਾਰਗੁਜ਼ਾਰੀ ਦਾ ਲੇਖਾ ਜੋਖਾ ਹਾਊਸ ਆਫ ਕਾਮਨਜ਼ ਦੀ ਹੈਲਥ ਕਮੇਟੀ ਸਾਹਮਣੇ ਪੇਸ਼ ਕਰਨ ਲਈ ਬਕਾਇਦਾ ਮਤਾ ਪੁਗਾਇਆ ਗਿਆ ਹੈ| ਵਿਰੋਧੀ ਧਿਰਾਂ ਚਾਹੁੰਦੀਆਂ ਹਨ ਕਿ ਕਰੋਨਾਵਾਇਰਸ ਸਬੰਧੀ ਲਿਬਰਲਾਂ ਦੀ ਸਾਰੀ ਕਾਰਗੁਜ਼ਾਰੀ ਦਾ ਰਿਕਾਰਡ ਸੱਭ ਦੇ ਸਾਹਮਣੇ ਆਵੇ|
ਵਿਰੋਧੀ ਧਿਰਾਂ ਇਹ ਵੀ ਜਾਨਣਾ ਚਾਹੁੰਦੀਆਂ ਹਨ ਕਿ ਫੈਡਰਲ ਸਰਕਾਰ ਕੋਵਿਡ-19 ਬਾਰੇ ਰੈਪਿਡ ਟੈਸਟਸ ਦੀ ਖਰੀਦ, ਵੈਕਸੀਨ ਤਿਆਰ ਕਰਨ ਤੇ ਪਰਸਨਲ ਪ੍ਰੋਟੈਕਟਿਵ ਇਕਿਉਪਮੈਂਟ ਉਪਲਬਧ ਕਰਵਾਉਣ ਲਈ ਕੀ ਕਰਦੀ ਰਹੀ ਹੈ| ਇਸ ਤੋਂ ਪਹਿਲਾਂ ਕੰਜ਼ਰਵੇਟਿਵਾਂ ਵੱਲੋਂ ਵੁਈ ਚੈਰਿਟੀ ਤੇ ਕਥਿਤ ਭ੍ਰਿਸ਼ਟਾਚਾਰ ਦੇ ਹੋਰਨਾਂ ਮਾਮਲਿਆਂ ਦੀ ਜਾਂਚ ਸਪੈਸ਼ਲ ਕਮੇਟੀ ਤੋਂ ਕਰਵਾਏ ਜਾਣ ਲਈ ਲਿਆਂਦੇ ਮਤੇ ਉੱਤੇ ਭਰੋਸੇ ਦਾ ਵੋਟ ਹਾਸਲ ਕਰਕੇ ਅਜੇ ਪੰਜ ਦਿਨ ਪਹਿਲਾਂ ਹੀ ਲਿਬਰਲ ਸਰਕਾਰ ਨੇ ਸੁਖ ਦਾ ਸਾਹ ਲਿਆ ਸੀ| ਪਰ ਇਸ ਵਾਰੀ ਕੰਜ਼ਰਵੇਟਿਵਾਂ ਤੋਂ ਇਲਾਵਾ ਬਲਾਕ ਕਿਊਬਿਕੁਆ, ਨਿਊ ਡੈਮੋਕ੍ਰੈਟ ਤੇ ਗ੍ਰੀਨ ਪਾਰਟੀ ਦੇ ਨਾਲ ਨਾਲ ਇੱਕ ਇੰਡੀਪੈਂਡੈਂਟ ਐਮਪੀ ਵੀ ਇਸ ਮਾਮਲੇ ਵਿੱਚ ਇੱਕ ਰਾਇ ਰੱਖਦੇ ਹਨ|
ਸੋਮਵਾਰ ਨੂੰ ਲਿਆਂਦੇ ਗਏ ਇਸ ਮਤੇ ਨਾਲ ਹੁਣ ਵੁਈ ਵਿਵਾਦ ਤੋਂ ਧਿਆਨ ਪਾਸੇ ਹੋ ਕੇ ਸਗੋਂ ਵੱਡੇ ਮਾਮਲਿਆਂ ਉੱਤੇ ਕੇਂਦਰਿਤ ਹੋ ਗਿਆ ਹੈ| ਪਰ ਜਾਂਚ ਦੌਰਾਨ ਅਜੇ ਵੀ ਵੁਈ ਚੈਰਿਟੀ ਨਾਲ ਜੁੜੇ ਦਸਤਾਵੇਜ਼ ਵੀ ਜਾਂਚੇ ਜਾ ਸਕਦੇ ਹਨ| ਕੰਜ਼ਰਵੇਟਿਵ ਆਗੂ ਐਰਿਨ ਓਟੂਲ ਨੇ ਆਖਿਆ ਕਿ ਪਹਿਲਾਂ ਇਨ੍ਹਾਂ ਦਸਤਾਵੇਜ਼ਾਂ ਲਈ 15 ਦਿਨ ਦਾ ਸਮਾਂ ਸੀ ਤੇ ਹੁਣ 35 ਦਿਨ ਦਾ ਸਮਾਂ ਹੈ| ਇਸ ਲਈ ਲਿਬਰਲ ਐਮਪੀਜ਼ ਨੂੰ ਸਾਡੇ ਮਤੇ ਦਾ ਸਮਰਥਨ ਕਰਨ ਵਿੱਚ ਕੋਈ ਦਿੱਕਤ ਨਹੀਂ ਹੋਣੀ ਚਾਹੀਦੀ|
ਦੂਜੇ ਪਾਸੇ ਸਰਕਾਰ ਦੇ ਹਾਊਸ ਲੀਡਰ ਪਾਬਲੋ ਰੌਡਰਿਗਜ਼ ਨੇ ਇਸ ਉੱਤੇ ਸਹਿਮਤੀ ਪ੍ਰਗਟਾਈ ਪਰ ਨਾਲ ਹੀ ਆਖਿਆ ਕਿ ਇਸ ਲਈ ਹਾਮੀ ਭਰਨ ਨਾਲ ਪਹਿਲਾਂ ਤੋਂ ਹੀ ਕੰਮ ਦੇ ਬੋਝ ਥੱਲੇ ਦੱਬੇ ਪਬਲਿਕ ਸਰਵੈਂਟਸ ਲਈ ਨਵਾਂ ਕੰਮ ਖੜ੍ਹਾ ਹੋ ਜਾਵੇਗਾ| ਇਸ ਦੌਰਾਨ ਫਾਈਜ਼ਰ ਕੈਨੇਡਾ ਵਰਗੀ ਕੰਪਨੀ ਨੇ ਹੈਲਥ ਕਮੇਟੀ ਦੀ ਜਾਂਚ ਬਾਰੇ ਆਪਣੀ ਚਿੰਤਾ ਜ਼ਾਹਿਰ ਕਰਦਿਆਂ ਆਖਿਆ ਕਿ ਫਾਰਮਾਸਿਊਟੀਕਲ ਕੰਪਨੀ ਦੇ ਕਮਰਸ਼ੀਅਲ ਸੀਕ੍ਰੇਟਸ ਦੀ ਹਿਫਾਜ਼ਤ ਕਿਸ ਤਰ੍ਹਾਂ ਹੋਵੇਗੀ ਤੇ ਸੰਵੇਦਨਸ਼ੀਲ ਜਾਣਕਾਰੀ ਹੈਲਥ ਕਮੇਟੀ ਸਾਹਮਣੇ ਕਿਸ ਤਰ੍ਹਾਂ ਦਿੱਤੀ ਜਾਵੇਗੀ| ਪਰ ਐਨਡੀਪੀ ਤੇ ਬਲਾਕ ਕਿਊਬਿਕੁਆ ਨੇ ਆਖਿਆ ਕਿ ਇੰਡਸਟਰੀ ਲਈ ਹਿਫਾਜ਼ਤ ਦਾ ਪੂਰਾ ਖਿਆਲ ਰੱਖਿਆ ਜਾਵੇਗਾ| ਦੋਵਾਂ ਪਾਰਟੀਆਂ ਨੇ ਆਖਿਆ ਕਿ ਲਿਬਰਲ ਜਾਣਬੁੱਝ ਕੇ ਡਰ ਵਾਲਾ ਮਾਹੌਲ ਬਣਾ ਰਹੇ ਹਨ|