ਅੰਮ੍ਰਿਤਸਰ, 24 ਅਕਤੂਬਰ (ਪੋਸਟ ਬਿਊਰੋ)- ਇਸ ਮਹਾਨਗਰ ਦੇ ਇਲਾਕੇ ਗਿਲਵਾਲੀ ਗੇਟ ਨੇੜੇ ਇੱਕ ਵਿਅਕਤੀ ਨੇ ਆਪਣੇੇ ਸਾਥੀਆਂ ਨਾਲ ਮਿਲ ਕੇ ਇੱਕ ਚਰਚ ਵਿੱਚ ਜਾ ਕੇ ਪੁਰਾਣੀ ਰੰਜਿਸ਼ ਕਾਰਨ ਕੁਝ ਲੋਕਾਂ ਉੱਤੇ ਸਿੱਧੀਆਂ ਗੋਲੀਆਂ ਚਲਾ ਦਿੱਤੀਆਂ, ਜਿਸ ਕਾਰਨ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਅਤੇ ਇੱਕ ਹੋਰ ਗੰਭੀਰ ਜ਼ਖ਼ਮੀ ਹੋ ਗਿਆ। ਇਸ ਪਿੱਛੋਂ ਹਮਲਾਵਾਰ ਆਪਣੀ ਇਨੋਵਾ ਕਾਰ ਰਾਹੀਂ ਫ਼ਰਾਰ ਹੋ ਗਏ।
ਮ੍ਰਿਤਕ ਦੇ ਪਰਵਾਰਕ ਮੈਂਬਰਾਂ ਨੇ ਦੋਸ਼ ਲਾਇਆ ਕਿ ਪੁਲਸ ਘਟਨਾ ਦੀ ਸੂਚਨਾ ਦਿੱਤੇ ਜਾਣ ਉੱਤੇ ਵੀ ਲੇਟ ਪੁੱਜੀ ਤੇ ਕਾਤਲ ਭੱਜ ਨਿਕਲੇ। ਮ੍ਰਿਤਕ ਦੀ ਪਛਾਣ ਪ੍ਰਿੰਸ ਅਟਵਾਲ (34) ਵਾਸੀ ਗਿਲਵਾਲੀ ਗੇਟ ਗੁਜ਼ਰਪੁਰਾ ਅੰਮ੍ਰਿਤਸਰ ਵਜੋਂ ਅਤੇ ਜ਼ਖ਼ਮੀ ਵਿਅਕਤੀ ਦੀ ਪਛਾਣ ਮਨੋਜ ਕੁਮਾਰ ਵਜੋਂ ਹੋਈ ਹੈ।
ਇਸ ਘਟਨਾ ਬਾਰੇ ਪ੍ਰਾਰਥਨਾ ਸਭਾ ਦੇ ਪਾਸਟਰ ਰਾਜਪਾਲ ਮਸੀਹ ਤੇ ਆਗੂ ਜਸਪਾਲ ਮਸੀਹ ਨੇ ਦੱਸਿਆ ਕਿ ਕੱਲ੍ਹ ਦੁਪਹਿਰ ਵੇਲੇ ਇੱਥੇ ਗੁਜ਼ਰਪੁਰਾ ਗਿਲਵਾਲੀ ਗੇਟ ਦੇ ਈਸਾਈ ਧਰਮ ਦੇ ਚਰਚ ਵਿਖੇ ਪ੍ਰਾਰਥਨਾ ਦੌਰਾਨ ਖ਼ੁਦ ਨੂੰ ਕਾਂਗਰਸੀ ਆਗੂੁ ਦੱਸਣ ਵਾਲਾ ਰਣਦੀਪ ਗਿੱਲ ਤੇ ਉਸ ਦੇ ਭਰਾ ਬਲਰਾਮ ਗਿੱਲ ਹੋਰ ਲੋਕਾਂ ਨਾਲ ਚਰਚ ਵਿੱਚ ਆਏ ਅਤੇ ਉਹ ਚਰਚ ਦੇ ਅੰਦਰ ਬੈਠੇ ਕਿਸੇ ਮਸਲੇ ਬਾਰੇ ਗੱਲਬਾਤ ਕਰ ਰਹੇ ਸਨ। ਉਨ੍ਹਾਂ ਦੱਸਿਆ ਕਿ ਪੁਰਾਣੀ ਰੰਜਿਸ਼ ਕਾਰਨ ਓਥੇ ਆਏ ਲੋਕਾਂ ਨੇ ਇਨ੍ਹਾਂ ਬੈਠੇ ਹੋਏ ਵਿਅਕਤੀਆਂ ਉੱਤੇ ਸਿੱਧੀਆਂ ਗੋਲੀਆਂ ਚਲਾ ਦਿੱਤੀਆਂ, ਜਿਸ ਦੌਰਾਨ ਉਨ੍ਹਾਂ ਨੇ ਭੱਜ ਕੇ ਜਾਨ ਬਚਾਈ ਅਤੇ ਉਨ੍ਹਾਂ ਦਾ ਰਿਸ਼ਤੇਦਾਰ ਪ੍ਰਿੰਸ ਅਟਵਾਲ ਤੇ ਮਨੋਜ ਕੁਮਾਰ ਗੰਭੀਰ ਜ਼ਖ਼ਮੀ ਹੋ ਗਏ ਅਤੇ ਹਸਪਤਾਲ ਪੁੱਜਣ ਉੱਤੇ ਪ੍ਰਿੰਸ ਜ਼ਖ਼ਮਾਂ ਦੀ ਤਾਬ ਨਾਲ ਝੱਲਦਾ ਹੋਇਆ ਦਮ ਤੋੜ ਗਿਆ। ਉਨ੍ਹਾਂ ਦੋਸ਼ ਲਾਇਆ ਕਿ ਹਮਲਾਵਰਾਂ ਵਿੱਚ ਰਣਦੀਪ ਗਿੱਲ ਖੁਦ ਨੂੰ ਕਾਂਗਰਸ ਪਾਟਰੀ ਨਾਲ ਸਬੰਧਿਤ ਆਗੂ ਦੱਸਦਾ ਹੈ ਅਤੇ ਉਸ ਦੀ ਇਨੋਵਾ ਕਾਰ ਉੱਤੇ ਪੰਜਾਬ ਸਰਕਾਰ ਵੀ ਲਿਖਿਆ ਹੋਇਆ ਹੈ ਤੇ ਸ਼ਹਿਰ ਵਿੱਚ ਵੱਡੇ ਆਗੂਆਂ ਨਾਲ ਉਸਦੇ ਹੋਰਡਿੰਗ ਵੀ ਲੱਗੇ ਹੋਏ ਹਨ। ਉਨ੍ਹਾਂ ਦੋਸ਼ ਲਾਇਆ ਕਿ ਪੁਲਸ ਨੂੰ ਇਸ ਦੀ ਸੂਚਨਾ ਦਿੱਤੇ ਜਾਣ ਉੱਤੇ ਵੀ ਪੁਲਸ ਲੇਟ ਪੁੱਜੀ ਅਤੇ ਹਮਲਾਵਾਰ ਆਪਣੀ ਆਪਣੀ ਇਨੋਵਾ ਕਾਰ ਉੱਤੇ ਆਸਾਨੀ ਨਾਲ ਫਰਾਰ ਹੋ ਗਏ। ਦੂਜੇ ਪਾਸੇ ਡੀ ਸੀ ਪੀ ਜਗਮੋਹਨ ਸਿੰਘ ਦੱਸਿਆ ਕਿ ਥਾਣਾ ਸੀ। ਡਵੀਜ਼ਨ ਵਿਖੇ ਕਤਲ ਤੇ ਇਰਾਦਾ ਕਤਲ ਦੇ ਦੋਸ਼ਾਂ ਹੇਠ ਰਣਦੀਪ ਗਿੱਲ, ਬਲਰਾਮ ਗਿੱਲ, ਸੂਰਜ ਤੇ ਹੋਰਾਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ।