ਮੁੰਬਈ, 22 ਅਕਤੂਬਰ (ਪੋਸਟ ਬਿਊਰੋ)- ਭਾਰਤੀ ਸਟੇਟ ਬੈਂਕ (ਐਸ ਬੀ ਆਈ) ਨੇ ਗਾਹਕਾਂ ਨੂੰ ਰਿਹਾਇਸ਼ੀ ਕਰਜ਼ੇ (ਹੋਮ ਲੋਨ) ਉਤੇ ਵਿਆਜ਼ ਦਰਾਂ `ਚ 0.25 ਫੀਸਦੀ ਦੀ ਛੋਟ ਦੇਣ ਦਾ ਐਲਾਨ ਕੀਤਾ ਹੈ।
ਇਸ ਸੰਬੰਧ ਵਿੱਚ ਭਾਰਤ ਦੇ ਸਭ ਤੋਂ ਵੱਡੇ ਬੈਂਕ ਐਸ ਬੀ ਆਈ ਵੱਲੋਂ ਗਾਹਕਾਂ ਨੂੰ ਉਨ੍ਹਾਂ ਦੇ ਸਿਬਿਲ ਸਕੋਰ ਦੇ ਹਿਸਾਬ ਨਾਲ ‘ਯੋਨੋ` ਰਾਹੀਂ ਅਰਜ਼ੀ ਦਾਖਲ ਕਰਨ ਉੱਤੇ 75 ਲੱਖ ਰੁਪਏ ਤੋਂ ਵੱਧ ਦੇ ਰਿਹਾਇਸ਼ੀ ਕਰਜ਼ੇ ਉਤੇ ਵਿਆਜ਼ `ਚ 0.25 ਫੀਸਦੀ ਦੀ ਛੋਟ ਦਿੱਤੀ ਜਾਏਗੀ।ਯੋਨੋ ਇਸ ਬੈਂਕ ਦਾ ਡਿਜੀਟਲ ਕਰਜ਼ਾ ਪਲੇਟਫਾਰਮ ਹੈ। ਐਸ ਬੀ ਆਈ ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਆਪਣੀ ਤਿਓਹਾਰੀ ਪੇਸ਼ਕਸ਼ ਵਜੋਂ ਉਹ ਗਾਹਕਾਂ ਨੂੰ 30 ਲੱਖ ਤੋਂ ਵੱਧ ਦੇ ਅਤੇ 2 ਕਰੋੜ ਰੁਪਏ ਤੱਕ ਦੇ ਰਿਹਾਇਸ਼ੀ ਕਰਜ਼ੇ ਉਤੇ ਕ੍ਰੈਡਿਟ ਸਕੋਰ ਦੇ ਆਧਾਰ `ਤੇ ਵਿਆਜ਼ ਦਰ ਵਿੱਚ 0.20 ਫੀਸਦੀ ਦੀ ਛੋਟ ਦੇਵੇਗਾ। ਪਹਿਲਾਂ ਬੈਂਕ ਨੇ 0.10 ਫੀਸਦੀ ਦੀ ਛੋਟ ਦੇਣ ਦਾ ਐਲਾਨ ਕੀਤਾ ਸੀ। ਇਹ ਯੋਜਨਾ ਦੇਸ਼ ਭਰ ਲਈ ਹੋਵੇਗੀ। ਇਹੀ ਛੋਟ ਅੱਠ ਮਹਾਂ ਨਗਰਾਂ `ਚ ਤਿੰਨ ਕਰੋੜ ਰੁਪਏ ਤੱਕ ਦੇ ਰਿਹਾਇਸ਼ੀ ਕਰਜ਼ੇ `ਤੇ ਦਿੱਤੀ ਜਾਏਗੀ। ਜੇ ਗਾਹਕ ਯੋਨੋ ਮੰਚ ਲਈ ਅਰਜ਼ੀ ਦਾਖਲ ਕਰਦੇ ਹਨ ਤਾਂ 0.05 ਫੀਸਦੀ ਦੀ ਵੀ ਵਾਧੂ ਛੋਟ ਦਿੱਤੀ ਜਾਏਗੀ।
ਬੈਂਕ ਹਾਲੇ 30 ਲੱਖ ਰੁਪਏ ਤੱਕ ਦਾ ਰਿਹਾਇਸ਼ੀ ਕਰਜ਼ਾ 6.90 ਫੀਸਦੀ ਹੀ ਹੇਠਲੀ ਵਿਆਜ਼ ਦਰ ਉਤੇ ਦੇ ਰਿਹਾ ਹੈ। 30 ਲੱਖ ਰੁਪਏ ਤੋਂ ਵੱਧ ਦੇ ਰਿਹਾਇਸ਼ੀ ਕਰਜ਼ੇ `ਤੇ ਵਿਆਜ਼ ਦਰ ਸੱਤ ਫੀਸਦੀ ਹੈ। ਐਸ ਬੀ ਆਈ ਦੇ ਮੈਨੇਜਿੰਗ ਡਾਇਰੈਕਟਰ (ਰਿਟੇਲ ਅਤੇ ਡਿਜੀਟਲ ਬੈਕਿੰਗ) ਸੀ ਐਸ ਸ਼ੈਟੀ ਨੇ ਕਿਹਾ ਕਿ ਐਸ ਬੀ ਆਈ ਦੇ ਸਸਤੇ ਰਿਹਾਇਸ਼ੀ ਕਰਜ਼ੇ ਰਾਹੀਂ ਘਰਾਂ ਦੇ ਖਰੀਦਦਾਰ ਆਪਣੇ ਸੁਫਨਿਆਂ ਦਾ ਮਹੱਲ ਖਰੀਦ ਸਕਣਗੇ।