ਲੰਡਨ, 24 ਅਕਤੂਬਰ (ਪੋਸਟ ਬਿਊਰੋ)- ਸਾਊਥਾਲ ਦੀ ਕਿੰਗ ਸਟਰੀਟ ਉੱਤੇ ਹੋਏ ਗੈਸ ਧਮਾਕੇ ਵਿੱਚ ਅੱਗ ਬੁਝਾਊ ਸਟਾਫ ਦੇ ਇੱਕ ਅਧਿਕਾਰੀ ਵੱਲੋਂ ਛੋਟੀ ਬੱਚੀ ਨੂੰ ਬਹਾਦਰੀ ਨਾਲ ਬਚਾਏ ਜਾਣ ਦੀ ਹਰ ਥਾਂ ਪ੍ਰਸੰਸਾ ਹੋ ਰਹੀ ਹੈ।
ਇਸ ਬੱਚੀ ਦੇ ਪਿਤਾ 39 ਸਾਲਾ ਸੁਖਦੇਵ ਸਿੰਘ ਨੇ 5 ਮਹੀਨੇ ਦੀ ਬੇਟੀ ਮਨਸੀਰਤ ਦੀ ਜਾਨ ਬਚਾਉਣ ਵਾਲੇ ਹੀਰੋ ਅਧਿਕਾਰੀ ਦਾ ਧੰਨਵਾਦ ਕੀਤਾ, ਜਿਸ ਨੇ ਧਮਾਕੇ ਪਿੱਛੋਂ ਉਸਦੀ ਬੱਚੀ ਨੂੰ ਸੁਰੱਖਿਅਤ ਬਾਹਰ ਕੱਢਿਆ। ਸੁਖਦੇਵ ਸਿੰਘ ਨੇ ਕਿਹਾ ਕਿ ਅਸੀਂ ਮਲਬੇ ਵਿੱਚ ਫਸ ਗਏ ਸਾਂ ਅਤੇ ਸੋਚਿਆ ਕਿ ਮਰਨ ਵਾਲੇ ਹਾਂ। ਧਮਾਕੇ ਕਾਰਨ ਹਰ ਪਾਸੇ ਧੂੜ ਸੀ, ਮੈਂ ਆਪਣੀ ਬੱਚੀ ਨੂੰ ਬਾਹਰ ਕੱਢਣਾ ਚਾਹੁੰਦਾ ਸੀ। ਇਸ ਮੌਕੇ ਸੁਰੱਖਿਆ ਅਧਿਕਾਰੀ ਨੇ ਬੱਚੀ ਨੂੰ ਗੋਦੀ ਵਿੱਚ ਲੈ ਲਿਆ ਅਤੇ ਉਸ ਦੀ ਜਾਨ ਬਚਾਈ। ਸੁਖਦੇਵ ਸਿੰਘ ਅਤੇ ਉਸ ਦੀ 30 ਸਾਲਾ ਪਤਨੀ ਨੂੰ ਗੁਰਦੁਆਰਾ ਸਾਹਿਬ ਵਿੱਚ ਰੱਖਿਆ ਗਿਆ ਅਤੇ ਉਸ ਦੇ ਬਾਅਦ ਉਹ ਦੋਸਤਾਂ ਨਾਲ ਰਹਿ ਰਿਹਾ ਹੈ। ਪੁਲਸ ਅਤੇ ਅੱਗ ਬੁਝਾਊ ਅਮਲਾ ਗੈਸ ਅਧਿਕਾਰੀਆਂ ਨਾਲ ਮਿਲ ਕੇ ਘਟਨਾ ਦੀ ਜਾਂਚ ਕਰ ਰਹੇ ਹਨ। ਇਸ ਧਮਾਕੇ ਵਿੱਚ ਦੋ ਲੋਕਾਂ ਦੀ ਮੌਤ ਹੋਈ ਸੀ, ਜਿਨ੍ਹਾਂ ਦੀ ਪਛਾਣ ਪੁਲਸ ਨੇ ਜਨਤਕ ਨਹੀਂ ਕੀਤੀ, ਪਰ ਹਰਭਜਨ ਸਿੰਘ ਨਾਂਅ ਦਾ ਵਿਅਕਤੀ ਧਮਾਕੇ ਤੋਂ ਬਾਅਦ ਲਾਪਤਾ ਹੈ।