ਮੇਡਰਿੱਡ, 26 ਅਕਤੂਬਰ (ਪੋਸਟ ਬਿਊਰੋ) : ਐਤਵਾਰ ਨੂੰ ਸਪੇਨ ਨੇ ਦੇਸ਼ ਭਰ ਵਿੱਚ ਦੂਜੀ ਐਮਰਜੰਸੀ ਐਲਾਨ ਦਿੱਤੀ| ਇਸ ਦੇ ਨਾਲ ਹੀ ਦੇਸ਼ ਵਿੱਚ ਤੇਜ਼ੀ ਨਾਲ ਫੈਲ ਰਹੇ ਕਰੋਨਾਵਾਇਰਸ ਦੇ ਮਾਮਲਿਆਂ ਨੂੰ ਰੋਕਣ ਦੇ ਲਿਹਾਜ ਨਾਲ ਰਾਤ ਭਰ ਲਈ ਕਰਫਿਊ ਵੀ ਲਾਇਆ ਗਿਆ| ਇਹ ਜਾਣਕਾਰੀ ਪ੍ਰਧਾਨ ਮੰਤਰੀ ਪੈਡਰੋ ਸਾਂਚੇਜ਼ ਨੇ ਦਿੱਤੀ|
ਸਾਂਚੇਜ਼ ਨੇ ਟੀ ਵੀ ਉੱਤੇ ਦੇਸ਼ ਨੂੰ ਸੰਬੋਧਨ ਕਰਦਿਆਂ ਆਖਿਆ ਕਿ ਇਹ ਨਵੇਂ ਮਾਪਦੰਡ ਐਤਵਾਰ ਰਾਤ ਨੂੰ ਪ੍ਰਭਾਵੀ ਹੋਣਗੇ| ਸਾਂਚੇਜ਼ ਨੇ ਆਖਿਆ ਕਿ ਉਨ੍ਹਾਂ ਦੀ ਸਰਕਾਰ ਵੱਲੋਂ ਕੈਨਰੀ ਆਈਲੈਂਡ ਨੂੰ ਛੱਡ ਕੇ ਦੇਸ਼ ਭਰ ਵਿੱਚ ਰਾਤੀਂ 11:00 ਵਜੇ ਤੋਂ ਸਵੇਰੇ 6:00 ਵਜੇ ਤੱਕ ਸਟੇਟ ਆਫ ਐਮਰਜੰਸੀ ਲਾਗੂ ਰੱਖੀ ਜਾਵੇਗੀ| ਉਨ੍ਹਾਂ ਆਖਿਆ ਕਿ ਦੇਸ਼ ਦੇ 19 ਰੀਜਨਲ ਆਗੂਆਂ ਨੂੰ ਆਪੋ ਆਪਣੇ ਇਲਾਕੇ ਦੀਆਂ ਦਿੱਕਤਾਂ ਦੇ ਹਿਸਾਬ ਨਾਲ ਕਰਫਿਊ ਦੇ ਘੰਟੇ ਤੈਅ ਕਰਨ ਦਾ ਅਧਿਕਾਰ ਹੋਵੇਗਾ| ਇਹ ਨਿਯਮ ਜਿੰਨੇ ਸਖ਼ਤ ਹੋਣਗੇ ਓਨੇ ਹੀ ਚੰਗੇ ਹਨ, ਇਸ ਦੇ ਨਾਲ ਹੀ ਆਵਾਜਾਈ ਲਈ ਸਰਹੱਦੀ ਪਾਬੰਦੀਆਂ ਵੀ ਲਾਈਆਂ ਜਾ ਰਹੀਆਂ ਹਨ ਤੇ ਲੋਕਾਂ ਦੇ ਇੱਕਠ ਨੂੰ ਘਟਾ ਕੇ ਛੇ ਵਿਅਕਤੀ ਕਰ ਦਿੱਤਾ ਗਿਆ ਹੈ|
ਆਪਣੇ ਕੈਬਨਿਟ ਨਾਲ ਮੁਲਾਕਾਤ ਤੋਂ ਬਾਅਦ ਸਾਂਚੇਜ਼ ਨੇ ਆਖਿਆ ਕਿ ਹਕੀਕਤ ਇਹ ਹੈ ਕਿ ਯੂਰਪ ਤੇ ਸਪੇਨ ਨੂੰ ਕੋਵਿਡ-19 ਮਹਾਂਮਾਰੀ ਦੇ ਦੂਜੀ ਵੇਵ ਨਾਲ ਸਿੱਝਣਾ ਪੈ ਰਿਹਾ ਹੈ| ਉਨ੍ਹਾਂ ਆਖਿਆ ਕਿ ਉਹ ਪਾਰਲੀਆਮੈਂਟ ਵਿੱਚ ਐਮਰਜੰਸੀ ਨੂੰ ਹੋਰ ਛੇ ਮਹੀਨੇ, ਭਾਵ ਮਈ ਤੱਕ, ਵਧਾਉਣ ਲਈ ਆਖਣਗੇ| ਜ਼ਿਕਰਯੋਗ ਹੈ ਕਿ ਸ਼ੁੱਕਰਵਾਰ ਨੂੰ ਸਪੇਨ ਵਿੱਚ ਰੋਜ਼ਾਨਾ ਦੇ 20,000 ਨਵੇਂ ਮਾਮਲੇ ਦਰਜ ਕੀਤੇ ਗਏ ਤੇ ਇਸ ਦੇ ਨਾਲ ਹੀ 231 ਮੌਤਾਂ ਵੀ ਰਿਕਾਰਡ ਕੀਤੀਆਂ ਗਈਆਂ| ਇਸ ਦੇ ਨਾਲ ਹੀ ਦੇਸ਼ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ 34,752 ਪਹੁੰਚ ਗਈ ਹੈ|