ਪੈਰਿਸ, 18 ਅਕਤੂਬਰ (ਪੋਸਟ ਬਿਊਰੋ)- ਪੈਗੰਬਰ ਮੁਹੰਮਦ ਦੇ ਵਿਵਾਦ ਕਾਰਨ ਫਰਾਂਸ ਦੀ ਰਾਜਧਾਨੀ ਪੈਰਿਸ ਦੇ ਉਤਰ-ਪੂਰਬੀ ਇਲਾਕੇ ਵਿੱਚ ਦੋ ਜਣਿਆਂ ਦੀ ਮੌਤ ਹੋ ਗਈ ਹੈ। ਇਸ ਵਾਰਦਾਤ `ਚ ਇੱਕ ਵਿਅਕਤੀ ਨੇ ਆਪਣੇ ਬੱਚਿਆਂ ਦੇ ਇਤਿਹਾਸ ਦੇ ਟੀਚਰ ਦਾ ਸਿਰ ਇਸ ਗੱਲ ਕਾਰਨ ਵੱਢ ਦਿੱਤਾ ਕਿ ਉਸ ਨੇ ਪੈਗੰਬਰ ਮੁਹੰਮਦ ਦਾ ਕਾਰਟੂਨ ਬੱਚਿਆਂ ਨੂੰ ਦਿਖਾਇਆ ਅਤੇ ਉਸ ਉੱਤੇ ਚਰਚਾ ਕੀਤੀ। ਫਿਰ ਕਾਤਲ ਨੂੰ ਪੁਲਸ ਨੇ ਖਤਮ ਕਰ ਦਿਤਾ ਹੈ।
ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਂ ਨੇ ਇਸ ਨੂੰ ਇਸਲਾਮਿਕ ਅੱਤਵਾਦੀ ਹਮਲਾ ਕਰਾਰ ਦਿੱਤਾ ਅਤੇ ਦੇਸ਼ ਦੇ ਲੋਕਾਂ ਨੂੰ ਕੱਟੜਪੰਥੀਆਂ ਖਿਲਾਫ ਇਕਜੁੱਟ ਹੋਣ ਲਈ ਕਿਹਾ ਹੈ। ਉਨ੍ਹਾ ਨੇ ਉਸ ਸਕੂਲ ਦਾ ਦੌਰਾ ਕੀਤਾ ਜਿੱਥੇ ਮ੍ਰਿਤਕ ਟੀਚਰ ਇਤਿਹਾਸ ਦੇ ਅਧਿਆਪਕ ਵਜੋਂ ਕੰਮ ਕਰਦਾ ਸੀ। ਟੀਚਰ ਦੇ ਸਿਰ ਵੱਢੇ ਜਾਣ ਨਾਲ ਫਰਾਂਸ ਵਿੱਚ ਇੱਕ ਵਾਰ ਮੁੜ ਚਿੰਤਾ ਦੀ ਲਹਿਰ ਫੈਲ ਗਈ ਹੈ। ਇਹ ਘਟਨਾ ਉਸ ਸਮੇਂ ਸਾਹਮਣੇ ਆਈ ਹੈ ਜਦੋਂ ਫਰਾਂਸ ਦੀ ਰਾਜਧਾਨੀ ਪੈਰਿਸ ਵਿੱਚ 2015 ਵਿੱਚ ਹੋਏ ਸ਼ਾਰਲੀ ਹੈਬਦੋ ਅੱਤਵਾਦੀ ਹਮਲੇ ਦੀ ਸੁਣਵਾਈ ਚੱਲ ਰਹੀ ਸੀ।ਉਸ ਦੌਰਾਨ ਜੋ ਹਮਲਾ ਹੋਇਆ ਸੀ, ਉਹ ਵੀ ਇਸ ਅਖਬਾਰ ਸ਼ਾਰਲੀ ਹੈਬਦੋ ਵਿੱਚ ਪੈਗੰਬਰ ਦੇ ਕਾਰਟੂਨ ਛਾਪਣ ਤੋਂ ਨਾਰਾਜ ਹੋ ਕੇ ਕੀਤਾ ਗਿਆ ਦੱਸਿਆ ਜਾਂਦਾ ਸੀ। ਟੀਚਰ ਦਾ ਸਿਰ ਕਲਮ ਕਰਨ ਤੋਂ ਬਾਅਦ ਦੋਸ਼ੀ ਸਕੂਲ ਤੋਂ ਭੱਜ ਨਿਕਲਿਆ ਅਤੇ ਕਰੀਬ 600 ਮੀਟਰ ਦੂਰ ਜਾ ਕੇ ਉਹ ਜ਼ੋਰ ਨਾਲ ਨਾਅਰੇ ਲਾਉਣ ਲੱਗਾ ਅਤੇ ਪੁਲਸ ਨੂੰ ਬੰਦੂਕ ਦਿਖਾ ਕੇ ਸਰੰਡਰ ਕਰਨ ਤੋਂਨਾਂਹ ਕਰ ਦਿੱਤੀ ਅਤੇ ਉਸ ਨੇ ਹਮਲੇ ਲਈ ਬੰਦੂਕ ਤਾਣੀ ਅਤੇ ਪੁਲਸ ਫੋਰਸ ਨੇ ਜਵਾਬੀ ਕਾਰਵਾਈ ਕਰਦੇ ਹੋਏ ਉਸ ਨੂੰ ਮਾਰ ਦਿੱਤਾ।