ਪਾਲਮ ਪੁਰ, 22 ਅਕਤੂਬਰ (ਪੋਸਟ ਬਿਊਰੋ)- ਹਿਮਾਚਲ ਦੇ ਸਾਬਕਾ ਮੁਖ ਮੰਤਰੀ ਸ਼ਾਂਤਾ ਕੁਮਾਰ ਨੇ ਕਿਹਾ ਕਿ ਵਿਵੇਕਾ ਨੰਦ ਟ੍ਰਸਟ ਬਾਰੇ ਹਾਈ ਕੋਰਟ ਵਿੱਚ ਕੀਤਾ ਗਿਆ ਕੇਸ ਕਿਸੇ ਦੂਸਰੀ ਪਾਰਟੀ ਦੇ ਲੋਕਾਂ ਨੇ ਨਹੀਂ,ਸਗੋਂਉਨ੍ਹਾਂ ਦੀ ਆਪਣੀ ਪਾਰਟੀ ਦੇ ਨੇਤਾਵਾਂ ਦੇ ਇਸ਼ਾਰੇ `ਤੇ ਕੀਤਾ ਗਿਆ ਸੀ।
ਪਾਲਮਪੁਰ ਵਿੱਚ ਪੱਤਰਕਾਰਾਂ ਨੂੰ ਸੰਬੋਧਨ ਕਰਦੇ ਹੋਏ ਸ਼ਾਂਤਾ ਕੁਮਾਰ ਨੇ ਕਿਹਾ ਕਿ ਅਦਾਲਤ ਨੇ ਆਪਣੇ ਫੈਸਲੇ ਵਿੱਚ ਨਾ ਕੇਵਲ ਸਿ਼ਕਾਇਤ ਕਰਤਾ ਨੂੰ ਸਖਤ ਸਜ਼ਾ ਦਿਤੀ ਹੈ,ਸਗੋਂ ਟ੍ਰਸਟ ਅਤੇ ਉਨ੍ਹਾਂ ਦੇ ਪੱਖ ਵਿੱਚ ਇਤਿਹਾਸਕ ਫੈਸਲਾ ਲਿਆ ਹੈ। ਉਨ੍ਹਾਂ ਕਿਹਾ ਕਿ ਅਦਾਲਤ ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਸਿ਼ਕਾਇਤ ਕਰਤਾ ਕਿਸੇ ਹੋਰ ਦੇ ਇਸ਼ਾਰੇ ਉਤੇ ਅਜਿਹਾ ਕਰ ਰਿਹਾ ਸੀ। ਸ਼ਾਂਤਾ ਕੁਮਾਰ ਦੇ ਕਹਿਣ ਮੁਤਾਬਕ ਇਸ ਮਾਮਲੇ ਵਿੱਚ ਕਾਂਗਰਸ ਦੇ ਲੋਕਾਂ ਨੇ ਉਨ੍ਹਾਂ ਵਿਰੁੱਧ ਕੁੱਝ ਨਹੀਂ ਕੀਤਾ, ਉਨ੍ਹਾਂ ਦੀ ਆਪਣੀ ਪਾਰਟੀ ਦੇ ਕੁਝ ਲੋਕ ਹੀ ਨੀਵਾਂ ਦਿਖਾਉਣਾ ਚਾਹੁੰਦੇ ਸੀ ਜਾਂ ਪਾਰਟੀ ਦੀ ਕਿਸੇ ਗੱਲ ਦਾ ਬਦਲਾ ਲੈਣ ਚਾਹੁੰਦੇ ਸੀ। ਉਨ੍ਹਾਂ ਕਿਹਾ ਕਿ ਵਿਵੇਕਾਨੰਦ ਟ੍ਰਸਟ ਦੇ ਕਾਰਜ ਲਈ ਮੇਰੀ ਪਾਰਟੀ ਦੇ ਲੋਕਾਂ ਨੇ ਮੈਨੂੰ ਅਦਾਲਤ ਵਿੱਚ ਖੜਾ ਕੀਤਾ। ਅਰਜ਼ੀ ਦੇ ਪਿਛੇ ਨਾਮ ਕਿਸੇ ਦਾ, ਕੰਮ ਕੁਝ ਹੋਰਨਾਂ ਦਾ ਅਤੇ ਉਦੇਸ਼ ਕੁਝ ਹੋਰਨਾਂ ਦਾ ਹੈ। ਹਾਈ ਕੋਰਟ ਵਿੱਚ ਵਿਵੇਕਾ ਨੰਦ ਟ੍ਰਸਟ ਅਤੇ ਸ਼ਾਂਤਾ ਕੁਮਾਰ `ਤੇ ਚੱਲਦੇ ਕੇਸ ਦਾ ਫੈਸਲਾ ਕੁਝ ਦਿਨ ਪਹਿਲਾਂ ਆਇਆ ਹੈ। ਸ਼ਾਂਤਾ ਕੁਮਾਰ ਨੇ ਕਿਹਾ ਕਿ 8 ਸਾਲਾਂ ਦੇ ਇਸ ਦੌਰ ਵਿੱਚ ਉਨ੍ਹਾਂ ਨੂੰ ਨਾ ਸਿਰਫ ਪਰੇਸ਼ਾਨੀ ਹੀ ਹੋਈ,ਸਗੋਂ ਟ੍ਰਸਟ ਦਾ ਕੀਮਤੀ ਪੈਸਾ ਵੀ ਖਰਾਬ ਹੋਇਆ, ਅਜਿਹਾ ਲੱਗਦਾ ਹੈ ਜਿਵੇਂ ਹਵਨ ਕਰਦੇ ਹੋਏ ਉਨ੍ਹਾਂ ਦੀ ਉਂਗਲੀਆਂ ਸੜ੍ਹ ਰਹੀਆਂ ਹੋਣ।