ਨਵੀਂ ਦਿੱਲੀ, 23 ਅਕਤੂਬਰ (ਪੋਸਟ ਬਿਊਰੋ)- ਲਾਕਡਾਊਨ ਤੋਂ ਬਾਅਦ ਭਾਰਤ ਵਿੱਚ ਸਮਾਰਟ ਫੋਨ ਬਾਜ਼ਾਰ ਵਿੱਚ ਮੁੜ ਸੁਧਾਰ ਦਿਖਾਈ ਦੇ ਰਿਹਾ ਹੈ। ਸਾਲ 2020 ਦੀ ਤੀਜੀ ਤਿਮਾਹੀ (ਜੁਲਾਈ-ਸਤੰਬਰ) ਵਿੱਚ ਇਨ੍ਹਾਂ ਦੀ ਵਿਕਰੀ ਅੱਜ ਤੱਕ ਦੇ ਸਭ ਤੋਂ ਉਚੇ ਪੱਧਰ ਯਾਨੀ ਪੰਜ ਕਰੋੜ `ਤੇ ਪੁੱਜ ਗਈ ਹੈ।
ਇਸ ਦੌਰਾਨ ਬਾਜ਼ਾਰ `ਚ ਸਾਰੀਆਂ ਚੀਨੀ ਕੰਪਨੀਆਂ ਦੀ ਕੁਲ 76 ਫੀਸਦੀ ਹਿੱਸੇਦਾਰੀ ਰਹੀ। ਬਾਜ਼ਾਰ ਦੇ ਅੰਕੜੇ ਲੈਣ ਵਾਲੀ ਕੰਪਨੀ ਕੈਨਾਲਿਸ ਦੀ ਰਿਪੋਰਟ ਮੁਤਾਬਕ ਚੋਟੀ ਦੀਆਂ ਪੰਜ ਮੋਬਾਈਲ ਫੋਨ ਕੰਪਨੀਆਂ ਸ਼ਿਓਮੀ, ਸੈਮਸੰਗ, ਵੀਵੋ, ਰਿਅਲਮੀ ਅਤੇ ਓਪੋ ਦੀ ਵਿਕਰੀ ਵਿੱਚ ਪਿਛਲੇ ਸਾਲ ਦੀ ਇਸੇ ਮਿਆਦ ਦੀ ਤੁਲਨਾ `ਚ ਵਾਧਾ ਦਰਜ ਕੀਤਾ ਗਿਆ ਹੈ। ਕੈਨਾਲਿਸ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ 2020 ਦੀ ਤੀਜੀ ਤਿਮਾਹੀ `ਚ ਦੇਸ਼ `ਚ ਸਮਾਰਟ ਫੋਨ ਦੀ ਵਿਕਰੀ 8 ਫੀਸਦੀ ਵਧ ਕੇ ਪੰਜ ਕਰੋੜ ਤਕ ਪੁੱਜ ਗਈ। ਪਿਛਲੇ ਸਾਲ ਇਸੇ ਤਿਮਾਹੀ ਵਿੱਚ ਇਹ 4.62 ਕਰੋੜ ਸੀ। ਇਹ ਦੇਸ਼ `ਚ ਕਿਸੇ ਇੱਕ ਤਿਮਾਹੀ ਵਿੱਚ ਸਮਾਰਟ ਫੋਨ ਦੀ ਵਿਕਰੀ ਦਾ ਸਭ ਤੋਂ ਉਚਾ ਪੱਧਰ ਹੈ। ਸ਼ਿਓਮੀ 26.1 ਫੀਸਦੀ ਦੇ ਨਾਲ ਬਾਜ਼ਾਰ ਹਿੱਸੇਦਾਰੀ ਵਿੱਚ ਚੋਟੀ `ਤੇ ਰਹੀ। ਕੰਪਨੀ ਨੇ 1.31 ਕਰੋੜ ਫੋਨ ਵੇਚੇ। ਸੈਮਸੰਗ ਨੇ ਵੀਵੋ ਨੂੰ ਪਛਾੜਦੇ ਹੋਏ ਦੂਜਾ ਸਥਾਨ ਹਾਸਲ ਕੀਤਾ। ਕੰਪਨੀ ਨੇ 1.02 ਕਰੋੜ ਫੋਨ ਦੀ ਵਿਕਰੀ ਦੇ ਨਾਲ 20.4 ਫੀਸਦੀ ਬਾਜ਼ਾਰ ਹਿੱਸੇਦਾਰੀ ਹਾਸਲ ਕੀਤੀ। ਇਸ ਤੋਂ ਬਾਅਦ ਵੀਵੋ ਦੀ 88 ਲੱਖ ਫੋਨ ਦੀ ਵਿਕਰੀ ਦੇ ਨਾਲ 17.6 ਫੀਸਦੀ, ਰੀਅਲਮੀ ਦੀ 87 ਲੱਖ ਦੇ ਨਾਲ 17.4 ਫੀਸਦੀ ਅਤੇ ਓਪੋ ਦੀ 61 ਲੱਖ ਸਮਾਰਟ ਫੋਨ ਦੀ ਵਿਕਰੀ ਦੇ ਨਾਲ 12.1 ਫੀਸਦੀ ਹਿੱਸੇਦਾਰੀ ਰਹੀ।