ਮੈਲਬੌਰਨ, 20 ਨਵੰਬਰ, (ਪੋਸਟ ਬਿਊਰੋ)- ਆਸਟਰੇਲੀਆ ਦੇ ਮੈਲਬੌਰਨ ਵਿਚ ਅੱਤਵਾਦੀ ਹਮਲਿਆਂ ਦੀ ਸਾਜਿਸ਼ ਰਚੇ ਜਾਣ ਦੇ ਦੋਸ਼ ਵਿਚ 3 ਲੋਕਾਂ ਨੂੰ ਮੰਗਲਵਾਰ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਇਹ ਗ੍ਰਿਫਤਾਰੀ ਉਸ ਸਮੇਂ ਵਿਚ ਕੀਤੀ ਗਈ ਹੈ, ਜਦੋਂ ਇਸਲਾਮਿਕ ਸਟੇਟ ਤੋਂ ਪ੍ਰਭਾਵਿਤ ਹੋ ਕੇ ਕਰੀਬ 2 ਹਫਤੇ ਪਹਿਲਾਂ 9 ਨਵੰਬਰ ਨੂੰ ਮੈਲਬੌਰਨ ਵਿਚ ਦੋ ਲੋਕਾਂ ਦੀ ਤੇਜ਼ ਨੁਕੀਲੇ ਹਥਿਆਰ ਨਾਲ ਹੱਤਿਆ ਕਰ ਦਿੱਤੀ ਗਈ ਸੀ।
ਪੁਲਸ ਮੁਤਾਬਕ ਤੁਰਕੀ ਮੂਲ ਦੇ ਤਿੰਨਾਂ ਲੋਕਾਂ ਨੂੰ ਸਾਰੀ ਰਾਤ ਦੀ ਛਾਪੇਮਾਰੀ ਮਗਰੋਂ ਗ੍ਰਿਫਤਾਰ ਕੀਤਾ ਗਿਆ। ਉਹ ਮੈਲਬੌਰਨ ਦੇ ਭੀੜ ਵਾਲੇ ਇਲਾਕਿਆਂ ਵਿਚ ਹਮਲਾ ਕਰਨ ਦੀ ਯੋਜਨਾ ਬਣਾ ਰਹੇ ਸਨ। ਮੁੱਖ ਕਮਿਸ਼ਨਰ ਗ੍ਰਾਹਮ ਏਸ਼ਟਨ ਨੇ ਦੱਸਿਆ ਕਿ ਤਿੰਨੇ ਵਿਅਕਤੀ ਯਕੀਨੀ ਰੂਪ ਨਾਲ ਆਈ ਐੱਸ ਆਈ ਐਸ ਤੋਂ ਪ੍ਰੇਰਿਤ ਸਨ, ਪਰ ਉਸ ਸੰਗਠਨ ਨਾਲ ਉਨ੍ਹਾਂ ਦਾ ਸਬੰਧ ਨਹੀਂ। ਉਨ੍ਹਾਂ ਕਿਹਾ, ‘ਸਾਨੂੰ ਯਕੀਨ ਹੈ ਕਿ ਅੱਜ ਚੁੱਕੇ ਕਦਮ ਨੇ ਇਸ ਗਰੁੱਪ ਤੋਂ ਭਾਈਚਾਰੇ ਨੂੰ ਹੋਣ ਵਾਲੇ ਕਿਸੇ ਵੀ ਖਤਰੇ ਨੂੰ ਖਤਮ ਕਰ ਦਿੱਤਾ ਹੈ।` ਉਨ੍ਹਾਂ ਕਿਹਾ ਸਾਨੂੰ ਨਹੀਂ ਲੱਗਦਾ ਕਿ ਗਰੁੱਪ ਦੇ ਇਲਾਵਾ ਕੋਈ ਹੋਰ ਖਤਰਾ ਵੀ ਹੈ। ਗ੍ਰਿਫਤਾਰ ਕੀਤੇ ਲੋਕਾਂ ਦੇ ਨਾਮ ਨਹੀਂ ਦੱਸੇ ਗਏ। ਬੀਤੇ ਮਾਰਚ ਤੋਂ ਇਨ੍ਹਾਂ ਤਿੰਨਾਂ `ਤੇ ਨਜ਼ਰ ਰੱਖੀ ਜਾ ਰਹੀ ਸੀ, ਪਰ 9 ਨਵੰਬਰ ਨੂੰ ਮੈਲਬੌਰਨ ਹਮਲੇ ਦੇ ਬਾਅਦ ਇਹ ਹੋਰ ਸਰਗਰਮ ਹੋ ਗਏ ਸਨ।