ਜਲੰਧਰ, 23 ਅਕਤੂਬਰ (ਪੋਸਟ ਬਿਊਰੋ)- ਕੈਨੇਡਾ ਵਿੱਚ ਇੱਕ ਰਿਸ਼ਤੇਦਾਰ ਦੇ ਘਰ ਕੰਮ ਦਿਵਾਉਣ ਦੇ ਬਹਾਨੇੇ ਟਰੈਵਲ ਏਜੰਟ ਨੇ 2 ਸੱਕੇ ਭਰਾਵਾਂ ਤੋਂ ਦੋ ਲੱਖ ਰੁਪਏ ਠੱਗ ਲਏ। ਪੀੜਤਾਂ ਨੇ ਸ਼ਿਕਾਇਤ ਦਿੱਤੀ ਤਾਂ ਜਾਂਚ ਆਰਥਿਕ ਅਪਰਾਧ ਸੈਲ ਨੇ ਕੀਤੀ ਅਤੇ ਟਰੈਵਲ ਏਜੰਟ ਦੇ ਖਿਲਾਫ ਧੋਖਾਧੜੀ ਦਾ ਕੇਸ ਦਰਜ ਕਰ ਲਿਆ ਹੈ।
ਪੁਲਸ ਦੀ ਜਾਂਚ ਰਿਪੋਰਟ ਮੁਤਾਬਕ ਲੋਹੀਆਂ ਖਾਸ ਦੇ ਵਾਰਡ ਨੰਬਰ 6 ਦਾ ਵਾਸੀ ਸ਼ਿਕਾਇਤ ਕਰਤਾ ਬਲਵਿੰਦਰ ਸਿੰਘ ਮਿਸਤਰੀ ਦਾ ਕੰਮ ਕਰਦਾ ਹੈ। ਜਨਵਰੀ 2019 ਵਿੱਚ ਉਹ ਸੁਲਤਾਨਪੁਰ ਲੋਧੀ ਵਿੱਚ ਬ੍ਰਿਜ ਮੋਹਨ ਨਾਂਅ ਦੇ ਇੱਕ ਵਿਅਕਤੀ ਦੇ ਘਰ ਕੰਮ ਕਰ ਰਿਹਾ ਸੀ। ਬ੍ਰਿਜ ਮੋਹਨ ਦੀ ਨਕੋਦਰ ਵਿੱਚ ਟਰੈਕਟਰ ਵਰਕਸ਼ਾਪ ਹੈ। ਉਸ ਨੇ ਉਸ ਨੂੰ ਕਿਹਾ ਕਿ ਸ਼ਾਹਕੋਟ ਦੇ ਪਿੰਡ ਸੋਹਲ ਜਗੀਰ ਦਾ ਨਿਰਮਲ ਸਿੰਘ ਟ੍ਰੈਵਲ ਏਜੰਟ ਹੈ। ਨਿਰਮਲ ਸਿੰਘ ਨੇ ਬ੍ਰਿਜ ਮੋਹਨ ਨੂੰ ਕਿਹਾ ਕਿ ਕੈਨੇਡਾ ਵਿੱਚ ਉਸ ਦੇ ਰਿਸ਼ਤੇਦਾਰ ਹਨ,ਉਨ੍ਹਾਂ ਨੂੰ ਕੈਨੇਡਾ ਵਿੱਚ ਕੰਮ ਲਈ ਆਦਮੀ ਚਾਹੀਦੈ, ਜੇ ਕੋਈ ਹੋਵੇ ਤਾਂ ਦੱਸਣਾ। ਬ੍ਰਿਜ ਮੋਹਨ ਨੇ ਇਸ ਬਾਰੇ ਬਲਵਿੰਦਰ ਨੂੰ ਦੱਸਿਆ। ਬਲਵਿੰਦਰ ਨੇ ਘਰ ਸਲਾਹ ਕਰ ਕੇ ਬ੍ਰਿਜ ਮੋਹਨ ਨੂੰ ਦੱਸਿਆ। ਬ੍ਰਿਜ ਮੋਹਨ ਨੇ ਨਿਰਮਲ ਨੂੰ ਦੁਕਾਨ ਵਿੱਚ ਬੁਲਾਇਆ ਤਾਂ ਨਿਰਮਲ ਨੇ ਬਲਵਿੰਦਰ ਨੂੰ ਕਿਹਾ ਕਿ 45 ਦਿਨ ਵਿੱਚ ਉਹ ਉਸ ਨੂੰ ਕੈਨੇਡਾ ਭਿਜਵਾ ਦੇਵੇਗਾ ਅਤੇ ਪ੍ਰਤੀ ਵਿਅਕਤੀ 16 ਲੱਖ ਲੱਗਣਗੇ। ਬਲਵਿੰਦਰ ਸਿੰਘ ਤੇ ਉਸ ਦੇ ਭਰਾ ਪਿਆਰਾ ਸਿੰਘ ਨੂੰ ਕੈਨੇਡਾ ਭੇਜਣ ਲਈ 32 ਲੱਖ ਵਿੱਚ ਸੌਦਾ ਹੋ ਗਿਆ। 12-12 ਲੱਖ ਰੁਪਏ ਪਹਿਲਾਂ ਦਿੱਤੇ ਜਾਣੇ ਸਨ। ਨਿਰਮਲ ਨੇ ਦੋਵਾਂ ਦੀ ਪਾਸਪੋਰਟ ਦੀ ਕਾਪੀ ਲੈ ਕੇ 1 ਲੱਖ ਰੁਪਏ ਮੰਗੇ। ਇਸ ਦੇ ਬਾਅਦ ਸੁਲਤਾਨਪੁਰ ਲੋਧੀ ਕਚਹਿਰੀ ਵਿੱਚ ਨਿਰਮਲ ਸਿੰਘ ਨੇ ਪੂਰੇ ਸੌਦੇ ਬਾਰੇ ਹਲਫੀਆ ਬਿਆਨ ਦਿੱਤਾ ਅਤੇ ਦੋ ਖਾਲੀ ਚੈਕ ਸਾਈਨ ਕਰ ਕੇ ਉਨ੍ਹਾਂਨੂੰ ਦੇ ਦਿੱਤੇ। ਕੁਝ ਦਿਨ ਬਾਅਦ ਨਿਰਮਲ ਨੇ ਦੋਵਾਂ ਦਾ ਲੁਧਿਆਣਾ ਤੋਂ ਮੈਡੀਕਲ ਕਰਵਾਇਆ ਅਤੇ ਫਿਰ ਇੱਕ ਲੱਖ ਰੁਪਏ ਲੈ ਕੇ ਭਰੋਸਾ ਦਿੱਤਾ ਕਿ ਉਨ੍ਹਾਂ ਦਾ ਵੀਜ਼ਾ ਲੱਗ ਜਾਏਗਾ। ਇਸ ਪਿੱਛੋਂ ਨਾ ਕੈਨੇਡਾ ਭੇਜਿਆ ਅਤੇ ਨਾ ਪੈਸੇ ਮੋੜੇ। ਜਦ ਉਨ੍ਹਾਂ ਨੇ ਨਿਰਮਲ ਦੇ ਦਿਤੇ ਚੈਕ ਬੈਂਕ ਵਿੱਚ ਲਗਾਏ ਤਾਂ ਉਹ ਬਾਊਂਸ ਹੋ ਗਏ, ਜਿਸ ਤੋਂ ਜ਼ਾਹਿਰ ਹੈ ਕਿ ਟ੍ਰੈਵਲ ਏਜੰਟ ਨੇ ਉਸ ਨਾਲ ਠੱਗੀ ਕੀਤੀ ਹੈ।