ਮਲੋਟ, 23 ਅਕਤੂਬਰ (ਪੋਸਟ ਬਿਊਰੋ)- ਮਲੋਟ ਤੋਂ ਮੁਕਤਸਰ ਸਾਹਿਬ ਸੜਕ `ਤੇ ਪਿੰਡ ਔਲਖ ਵਿਖੇ ਬਾਅਦ ਦੁਪਹਿਰ ਮੁਕਤਸਰ ਸਾਹਿਬ ਦੀ ਬਰਕੰਦੀ ਰੋਡ ਦੇ ਵਾਸੀ ਨੌਜਵਾਨ ਦੀ ਕੁਝ ਅਣਪਛਾਤੇ ਹਮਲਾਵਰਾਂ ਵੱਲੋਂ ਅੰਨ੍ਹੇਵਾਹ ਗੋਲੀਆਂ ਚਲਾ ਕੇ ਹੱਤਿਆ ਕਰ ਦਿੱਤੀ, ਜਿਸ ਬਾਰੇ ਪੁਲਸ ਜਾਂਚ ਕਰ ਰਹੀ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਮੁਕਤਸਰ ਸਾਹਿਬ ਦਾ ਵਸਨੀਕ ਰਣਜੀਤ ਸਿੰਘ ਰਾਣਾ ਆਪਣੀ ਗਰਭਵਤੀ ਪਤਨੀ ਨਾਲ ਪਿੰਡ ਔਲਖ ਵਿਖੇ ਡਾਕਟਰੀ ਜਾਂਚ ਕਰਾਉਣ ਆਇਆ ਸੀ। ਜਦੋਂ ਕਾਰ ਆ ਕੇ ਸੜਕ `ਤੇ ਰੁਕੀ ਤਾਂ ਉਸੇ ਵੇਲੇ ਉਥੇ ਖੜੇ ਨੌਜਵਾਨਾਂ ਨੇ ਅੰਨ੍ਹੇਵਾਹ ਗੋਲੀਆਂ ਚਲਾ ਕੇ ਰਣਜੀਤ ਸਿੰਘ ਰਾਣਾ ਦੀ ਹੱਤਿਆ ਕਰ ਦਿੱਤੀ। ਵਾਰਦਾਤ ਸਮੇਂ ਮ੍ਰਿਤਕ ਦੀ ਪਤਨੀ ਹਸਪਤਾਲ ਅੰਦਰ ਦਾਖ਼ਲ ਹੋ ਚੁੱਕੀ ਸੀ। ਪਤਾ ਲੱਗਾ ਹੈ ਕਿ ਰਾਣਾ ਨੂੰ 15 ਗੋਲੀਆਂ ਮਾਰੀਆਂ ਗਈਆਂ, ਜਿਸ ਕਰਕੇ ਉਸ ਦੀ ਮੌਕੇ ਉਤੇ ਮੌਤ ਹੋ ਗਈ। ਮ੍ਰਿਤਕ ਦੇ ਕੋਲੋਂ ਵੀ ਇੱਕ ਪਿਸਤੌਲ ਮਿਲਿਆ ਹੈ, ਜਿਸ ਦਾ ਉਸ ਨੂੰ ਚਲਾਉਣ ਦਾ ਮੌਕਾ ਨਹੀਂ ਮਿਲ ਸਕਿਆ ਅਤੇ ਹਮਲਾਵਰ ਉਸ ਨੂੰ ਮਾਰ ਕੇ ਫਰਾਰ ਹੋ ਗਏ।
ਹਸਪਤਾਲ ਦੇ ਡਾ. ਗੌਰਵ ਅਸੀਜਾ ਅਨੁਸਾਰ ਮ੍ਰਿਤਕ ਦੀ ਪਤਨੀ ਚਾਰ ਮਹੀਨੇ ਦੀ ਗਰਭਵਤੀ ਹੈ ਤੇ ਕੱਲ੍ਹ ਤੀਜੀ ਵਾਰ ਉਹ ਜਾਂਚ ਲਈ ਆਏ ਸਨ ਕਿ ਇਹ ਘਟਨਾ ਵਾਪਰ ਗਈ। ਇਸ ਦੀ ਸੂਚਨਾ ਮਿਲਣ `ਤੇ ਂਐਸ ਪੀ ਰਾਜਪਾਲ ਸਿੰਘ ਹੁੰਦਲ ਮੌਕੇ ਉਤੇ ਪੁੱਜੇ ਅਤੇ ਸੀ ਸੀ ਟੀ ਵੀ ਰਾਹੀਂ ਕੇਸ ਦੀ ਜਾਂਚ ਕੀਤੀ। ਦੱਸਿਆ ਗਿਆ ਹੈ ਕਿ ਰਣਜੀਤ ਸਿੰਘ ਰਾਣਾ ਉੱਤੇ ਵੀ ਸ਼ਰਾਬ ਵੇਚਣ, ਲੜਾਈਆਂ ਕਰਨ ਤੋਂ ਇਲਾਵਾ ਨਸ਼ੀਲੀਆਂ ਗੋਲੀਆਂ ਦਾ ਇੱਕ ਕੇਸ ਦਰਜ ਹੋਇਆ ਸੀ, ਜਿਸ ਵਿੱਚ ਉਹ ਕਰੀਬ ਪੌਣੇ ਦੋ ਸਾਲ ਜੇਲ੍ਹ ਵਿੱਚ ਰਹਿ ਕੇ ਆਇਆ ਸੀ। ਮ੍ਰਿਤਕ ਦੀ ਮਾਂ ਮਨਜੀਤ ਕੌਰ ਦਾ ਕਹਿਣਾ ਹੈ ਕਿ ਪੁਲਸ ਨੇ ਪਹਿਲਾਂ ਝੂਠਾ ਕੇਸ ਪਾਇਆ ਸੀ, ਜਿਸ ਤੋਂ ਉਹ ਬਰੀ ਹੋ ਗਿਆ ਸੀ। ਪੱਤਰਕਾਰਾਂ ਨੂੰ ਮਨਜੀਤ ਕੌਰ ਨੇ ਦੱਸਿਆ ਕਿ ਉਸ ਦਾ ਇੱਕ ਪੁੱਤਰ ਜਿੰਮੀ, ਜੋ ਕਬੱਡੀ ਖਿਡਾਰੀ ਸੀ ਸਵਾ ਚਾਰ ਸਾਲ ਪਹਿਲਾਂ ਦਬੜੀਖਾਨੇ ਕੋਲ ਗੈਂਗਸਟਰ ਦਵਿੰਦਰ ਬੰਬੀਹਾ ਦੇ ਭੁਲੇਖੇ ਮਾਰਿਆ ਗਿਆ ਸੀ। ਉਸ ਦਾ ਕਹਿਣਾ ਸੀ ਰਾਣੇ ਨੂੰ ਡਰ ਸੀ ਕਿ ਉਸ ਦਾ ਕਤਲ ਹੋ ਜਾਵੇਗਾ, ਇਸ ਕਰਕੇ ਉਸ ਨੇ ਹਾਈਕੋਰਟ ਤੋਂ ਸੁਰੱਖਿਆ ਦੀ ਮੰਗ ਕੀਤੀ ਸੀ, ਪਰ ਅਜੇ ਉਸ ਨੂੰ ਸੁਰੱਖਿਆ ਨਹੀਂ ਸੀ ਮਿਲੀ।