ਸ੍ਰੀਨਗਰ, 20 ਅਕਤੂਬਰ (ਪੋਸਟ ਬਿਊਰੋ)- ਜੰਮੂ-ਕਸ਼ਮੀਰ ਵਿੱਚ ਪੰਜ ਅਗਸਤ 2019 ਤੋਂ ਪਹਿਲਾਂ ਦੀ ਸਥਿਤੀ ਬਾਰੇ ਸੰਵਿਧਾਨਕ ਅਲਾਇੰਸ ਬਣਾਉਣ ਵਾਲੇ ਨੈਸ਼ਨਲ ਕਾਨਫਰੰਸ ਦੇ ਪ੍ਰਧਾਨ ਡਾਕਟਰ ਫਾਰੂਕ ਅਬਦੁੱਲਾ ਇੱਕ ਨਵੀਂ ਮੁਸੀਬਤ ਵਿੱਚ ਫਸ ਗਏ ਹਨ। ਜੰਮੂ-ਕਸ਼ਮੀਰ ਕ੍ਰਿਕਟ ਐਸੋਸੀਏਸ਼ਨ (ਜੇ ਕੇ ਸੀ ਏ) ਵਿੱਚ 43.69 ਕਰੋੜ ਰੁਪਏ ਦੇ ਘੋਟਾਲੇ ਦੇ ਕੇਸ ਵਿੱਚ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ ਡੀ) ਨੇ ਕੱਲ੍ਹ ਫਾਰੂਕ ਤੋਂ ਲਗਭਗ ਛੇ ਘੰਟੇ ਪੁੱਛਗਿੱਛ ਕੀਤੀ ਹੈ।
ਨੈਸ਼ਨਲ ਕਾਨਫਰੰਸ ਦੇ ਮੀਤ ਪ੍ਰਧਾਨ ਉਮਰ ਅਬਦੁੱਲਾ ਅਤੇ ਪੀਪਲਜ਼ ਡੈਮੋਕਰੇਟਿਕ ਪਾਰਟੀ ਦੀ ਪ੍ਰਧਾਨ ਮਹਿਬੂਬਾ ਮੁਫਤੀ ਨੇ ਇਸ ਪੁੱਛਗਿੱਛ ਨੂੰ ਸਿਆਸੀ ਬਦਲੇ ਦੀ ਭਾਵਨਾ ਤੋਂ ਪ੍ਰੇਰਤ ਦੱਸਿਆ ਅਤੇ ਕਿਹਾ ਕਿ ਕੇਂਦਰ ਸਰਕਾਰ ਪੀਪਲਜ਼ ਗੁਪਕਾਰ ਡਿਕਲੇਰੇਸ਼ਨ ਤੋਂ ਡਰ ਗਈ ਹੈ, ਇਸ ਲਈ ਫਾਰੂਕ ਤੋਂ ਪੁੱਛਗਿੱਛ ਹੋ ਰਹੀ ਹੈ। ਫਰੂਕ ਅਬਦੁੱਲਾ ਕੱਲ੍ਹ ਸਵੇਰੇ ਸਾਢੇ 11 ਵਜੇ ਸ੍ਰੀਨਗਰ ਦੇ ਰਾਜਬਾਗ ਵਿੱਚ ਈ ਡੀ ਦਫਤਰ ਪੁੱਜੇ ਤੇ ਸ਼ਾਮ ਕਰੀਬ 5.25 ਵਜੇ ਬਾਹਰ ਨਿਕਲੇ ਸਨ। ਉਨ੍ਹਾਂ ਨੇ ਕਿਹਾ ਕਿ ਮੇਰੇ ਕੋਲ ਲੁਕਾਉਣ ਲਈ ਕੁਝ ਨਹੀਂ, ਮੇਰੇ ਹੀ ਨਿਰਦੇਸ਼ ਉੱਤੇ ਸਾਲ 2012 ਵਿੱਚ ਪੁਲਸ ਨੇ ਇਸ ਦੀ ਸਿ਼ਕਾਇਤ ਦਰਜ ਕੀਤੀ ਸੀ। ਮੈਨੂੰ ਇੱਥੇ ਪੁੱਛਗਿੱਛ ਲਈ ਬੁਲਾਇਆ ਗਿਆ ਸੀ। ਉਨ੍ਹਾਂਕੁਝ ਸਵਾਲ ਕੀਤੇ, ਮੈਂ ਜਵਾਬ ਦੇ ਦਿੱਤੇ। ਮੈਂ ਇਸ ਜਾਂਚ ਵਿੱਚ ਪੂਰਾ ਸਹਿਯੋਗ ਕਰਾਂਗਾ।
ਇਹ ਘੋਟਾਲਾ ਮਾਰਚ 2012 ਵਿੱਚ ਬਾਹਰ ਆਇਆ ਸੀ, ਜਦੋਂ ਜੇ ਕੇ ਸੀ ਏ ਦੇ ਓਦੋਂ ਦੇ ਖਜ਼ਾਨਚੀ ਮਨਜ਼ੂਰ ਵਜ਼ੀਰ ਨੇ ਸਾਬਕਾ ਜਨਰਲ ਸਕੱਤਰ ਮੁਹੰਮਦ ਸਲੀਮ ਖਾਨ ਅਤੇ ਸਾਬਕਾ ਖਜ਼ਾਨਾ ਅਧਿਕਾਰੀ ਅਹਿਸਾਨ ਮਿਰਜ਼ਾ ਖਿਲਾਫ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਸੀ। ਇਸ ਤੋਂ ਬਾਅਦ ਕਰੀਬ ਪੰਜਾਹ ਲੋਕਾਂ ਦੇ ਨਾਂਅ ਇਸ ਘੋਟਾਲੇ ਵਿੱਚ ਲਏ ਗਏ ਸਨ।