ਇਸਲਾਮਾਬਾਦ, 24 ਅਕਤੂਬਰ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਭ੍ਰਿਸ਼ਟਾਚਾਰੀ ਵਿਰੋਧੀ ਬਿਊਰੋ (ਐਨ ਏ ਬੀ) ਨੇ ਸਾਬਕਾ ਪ੍ਰਧਾਨ ਮੰਤਰੀ ਨਵਾਜ਼ ਸ਼ਰੀਫ਼ ਦੇ ਖ਼ਿਲਾਫ਼ ਨਵਾਂ ਕੇਸ ਦਰਜ ਕਰਨ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ।
ਵਰਨਣ ਯੋਗ ਹੈ ਕਿ ਪਾਕਿਸਤਾਨ ਮੁਸਲਿਮ ਲੀਗ (ਨਵਾਜ਼) ਦੇ ਮੁਖੀ ਨਵਾਜ਼ ਸ਼ਰੀਫ (70 ਸਾਲ) ਨੂੰ 2017 ਵਿੱਚ ਸੁਮਰੀਮ ਕੋਰਟ ਨੇ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਵਿੱਚ ਅਯੋਗ ਕਰਾਰ ਦਿੱਤਾ ਸੀ ਅਤੇ ਉਸ ਪਿੱਛੋਂ ਉਨ੍ਹਾਂ ਨੂੰ ਅਹੁਦਾ ਛੱਡਣਾ ਪਿਆ ਸੀ। ਇਸ ਸਮੇਂ ਉਹ ਇਲਾਜ ਲਈ ਲੰਡਨ ਵਿੱਚ ਹਨ। ਐਨ ਏ ਬੀ ਦੇ ਮੁਖੀ ਜਾਵੇਦ ਇਕਬਾਲ ਦੀ ਅਗਵਾਈ ਹੇਠ ਹੋਈ ਕਾਰਜਕਾਰੀ ਬੋਰਡ ਦੀ ਬੈਠਕ (ਈ ਬੀ ਐਮ) ਨੇ ਕੁੱਲ 11 ਕੇਸ ਦਰਜ ਕਰਨ ਦੀ ਮਨਜ਼ੂਰੀ ਦਿੱਤੀ ਹੈ।
ਡਾਨ ਨਿਊਜ਼ ਦੀ ਰਿਪੋਰਟ ਮੁਤਾਬਕ ਐਨ ਏ ਬੀ ਵੱਲੋਂ ਨਵਾਜ਼ ਸ਼ਰੀਫ਼ ਦੇ ਸਾਬਕਾ ਨਿੱਜੀ ਸਕੱਤਰ ਫਵਾਦ ਹੁਸੈਨ ਫਵਾਦ, ਸਾਬਕਾ ਫੈਡਰਲ ਮੰਤਰੀ ਅਹਿਸਨ ਇਕਬਾਲ, ਸਾਬਕਾ ਵਿਦੇਸ਼ ਸਕੱਤਰ ਐਜ਼ਾਜ਼ ਚੌਧਰੀ ਤੇ ਇੰਟੈਲੀਜੈਂਸ ਬਿਊਰੋ ਦੇ ਸਾਬਕਾ ਚੀਫ ਆਫ਼ਤਾਬ ਸੁਲਤਾਨ ਉੱਤੇ ਵੀ ਕੇਸ ਦਰਜ ਕਰਨ ਦੀ ਮਨਜ਼ੂਰੀ ਦੇ ਦਿੱਤੀ ਹੈ। ਐਨ ਏ ਬੀ ਦੇ ਮੁਤਾਬਕ ਸ਼ਰੀਫ਼, ਚੌਧਰੀ, ਸੁਲਤਾਨ ਤੇ ਫਵਾਦ ਉੱਤੇ ਇਹ ਤਾਜ਼ਾ ਕੇਸ ਖਾਸ ਵਿਦੇਸ਼ੀ ਹਸਤੀਆਂ ਦੀ ਸੁਰੱਖਿਆ ਲਈ ਨਾਜਾਇਜ਼ ਤੌਰ ਉੱਤੇ 73 ਉਚ ਸੁਰੱਖਿਆ ਵਾਲੇ ਵਾਹਨ ਖ਼ਰੀਦਣ ਬਾਰੇ ਕੇਸ ਦਰਜ ਕਰਨ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ। ਉਨ੍ਹਾਂ ਉੱਤੇ ਪੱਖਪਾਤ ਤੇ ਵਾਹਨਾਂ ਦੀ ਨਾਜਾਇਜ਼ ਵਰਤੋਂ ਨਾਲ ਕੌਮੀ ਖ਼ਜ਼ਾਨੇ ਨੂੰ 1 ਅਰਬ 95 ਕਰੋੜ ਦਾ ਨੁਕਸਾਨ ਕਰਨ ਦਾ ਦੋਸ਼ ਹੈ।