ਇਸਲਾਮਾਬਾਦ, 23 ਸਤੰਬਰ (ਪੋਸਟ ਬਿਊਰੋ)- ਮਨੀ ਲਾਂਡਰਿੰਗ ਵਿੱਚ ਸੰਸਾਰਕ ਬੈਂਕਾਂ ਦੀ ਭੂਮਿਕਾ ਦੇ ਆਧਾਰ `ਤੇ ਘੱਟੋ ਘੱਟ ਛੇ ਪਾਕਿਸਤਾਨੀ ਬੈਂਕਾਂ ਦਾ ਨਾਂਅ ਜਾਂਚ ਵਿੱਚ ਆਇਆ ਹੈ, ਜੋ ਘੱਟੋ ਘੱਟ 25 ਲੱਖ ਡਾਲਰ ਤੱਕ ਦਾ ਹੈ।
‘ਇੰਟਰਨੈਸ਼ਨਲ ਕੰਸਟੋਰੀਅਮ ਆਫ ਇਨਵੈਸਟੀਗੇਟਿਵ ਜਰਨਲਿਸਟਸ` (ਆਈ ਸੀ ਆਈ ਜੇ) ਅਤੇ ਬਜਫੀਡ ਨਿਊਜ਼ ਨੂੰ ਇੱਕ ਜਾਂਚ ਵਿੱਚ ਪਤਾ ਲੱਗਾ ਕਿ ਪਾਕਿਸਤਾਨੀ ਬੈਂਕਾਂ ਨਾਲ ਸੰਬੰਧਤ ਲਗਭਗ 25 ਲੱਖ ਡਾਲਰ ਦੀ ਰਕਮ ਦਾ ਘੱਟੋ ਘੱਟ 29 ਵਾਰ ਸ਼ੱਕੀ ਲੈਣ-ਦੇਣ ਹੋਇਆ, ਜਿਸ ਦੀ ਵਰਤੋਂ ਮਨੀ ਲਾਂਡਰਿੰਗ ਲਈ ਕੀਤਾ ਗਈ ਹੋ ਸਕਦੀ ਹੈ। ਇਹ ਛੇ ਬੈਂਕ ਅਲਾਈਡ ਬੈਂਕ, ਯੂਨਾਈਟਿਡ ਬੈਂਕ ਲਿਮਟਿਡ (ਯੂ ਬ ਐਲ), ਹਬੀਬ ਮੈਟਰੋਪਾਲੀਟਨ ਬੈਂਕ, ਬੈਂਕ ਅਲਫਲਾਹ, ਸਟੈਂਡਰਡ ਚਾਰਟਰਡ ਬੈਂਕ ਪਾਕਿਸਤਾਨ ਅਤੇ ਹਬੀਬ ਬੈਂਕ ਲਿਮਟਿਡ ਹਨ। ਪੱਤਰਕਾਰਾਂ ਦੀਜਾਂਚ ਅਨੁਸਾਰ ਸਾਲ 2011 ਅਤੇ 2012 ਦੌਰਾਨ ਸਾਰੇ 29 ਸ਼ੱਕੀ ਲੈਣ-ਦੇਣ ਹੋਏ ਸਨ। ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਅਮਰੀਕੀ ਟ੍ਰੇਜ਼ਰੀ ਡਿਪਾਰਟਮੈਂਟ ਦੀ ਇੰਟੈਲੀਜੈਂਸ ਯੂਨਿਟ, ਫਾਇਨੈਂਸ਼ਲ ਕਰਾਈਮ ਇਨਫੋਰਸਮੈਂਟ ਨੈਟਵਰਕ ਨੇ ਸਭ 2,100 ਤੋਂ ਵੱਧ ਸ਼ੱਕੀ ਸਰਗਰਮੀ ਦੀ ਰਿਪੋਰਟ ਦਰਜ ਕੀਤੀ ਹੈ। ਸੰਸਾਰਕ ਬੈਂਕਾਂ ਨੇ ਸ਼ੱਕੀ ਭੁਗਤਾਨਾਂ ਵਿੱਚ 1999 ਅਤੇ 2017 ਦੌਰਾਨ ਦੋ ਖਰਬ ਡਾਲਰ ਤੋਂ ਵੱਧ ਦਾ ਕਾਰੋਬਾਰ ਕੀਤਾ ਹੈ। ਇਹ ਮਾਮਲਾ ਉਸ ਸਮੇਂ ਪਤਾ ਲੱਗਾ ਹੈ, ਜਦ ਪਾਕਿਸਤਾਨ ਅੱਤਵਾਦੀਆਂ ਨੂੰ ਫੰਡਿੰਗ ਤੇ ਮਨੀ ਲਾਂਡਰਿੰਗ ਬਾਰੇੇ ਫਾਇਨੈਂਸ਼ੀਅਲ ਐਕਸ਼ਨ ਟਾਸਕ ਫੋਰਸ (ਐਫ ਏ ਟੀ ਐਫ) ਦੀ 27 ਨੁਕਾਤੀ ਕਾਰਜ ਯੋਜਨਾ ਨੂੰ ਪੂਰਾ ਕਰਨ ਲਈ ਸਖਤ ਮਿਹਨਤ ਕਰ ਰਿਹਾ ਹੈ।
ਇਸ ਦੌਰਾਨ ਪਤਾ ਲੱਗਾ ਹੈ ਕਿ ਬੰਗਲਾ ਦੇਸ਼ ਦੇ ਤਿੰਨ ਬੈਂਕਾਂ ਵੀ ਨਾਜਾਇਜ਼ ਧਨ ਦੇ ਲੈਣ-ਦੇਣ ਵਿੱਚ ਸੰਸਾਰਕ ਨੈਟਵਰਕ ਨਾਲ ਜੁੜੇ ਹੋਏ ਹਨ। ਇਨ੍ਹਾਂ ਤਿੰਨ ਬੈਂਕਾਂ ਵਿੱਚੋਂ ਦੋ ਇਸਲਾਮਕ ਬੈਂਕ ਤੋਂ ਚਾਰ ਵਾਰ ਹੋਏ ਟਰਾਂਜੈਕਸ਼ਨ ਨਾਲ 3,37,733 ਡਾਲਰ ਆਏ ਸਨ। ਇਹ ਪੈਸੇ ਆਸਟਰੇਲੀਅਨ ਅਤੇ ਇੱਕ ਲਾਟਵੀਅਨ ਬੈਂਕ ਤੋਂ ਆਏ ਸਨ, ਉਥੇ ਸਰਕਾਰ ਦੀ ਮਾਲਕੀ ਵਾਲੇ ਤੀਸਰੇ ਬੈਂਕ ਤੋਂ ਚਾਰ ਟ੍ਰਾਂਜਕੈਸਨ ਦੇ ਰਾਹੀਂ 4,95,204 ਡਾਲਰ ਭੇਜੇ ਗਏ। ਇਹ ਸਾਰੇ ਲੈਣ-ਦੇਣ ਸਤੰਬਰ 2016 ਵਿੱਚ ਇੱਕ ਜਰਮਨ ਬੈਂਕ ਦੇ ਨਾਲ ਹੋਏ ਸਨ।