ਟੋਰਾਂਟੋ, 18 ਅਕਤੂਬਰ (ਪੋਸਟ ਬਿਊਰੋ) : ਟੋਰਾਂਟੋ ਏਰੀਆ ਦੇ ਦੋ ਸਕੂਲ ਬੋਰਡਜ਼ ਆਪਣੇ ਆਨਲਾਈਨ ਲਰਨਿੰਗ ਪਲੈਨਜ਼ ਵਿੱਚ ਤਬਦੀਲੀਆਂ ਕਰਨ ਜਾ ਰਹੇ ਹਨ| ਬਹੁਤ ਸਾਰੇ ਵਿਦਿਆਰਥੀ ਹੁਣ ਇਨ ਪਰਸਨ ਲਰਨਿੰਗ ਨਾਲੋਂ ਆਨਲਾਈਨ ਲਰਨਿੰਗ ਨੂੰ ਤਰਜੀਹ ਦੇ ਰਹੇ ਹਨ|
ਟੋਰਾਂਟੋ ਡਿਸਟ੍ਰਿਕਟ ਸਕੂਲ ਬੋਰਡ ਨੇ ਨਵੰਬਰ ਤੋਂ ਜਨਵਰੀ ਤੱਕ ਐਲੀਮੈਂਟਰੀ ਵਿਦਿਆਰਥੀਆਂ ਲਈ ਆਨਲਾਈਨ ਤੇ ਇਨ ਕਲਾਸ ਲਰਨਿੰਗ ਦਰਮਿਆਨ ਅਦਲਾ ਬਦਲੀ ਕਰਨ ਦੀ ਚੋਣ ਕਰਨ ਦੇ ਮੌਕੇ ਨੂੰ ਅੱਗੇ ਪਾ ਦਿੱਤਾ ਹੈ| ਇਸ ਦੌਰਾਨ ਪੀਲ ਡਿਸਟ੍ਰਿਕਟ ਸਕੂਲ ਬੋਰਡ ਨੇ ਆਖਿਆ ਕਿ ਉਹ ਆਪਣੇ ਹਾਈ ਸਕੂਲ ਦੇ ਵਿਦਿਆਰਥੀਆਂ ਲਈ ਲਰਨਿੰਗ ਦਾ ਹਾਈਬ੍ਰਿਡ ਮਾਡਲ ਲੈ ਕੇ ਆਉਣਗੇ ਜਿਸ ਵਿੱਚ ਇਨ ਪਰਸਨ ਵਿਦਿਆਰਥੀਆਂ ਦੇ ਨਾਲ ਨਾਲ ਉਨ੍ਹਾਂ ਦੇ ਆਨ ਲਾਈਨ ਵਿਦਿਆਰਥੀਆਂ ਨੂੰ ਇੱਕਠਿਆਂ ਪੜ੍ਹਾਈ ਕਰਵਾਈ ਜਾਵੇਗੀ|
ਟੀਡੀਐਸਬੀ ਦੇ ਤਰਜ਼ਮਾਨ ਰਾਇਨ ਬਰਡ ਨੇ ਆਖਿਆ ਕਿ 30 ਸਤੰਬਰ ਵਾਲੀ ਰਜਿਸਟ੍ਰੇਸ਼ਨ ਦੀ ਡੈੱਡਲਾਈਨ ਤੋਂ ਬਾਅਦ ਇਸ ਹਫਤੇ ਦੇ ਸ਼ੁਰੂ ਵਿੱਚ ਆਨਲਾਈਨ ਤੇ ਇਨ ਪਰਸਨ ਲਰਨਿੰਗ ਦਰਮਿਆਨ ਟੀਡੀਐਸਬੀ ਦੇ ਹਜ਼ਾਰਾਂ ਐਲੀਮੈਂਟਰੀ ਵਿਦਿਆਰਥੀਆਂ ਨੇ ਅਦਲਾ ਬਦਲੀ ਕੀਤੀ ਸੀ| ਇਸ ਨਾਲ ਪ੍ਰੋਵਿੰਸ ਦੇ ਸੱਭ ਤੋਂ ਵੱਡੇ ਸਕੂਲ ਬੋਰਡ ਨੂੰ ਕਲਾਸਾਂ ਨੂੰ ਵੀ ਮੁੜ ਤੋਂ ਤਰਤੀਬ ਦੇਣੀ ਪਈ ਸੀ ਤੇ ਟੀਚਰਜ਼ ਨੂੰ ਵੀ ਰੀਅਸਾਈਨ ਕਰਨਾ ਪਿਆ ਸੀ| ਉਨ੍ਹਾਂ ਆਖਿਆ ਕਿ ਇਹ ਪ੍ਰਕਿਰਿਆ ਕਾਫੀ ਮੁਸ਼ਕਲ ਹੈ ਤੇ ਹਰ ਥੋੜ੍ਹੇ ਦਿਨਾਂ ਬਾਅਦ ਇਸ ਨੂੰ ਦੁਹਰਾਇਆ ਨਹੀਂ ਜਾ ਸਕਦਾ|