ਮੁੰਬਈ, 21 ਅਕਤੂਬਰ (ਪੋਸਟ ਬਿਊਰੋ)- ਕੈਨੇਡਾ ਦੀ ਬਰੁਕਫੀਲਡ ਅਸਟੇਟ ਮੈਨੇਜਮੈਂਟ ਕੰਪਨੀ ਇਸ ਵੇਲੇ ਭਾਰਤ ਵਿੱਚ ਕਮਰਸ਼ੀਅਲ ਪ੍ਰਾਪਰਟੀ ਖਰੀਦਣ ਲਈ 14,688 ਕਰੋੜ ਰੁਪਏ ਦਾ ਨਿਵੇਸ਼ ਕਰ ਰਹੀ ਹੈ।
ਵਰਨਣ ਯੋਗ ਹੈ ਕਿ ਇਹ ਡੀਲ ਦੱਖਣੀ ਏਸ਼ਿਆਈ ਦੇਸ਼ਾਂ ਵਿੱਚ ਅੱਜ ਤੱਕ ਦੀ ਸਭ ਤੋਂ ਵੱਡੀ ਰੀਅਲ ਅਸਟੇਟ ਡੀਲ ਹੈ। ਕੰਪਨੀ ਨੇ ਜਾਰੀ ਕੀਤੇ ਗਏ ਇੱਕ ਬਿਆਨ ਵਿੱਚ ਕਿਹਾ ਕਿ ਉਹ ਭਾਰਤ ਦੇ ਨਿੱਜੀ ਡਿਵੈਲਪਰ ਆਰ ਐਮ ਜੈਡ ਕਾਰਪੋਰੇਸ਼ਨ ਤੋਂ 1.25 ਕਰੋੜ ਵਰਗ ਫੁੱਟ ਆਫਿਸ ਕਮ ਵਰਕਿੰਗ ਸਪੇਸ ਖਰੀਦ ਰਹੀ ਹੈ।ਆਰ ਐਮ ਜੈਡ ਦੇ ਮੈਨੇਜਿੰਗ ਡਾਇਰੈਕਟਰ ਅਰਸ਼ਦੀਪ ਸਿੰਘ ਸੇਠੀ ਨੇ ਕਿਹਾ ਕਿ ਬਰੁਕਫੀਲਡ ਨਾਲ ਇਹ ਸੌਦਾ ਦੱਸਦਾ ਹੈ ਕਿ ਭਾਰਤੀ ਕਮਰਸ਼ੀਅਲ ਆਫਿਸ ਬਿਜ਼ਨਸ ਬਹੁਤ ਮਜ਼ਬੂਤ ਸਥਿਤੀ ਵਿੱਚ ਹੈ। ਇਸ ਦੀ ਸਰਗਰਮੀ ਅਤੇ ਡਿਮਾਂਡ ਵਿੱਚ ਕੋਈ ਕਮੀ ਨਹੀਂ ਆਈ। ਇਸ ਸੌਦੇ ਨਾਲ ਕੰਪਨੀ ਕਰਜ਼ਾ ਮੁਕਤ ਹੋ ਜਾਏਗੀ ਤੇ ਆਪਣੇ ਪੋਰਟ ਫੋਲੀਓ ਕਾਰੋਬਾਰ ਦਾ ਵਿਸਥਾਰ ਕਰੇਗੀ। ਬੰਗਲੌਰ, ਚੇਨਈ ਵਰਗੇ ਦੱਖਣੀ ਮਹਾਨਗਰਾਂ ਵਿੱਚ ਕੰਮ ਕਰਨ ਵਾਲੀ ਆਰ ਐਮ ਜੈਡ ਛੇ ਸਾਲਾਂ ਵਿੱਚ ਆਪਣੇ ਰੀਅਲ ਅਸਟੇਟ ਪੋਰਟ ਫੋਲੀਓ ਨੂੰ 6.7 ਤੋਂ 8.5 ਕਰੋੜ ਸਕਵੇਅਰ ਫੁੱਟ ਤੱਕ ਵਧਾਉਣਾ ਚਾਹੁੰਦੀ ਹੈ। ਇਸ ਦੇ ਟੈਕਨਾਲੋਜੀ ਅਤੇ ਬਿਜ਼ਨਸ ਪਾਰਕ ਦੇ ਕਲਾਇੰਟਸ ਵਿੱਚ ਗੂਗਲ, ਐਚ ਐਸ ਬੀ ਸੀ ਅਤੇ ਐਕਸਚੇਂਜਰ ਵਰਗੀਆਂ ਕੰਪਨੀਆਂ ਸ਼ਾਮਲ ਹਨ।
ਬੀਤੇ ਸਾਲਾਂ ਤੋਂ ਵੱਡੇ ਵਿਦੇਸ਼ੀ ਨਿਵੇਸ਼ਕ ਭਾਰਤੀ ਦਫਤਰ ਮਾਰਕੀਟ ਵਿੱਚ ਖਰੀਦਦਾਰੀ ਕਰ ਰਹੇ ਹਨ। ਪ੍ਰਾਪਰਟੀ ਕੰਸਲਟੈਂਸੀ ਫਰਮ ਨਾਈਟ ਫ੍ਰੈਂਕ ਇੰਡੀਆ ਦੇ ਮੁਤਾਬਕ ਭਾਰਤੀ ਆਫਿਸ ਸਪੇਸ ਮਾਰਕੀਟ ਆਪਣੀ ਮਜ਼ਬੂਤ ਫੰਡਾਮੈਂਟਲ ਕਾਰਨ ਪ੍ਰਾਈਵੇਟ ਇਕਵਿਟੀ ਲਈ ਤਰਜੀਹੀ ਖੇਤਰ ਬਣ ਚੁੱਕਾ ਹੈ। 2011 ਦੇ ਬਾਅਦ ਦਫਤਰੀ ਸਪੇਸ ਵਿੱਚ ਕੁੱਲ 1.13 ਲੱਖ ਕਰੋੜ ਰੁਪਏ ਤੋਂਵੱਧ ਦਾ ਇਕਵਿਟੀ ਨਿਵੇਸ਼ ਆਇਆ ਹੈ। ਇਸੇ ਲੜੀ ਵਿੱਚ ਬਲੈਕ ਸਟੋਨ ਨੇ ਵੀ ਪਿਛਲੇ ਹਫਤੇ ਕੁਝ ਪ੍ਰਾਪਰਟੀ ਖਰੀਦਣ ਦੇ ਮਕਸਦ ਨਾਲ ਇੱਕ ਗੈਰ ਰੁਕਾਵਟਕਾਰੀ ਸਮਝੌਤਾ ਕੀਤਾ ਹੈ। ਅੰਦਾਜ਼ਾ ਹੈ ਕਿ ਇਹ ਸੌਦਾ ਵੀ 14 ਹਜ਼ਾਰ ਕਰੋੜ ਰੁਪਏ ਤੋਂ ਜ਼ਿਆਦਾ ਦਾ ਹੋ ਸਕਦਾ ਹੈ।