1970 ਅਤੇ ਅੱਸੀ ਦੇ ਦਹਾਕੇ 'ਚ ਟੌਪ ਦੀਆਂ ਅਭਿਨੇਤਰੀਆਂ ਵਿੱਚ ਸ਼ਾਮਲ ਰਹੀ ਰਣਜੀਤਾ ਕੌਰ ਨੇ 1976 'ਚ ਰਿਸ਼ੀ ਕਪੂਰ ਦੇ ਨਾਲ ਫਿਲਮ ‘ਲੈਲਾ ਮਜਨੂ’ ਨਾਲ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ ਅਤੇ ਪਿਛਲੀ ਵਾਰ 2012 ਦੀ ਫਿਲਮ ‘ਜ਼ਿੰਦਗੀ ਤੇਰੇ ਨਾਮ’ ਵਿੱਚ ਨਜ਼ਰ ਆਈ ਸੀ। ਪਿੱਛੇ ਜਿਹੇ ਇੱਕ ਇੰਟਰਵਿਊ 'ਚ ਜਦੋਂ ਉਸ ਤੋਂ ਪੁੱਛਿਆ ਗਿਆ ਕਿ ਅੱਜ ਉਹ ਫਿਲਮਾਂ ਕਿਉਂ ਨਹੀਂ ਕਰਦੀ ਤਾਂ ਉਸ ਦਾ ਕਹਿਣਾ ਸੀ, ‘ਆਪਣੇ ਬੇਟੇ ਦੀ ਪੜ੍ਹਾਈ ਲਈ ਅਸੀਂ ਕਾਫੀ ਸਮੇਂ ਤੋਂ ਅਮਰੀਕਾ ਵਿੱਚ ਰਹਿ ਰਹੇ ਸੀ। ਅਸੀਂ ਪਰਤ ਕੇ ਪੁਣੇ 'ਚ ਵੱਸ ਗਏ, ਪਰ ਨਾਇਕਾ ਦੀ ਭੂਮਿਕਾ ਨਿਭਾਉਣ ਤੋਂ ਬਾਅਦ ਤੁਸੀਂ ਸੱਚ 'ਚ ਮਾਂ ਦੀਆਂ ਭੂਮਿਕਾਵਾਂ ਨਹੀਂ ਕਰ ਸਕਦੇ। ਇਸ ਤੋਂ ਬਿਨਾ ਮੈਨੂੰ ਲੱਗਦਾ ਹੈ ਕਿ ਲੋਕਾਂ ਨੇ ਇਹ ਵੀ ਸੋਚਿਆ ਕਿ ਮੈਂ ਪੂਰੀ ਤਰ੍ਹਾਂ ਨਾਲ ਅਮਰੀਕਾ ਵਿੱਚ ਵੱਸ ਗਈ ਹਾਂ ਅਤੇ ਮੈਂ ਵੀ ਇਥੇ ਵਧੇਰੇ ਲੋਕਾਂ ਦੇ ਸੰਪਰਕ 'ਚ ਨਹੀਂ ਸੀ।”
ਅੱਜਕੱਲ੍ਹ ਦੀਆਂ ਫਿਲਮਾਂ 'ਤੇ ਜਦੋਂ ਉਸ ਦੀ ਰਾਏ ਪੁੱਛੀ ਗਈ ਤਾਂ ਉਸ ਨੇ ਕਿਹਾ, ‘ਬਹੁਤ ਅਸ਼ਲੀਲਤਾ ਹੈ। ਮੈਂ ਉਨ੍ਹਾਂ ਨਾਲ ਨਹੀਂ ਜੁੜ ਸਕਦੀ। ਸਾਡੇ ਸਮੇਂ 'ਚ ਫਿਲਮਾਂ ਸਾਫ-ਸੁਥਰੀਆਂ ਸਨ। ਸ਼ਾਇਦ ਉਹ ਅੱਜ ਦੇ ਰੁਝਾਨ ਨਾਲ ਚੱਲਦੇ ਹਨ, ਪਰ ਮੈਂ ਸਾਫ-ਸੁਥਰੀਆਂ ਫਿਲਮਾਂ ਪਸੰਦ ਕਰਦੀ ਹਾਂ। ਪਿਛਲੀ ਵਾਰ ਮੈਂ ਜੋ ਫਿਲਮ ਦੇਖੀ, ਉਹ ਅਮਿਤਾਭ ਬੱਚਨ, ਰਿਸ਼ੀ ਕਪੂਰ ਦੀ ‘102 ਨਾਟਆਊਟ’ ਸੀ। ਇਸ 'ਚ ਦੋ ਸ਼ਾਨਦਾਰ ਕਲਾਕਾਰ ਸਨ ਅਤੇ ਮੈਨੂੰ ਇਹ ਬਹੁਤ ਚੰਗੀ ਲੱਗੀ।”