ਸ੍ਰੀਨਗਰ, 18 ਅਕਤੂਬਰ (ਪੋਸਟ ਬਿਊਰੋ)- ਦੱਖਣੀ ਕਸ਼ਮੀਰ ਦੇ ਅਨੰਤਨਾਗ ਵਿੱਚ ਸੁਰੱਖਿਆ ਫੋਰਸਾਂ ਨੇ ਲਸ਼ਕਰ ਏ ਤੋਇਬਾ ਦੇ ਖਤਰਨਾਕ ਅੱਤਵਾਦੀ ਨਾਸਿਰ ਉਰਫ ਸ਼ਕੀਲ ਨੂੰ ਮੁਕਾਬਲੇ ਵਿੱਚ ਮਾਰਦਿੱਤਾ ਹੈ।
ਏ ਸ਼੍ਰੇਣੀ ਦੇ ਅੱਤਵਾਦੀਆਂ ਦੀ ਸੂਚੀ ਵਿੱਚ ਸੱਤ ਲੱਖ ਰੁਪਏ ਦਾ ਇਨਾਮੀ ਅੱਤਵਾਦੀ ਸ਼ਕੀਲ ਆਈ ਈ ਡੀ ਧਮਾਕੇ ਕਰਨ ਦਾ ਮਾਹਰ ਸੀ। ਉਹ ਅੱਤਵਾਦੀਆਂ ਨੂੰ ਆਈ ਈ ਡੀ ਤਿਆਰ ਕਰਨ ਦੀ ਟਰੇਨਿੰਗ ਵੀ ਦਿੰਦਾ ਸੀ। ਮੁਕਾਬਲੇ ਦੌਰਾਨ ਉਸ ਦੇ ਦੋ ਸਾਥੀ ਘੇਰਾ ਤੋੜ ਕੇ ਫਰਾਰ ਹੋ ਗਏ।
ਇਸ ਦੇ ਬਨਾ ਸੁਰੱਖਿਆ ਬਲਾਂ ਨੇ ਅਵੰਤੀਪੋਰਾ ਤੋਂ ਲਸ਼ਕਰ ਦੇ ਇੱਕ ਓਵਰ ਗਰਾਊਂਡ ਵਰਕਰ (ਓ ਜੀ ਡਬਲਯੂ ਨੂੰ ਵੀ ਫੜਿਆ ਹੈ।ਪੁਲਸ ਨੇ ਸਵੇਰੇ ਫੌਜ ਦੀ 19 ਆਰ ਆਰ ਅਤੇ ਸੀ ਆਰ ਪੀ ਐਫ ਦੇ ਜਵਾਨਾਂ ਦੇ ਨਾਲ ਲਾਰਨੂ ਵਿੱਚ ਲੁਕੇ ਹੋਏ ਅੱਤਵਾਦੀਆਂ ਨੂੰ ਫੜਨ ਲਈ ਤਲਾਸ਼ੀ ਮੁਹਿੰਮ ਚਲਾਈ। ਇੱਕ ਜਗ੍ਹਾ ਅੱਤਵਾਦੀਆਂ ਨੂੰ ਸੁਰੱਖਿਆ ਬਲਾਂ ਨੇ ਘੇਰ ਲਿਆ, ਪਰ ਦਹਿਸ਼ਤਗਰਦਾਂ ਨੇ ਘੇਰਾਬੰਦੀ ਤੋੜ ਕੇ ਭੱਜਣ ਲਈ ਫਾਇਰਿੰਗ ਸ਼ੁਰੂ ਕਰ ਦਿੱਤੀ। ਮੁਕਾਬਲੇ ਵਿੱਚ ਸੁਰੱਖਿਆ ਬਲਾਂ ਨੇ ਕਈ ਵਾਰ ਸਰੰਡਰ ਕਰਨ ਨੂੰ ਕਿਹਾ, ਪਰ ਅੱਤਵਾਦੀ ਨਹੀਂ ਮੰਨੇ। ਕਰੀਬ ਸਵਾ ਘੰਟੇ ਬਾਅਦ ਅੱਤਵਾਦੀਆਂ ਵੱਲੋਂ ਫਾਇਰਿੰਗ ਬੰਦ ਹੋ ਗਈ। ਜਵਾਨਾਂ ਨੇ ਮੁੁਕਾਬਲੇ ਵਾਲੀ ਜਗ੍ਹਾ ਦੀ ਤਲਾਸ਼ੀ ਲਈ ਤਾਂ ਓਥੇ ਗੋਲੀਆਂ ਨਾਲ ਛਾਨਣ ਇੱਕ ਅੱਤਵਾਦੀ ਦੀ ਲਾਸ਼ ਅਤੇ ਹਥਿਆਰ ਮਿਲੇ। ਕਿਹਾ ਜਾ ਰਿਹਾ ਹੈ ਕਿ ਉਸ ਦੇ ਨਾਲ ਦੋ ਹੋਰ ਅੱਤਵਾਦੀ ਸਨ, ਜੋ ਭੱਜਣ ਵਿੱਚ ਸਫਲ ਰਹੇ। ਮਾਰੇ ਗਏ ਅੱਤਵਾਦੀ ਦੀ ਪਛਾਣ ਲਸ਼ਕਰ ਦੇ ਖਤਰਨਾਕ ਅੱਤਵਾਦੀ ਨਾਸਿਰ ਉਰਫ ਸ਼ਕੀਲ ਸਾਹਬ ਉਰਫ ਸ਼ਾਕ ਭਾਈ ਦੇ ਰੂਪ ਵਿੱਚ ਹੋਈ ਹੈ। ਉਹ ਆਈ ਈ ਡੀ ਮਾਹਰ ਸੀ ਅਤੇ ਸਥਾਨਕ ਅੱਤਵਾਦੀਆਂ ਨੂੰ ਹਥਿਆਰ ਚਲਾਉਣ ਅਤੇ ਆਈ ਈ ਡੀ ਬਣਾਉਣ ਦੀ ਟਰੇਨਿੰਗ ਦਿੰਦਾ ਸੀ।