ਲੰਡਨ, 18 ਅਕਤੂਬਰ (ਪੋਸਟ ਬਿਊਰੋ)- ਪੰਜਾਬ `ਚ ਜੰਮੇ ਅਤੇ ਚਾਲੀ ਸਾਲਾਂ ਤੋਂ ਵੱਧ ਸਮੇਂ ਤੋਂ ਆਇਰਲੈਂਡ `ਚ ਰਹਿੰਦੇ ਸੱਤਰ ਸਾਲਾ ਵਿਅਕਤੀ ਵਿਨੋਦ ਬਜਾਜ ਦਾ ਦਾਅਵਾ ਹੈ ਕਿ ਉਹ 1500 ਦਿਨ ਵਿੱਚ ਧਰਤੀ ਦੇ ਘੇਰੇ ਬਰਾਬਰ 40,075 ਕਿਲੋਮੀਟਰ ਦੀ ਯਾਤਰਾ ਕਰ ਚੁੱਕੇ ਹਨ।ਉਨ੍ਹਾਂ ਨੇ ਗਿਨੀਜ਼ ਵਰਲਡ ਰਿਕਾਰਡ ਲਈ ਅਰਜ਼ੀ ਦਿੱਤੀ ਹੈ। ਉਨ੍ਹਾਂ ਦੇ ਮੁਤਾਬਕ ‘ਅਰਥ ਵਾਕ` ਯਾਤਰਾ ਉਨ੍ਹਾਂ ਨੇ ਆਪਣੇ ਗ੍ਰਹਿ ਸ਼ਹਿਰ ਲਿਮਰਿਕ ਤੋਂ ਬਾਹਰ ਜਾਏ ਬਿਨਾਂ ਹੀ ਪੂਰੀ ਕੀਤੀ ਹੈ।
ਵਿਨੋਦ ਬਜਾਜ ਨੇ ਅਗਸਤ 2016 ਵਿੱਚ ਭਾਰ ਘੱਟ ਕਰਨ ਅਤੇ ਸਰੀਰ ਨੂੰ ਤੰਦਰੁਸਤ ਬਣਾਉਣ ਦੇ ਇਰਾਦੇ ਨਾਲ ਇਹ ਯਾਤਰਾ ਸ਼ੁਰੂ ਕੀਤੀ ਸੀ। ਜਿਵੇਂ ਜਿਵੇਂ ਉਨ੍ਹਾਂ ਦਾ ਭਾਰ ਘੱਟ ਹੁੰਦਾ ਗਿਆ, ਉਵੇਂ ਉਵੇਂ ਚੱਲਣ ਦਾ ਉਨ੍ਹਾਂ ਦਾ ਉਤਸ਼ਾਹ ਵਧਦਾ ਗਿਆ। ਇਸ ਲਈ ਉਨ੍ਹਾਂ ਨੇ ਕਈ ਰਸਤਿਆਂ ਨੂੰ ਅਪਣਾਇਆ ਤੇ ਜਦੋਂ-ਜਦੋਂ ਮੌਸਮ ਬਾਰੇ ਪ੍ਰੇਸ਼ਾਨੀਆਂ ਆਉਂਦੀਆਂ ਤਾਂ ਉਹ ਮਾਲ ਵਿੱਚ ਇਸ ਯਾਤਰਾ ਦੀ ਪੂਰਤੀ ਕਰ ਲੈਂਦੇ। ਬਜਾਜ ਨੇ ਕਿਹਾ ਕਿ ਸ਼ੁਰੂ ਦੇ ਤਿੰਨ ਮਹੀਨੇ ਹਰ ਹਫਤੇ ਸੱਤ ਦਿਨ ਚੱਲਣ ਨਾਲ ਰੋਜ਼ਾਨਾ 700 ਕੈਲੋਰੀ ਘੱਟ ਹੋਣ ਨਾਲ ਭਾਰ ਵੀ ਅੱਠ ਕਿਲੋ ਘੱਟ ਹੋ ਗਿਆ। ਬਜਾਜ ਨੇ ਦਸਿਆ ਕਿ ਅਗਲੇ ਛੇ ਮਹੀਨੇ ਵਿੱਚ ਮੇਰਾ ਭਾਰ ਹੋਰ 12 ਕਿਲੋ ਗਰਾਮ ਹੋਰ ਘੱਟ ਹੋਇਆ।
ਰਿਟਾਇਰਡ ਇੰਜੀਨੀਅਰ ਅਤੇ ਬਿਜ਼ਨਸ ਕੰਸਲਟੈਂਟ ਬਜਾਜ ਚੇਨਈ `ਚ ਪਲੇ ਅਤੇ ਵੱਡੇ ਹੋਏ। ਉਹ 1975 ਵਿੱਚ ਮੈਨੇਜਮੈਂਟ ਦੀ ਪੜ੍ਹਾਈ ਲਈ ਗਲਾਸਗੋ ਆ ਗਏ ਅਤੇ 42 ਸਾਲ ਪਹਿਲਾਂ ਆਇਰਲੈਂਡ ਚਲੇ ਗਏ। ਫਿਲਹਾਲ ਉਹ ਆਪਣੇ ਪਰਵਾਰ ਨਾਲ ਲਿਮਰਿਕ ਦੇ ਉਪ ਨਗਰ ਵਿੱਚ ਰਹਿੰਦੇ ਹਨ। ਉਨ੍ਹਾਂ ਕਿਹਾ ਕਿ ਪਹਿਲੇ ਸਾਲ ਦੇ ਅਖੀਰ ਤੱਕ ਮੈਂ 7600 ਕਿਲੋਮੀਟਰ ਦੀ ਯਾਤਰਾ ਤੈਅ ਕਰ ਲਈ ਅਤੇ ਇਹ ਜਾਣ ਕੇ ਮੈਨੂੰ ਹੈਰਾਨੀ ਹੋਈ ਕਿ ਮੈਂ ਭਾਰਤ ਤੋਂ ਆਇਰਲੈਂਡ ਤੱਕ ਦੀ ਦੂਰੀ ਤੈਅ ਕਰ ਚੁੱਕਾ ਹਾਂ। ਉਨ੍ਹਾਂ ਨੇ 21 ਸਤੰਬਰ ਨੂੰ ਅਰਥ ਵਾਕ ਪੂਰੀ ਕਰ ਲਈ। ਉਨ੍ਹਾਂ ਦੀ ਅਰਜ਼ੀ ਹਾਲੇ ਗਿਨੀਜ਼ ਵਰਲਡ ਰਿਕਾਰਡ ਦੇ ਗੇੜ ਵਿੱਚ ਹੈ ਅਤੇ ਇਹ ਮੁਲਾਂਕਣ ਚੱਲ ਰਿਹਾ ਹੈ ਕਿ ਕੀ 1496 ਦਿਨਾਂ ਅਤੇ 54,633,135 ਕਦਮ ਮਿਲ ਕੇ ਧਰਤੀ ਦੇ ਘੇਰੇ ਦੇ ਬਰਾਬਰ ਦੀ ਉਨ੍ਹਾਂ ਦੀ ਯਾਤਰਾ ਪੂਰੀ ਹੁੰਦੀ ਹੈ ਜਾਂ ਨਹੀਂ।