ਨਵੀਂ ਦਿੱਲੀ, 20 ਨਵੰਬਰ, (ਪੋਸਟ ਬਿਊਰੋ)- ਭਾਰਤ ਦੀ ਸਭ ਤੋਂ ਵੱਡੀ ਜਾਂਚ ਏਜੰਸੀ ਸੀ ਬੀ ਆਈ ਦੇ ਡਾਇਰੈਕਟਰ ਆਲੋਕ ਵਰਮਾ ਦੇ ਖ਼ਿਲਾਫ਼ ਕੇਂਦਰੀ ਵਿਜੀਲੈਂਸ ਕਮਿਸ਼ਨ (ਸੀ ਵੀ ਸੀ) ਦੀ ਜਾਂਚ ਬਾਰੇ ਉਨ੍ਹਾਂ ਦੇ ਜਵਾਬ ਦਾਅਵੇ ਦੇ ਵੇਰਵੇ ਲੀਕ ਹੋਣ ਅਤੇ ਏਜੰਸੀ ਦੇ ਡੀ ਆਈ ਜੀ ਮਨੀਸ਼ ਕੁਮਾਰ ਸਿਨਹਾ ਵਲੋਂ ਲਾਏ ਸਨਸਨੀਖੇਜ਼ ਦੋਸ਼ ਜ਼ਾਹਰ ਕੀਤੇ ਜਾਣ ਉੱਤੇ ਸੁਪਰੀਮ ਕੋਰਟ ਅੱਜ ਬਹੁਤ ਜਿ਼ਆਦਾ ਤੈਸ਼ ਵਿਚ ਆ ਗਈ।
ਚੀਫ ਜਸਟਿਸ ਰੰਜਨ ਗੋਗੋਈ ਦੀ ਅਗਵਾਈ ਵਾਲੇ ਬੈਂਚ ਨੇ ਅੱਜ ਦੋ ਵਾਰ ਇਸ ਮਾਮਲੇ ਦੀ ਸੁਣਵਾਈ ਕੀਤੀ ਤੇ ਸਾਫ ਕਿਹਾ ਕਿ ਅਦਾਲਤ ਉਹ ਮੰਚ ਨਹੀਂ, ਜਿੱਥੇ ਆ ਕੇ ਕੋਈ ਕੁਝ ਵੀ ਬੋਲ ਦੇਵੇ। ਲੋਕ ਏਥੇ ਕਾਨੂੰਨੀ ਹੱਕਾਂ ਦਾ ਨਿਤਾਰਾ ਕਰਾਉਣ ਆਉਂਦੇ ਹਨ। ਕੋਰਟ ਨੇ ਕਿਹਾ ਕਿ ਉਹ ਸੀ ਵੀ ਸੀ ਸਮੇਤ ਕਿਸੇ ਵੀ ਧਿਰ ਦਾ ਪੱਖ ਨਹੀਂ ਸੁਣੇਗੀ ਅਤੇ ਆਪਣੇ ਆਪ ਨੂੰ ਲੀਕ ਕੀਤੇ ਗਏ ਸਿਨਹਾ ਦੇ ਮੁਕੱਦਮੇ ਤੱਕ ਸੀਮਤ ਰੱਖੇਗੀ। ਬੈਂਚ ਵਿਚ ਜਸਟਿਸ ਐਸ ਕੇ ਕੌਲ ਅਤੇ ਜਸਟਿਸ ਕੇ ਐਮ ਜੋਜ਼ੇਫ ਸ਼ਾਮਲ ਹਨ। ਅਦਾਲਤ ਨੇ ਸੁਣਵਾਈ ਸ਼ੁਰੂ ਹੁੰਦੇ ਸਾਰ ਸਬੰਧਤ ਧਿਰਾਂ ਨੂੰ ਚੇਤੇ ਕਰਾਇਆ ਕਿ ਉਸ ਨੇ ਆਪਣੇ ਪਹਿਲੇ ਹੁਕਮ ਵਿਚ ਸੀ ਵੀ ਸੀ ਦੀ ਮੁੱਢਲੀ ਜਾਂਚ ਰਿਪੋਰਟ ਤੇ ਆਲੋਕ ਵਰਮਾ ਦਾ ਜਵਾਬ ਗੁਪਤ ਰੱਖਣ ਨੂੰ ਕਿਹਾ ਸੀ ਤਾਂ ਕਿ ਸੀ ਬੀ ਆਈ ਦਾ ਵੱਕਾਰ ਬਚਿਆ ਰਹੇ। ਕੋਰਟ ਨੇ ਇਕ ਨਿਊਜ਼ ਪੋਰਟਲ ਉਤੇ ਛਪੇ ਲੇਖ ਦਾ ਹਵਾਲਾ ਦੇ ਕੇ ਆਲੋਕ ਵਰਮਾ ਦੇ ਵਕੀਲ ਸੀਨੀਅਰ ਐਡਵੋਕੇਟ ਫਲੀ ਐਸ ਨਰੀਮਨ ਕੋਲੋਂ ਪੁੱਛਿਆ, ‘ਆਲੋਕ ਵਰਮਾ ਦੇ ਵਕੀਲ ਵਜੋਂ ਨਹੀਂ, ਤੁਸੀਂ ਇਸ ਸੰਸਥਾ ਦੇ ਸਭ ਤੋਂ ਸਤਿਕਾਰਤ ਤੇ ਸੀਨੀਅਰ ਮੈਂਬਰ ਹੋ। ਅਸੀਂ ਇਹ ਤੁਹਾਨੂੰ ਦਿੱਤਾ ਹੈ। ਕ੍ਰਿਪਾ ਕਰ ਕੇ ਸਾਡੀ ਮਦਦ ਕਰੋ।` ਇਸ ਉੱਤੇ ਨਰੀਮਨ ਨੇ ਕਿਹਾ ਕਿ ਲੀਕੇਜ ਬੜੀ ਪ੍ਰੇਸ਼ਾਨ ਕਰਨ ਵਾਲੀ ਹੈ ਤੇ ਉਨ੍ਹਾਂ ਆਲੋਕ ਵਰਮਾ ਦੇ ਦੂਜੇ ਵਕੀਲ ਗੋਪਾਲ ਸ਼ੰਕਰਨਰਾਇਣਨ ਵੱਲ ਉਂਗਲ ਕੀਤੀ। ਬੈਂਚ ਨੇ ਨਰੀਮਨ ਨੂੰ ਮੀਡੀਆ ਰਿਪੋਰਟ ਦੀ ਕਾਪੀ ਦੇਣ ਦੇ ਬਾਅਦ ਵਰਮਾ ਵਲੋਂ ਦਾਇਰ ਅਪੀਲ `ਤੇ ਸੁਣਵਾਈ 29 ਨਵੰਬਰ ਤੱਕ ਮੁਲਤਵੀ ਕਰ ਦਿੱਤੀ।
ਇਸ ਤੋਂ ਬਾਅਦ ਨਰੀਮਨ ਫਿਰ ਅਦਾਲਤ ਵਿਚ ਗਏ ਅਤੇ ਕੇਸ ਦਾ ਹਵਾਲਾ ਦਿੰਦਿਆਂ ਸੁਣਵਾਈ ਦੀ ਮੰਗ ਕੀਤੀ। ਦੋਬਾਰਾ ਸੁਣਵਾਈ ਸ਼ੁਰੂ ਹੋਣ `ਤੇ ਨਰੀਮਨ ਨੇ ਕਿਹਾ ਕਿ ਸਬੰਧਤ ਲੇਖ 17 ਨਵੰਬਰ ਨੂੰ ਛਪਿਆ ਸੀ ਤੇ ਇਹ ਮੁਢਲੀ ਜਾਂਚ ਦੌਰਾਨ ਸੀ ਵੀ ਸੀ ਨੂੰ ਦਿੱਤੇ ਵਰਮਾ ਦੇ ਜਵਾਬ ਨਾਲ ਸਬੰਧਤ ਸੀ, ਪਰ ਸੀ ਬੀ ਆਈ ਮੁਖੀ ਨੂੰ ਵਿਜੀਲੈਂਸ ਦੀ ਜਾਂਚ ਬਾਰੇ ਦਿੱਤਾ ਹੁਕਮ ਕੱਲ੍ਹ ਜਾਰੀ ਹੋਇਆ ਸੀ। ਉਨ੍ਹਾਂ ਇਸ ਬਾਰੇ ਸੰਬੰਧਤ ਪੱਤਰਕਾਰ ਨੂੰ ਕੋਰਟ ਵਿਚ ਸੱਦੇ ਜਾਣ ਦੀ ਮੰਗ ਕੀਤੀ। ਚੀਫ ਜਸਟਿਸ ਨੇ ਕੌੜ ਜ਼ਾਹਰ ਕਰਦਿਆਂ ਕਿਹਾ ਕਿ ਕੱਲ੍ਹ ਅਸੀਂ ਸਿਨਹਾ ਦੀ ਅਪੀਲ ਉਤੇ ਫੌਰੀ ਸੁਣਵਾਈ ਤੋਂ ਨਾਂਹ ਕਰ ਕੇ ਬਹੁਤ ਜ਼ਿਆਦਾ ਗੁਪਤਤਾ ਵਰਤਣ ਦੀ ਇੱਛਾ ਜ਼ਾਹਰ ਕੀਤੀ ਸੀ, ਪਰ ਅਪੀਲ ਕਰਤਾ ਨੇ ਸਾਨੂੰ ਅਰਜ਼ੀ ਦੇਣ ਪਿੱਛੋਂ ਹਰ ਕਿਸੇ ਨੂੰ ਕਾਪੀਆਂ ਵੰਡ ਦਿੱਤੀਆਂ। ਜਦੋਂ ਸੀ ਵੀ ਸੀ ਵੱਲੋਂ ਸਾਲਿਸਟਰ ਜਨਰਲ ਤੁਸ਼ਾਰ ਮਹਿਤਾ ਬੋਲਣ ਨੂੰ ਉੱਠੇ ਤਾਂ ਬੈਂਚ ਨੇ ਸਾਫ਼ ਕਿਹਾ: ‘ਅਸੀਂ ਕੁਝ ਨਹੀਂ ਸੁਣਾਂਗੇ। ਅਸੀਂ ਕਿਸੇ ਨੂੰ ਨਹੀਂ ਸੁਣਾਂਗੇ।’ ਅਦਾਲਤ ਨੇ ਆਲੋਕ ਵਰਮਾ ਦੇ ਦੂਜੇ ਵਕੀਲ ਸ਼ੰਕਰਨਰਾਇਣਨ ਦਾ ਪੱਖ ਵੀ ਸੁਣਨ ਤੋਂ ਇਨਕਾਰ ਕਰ ਦਿੱਤਾ।
ਇਸ ਦੌਰਾਨ ਇਸ ਲੇਖ ਬਾਰੇ ਨਿਊਜ਼ ਪੋਰਟਲ ‘ਦਿ ਵਾਇਰ` ਨੇ ਸਾਫ ਕੀਤਾ ਹੈ ਕਿ ਇਹ ਸੀ ਵੀ ਸੀ ਦੇ ਸਵਾਲਾਂ ਬਾਰੇ ਆਲੋਕ ਵਰਮਾ ਦੇ ਜਵਾਬ ਨਾਲ ਸਬੰਧਤ ਸੀ। ਇਹ ਸੀਲਬੰਦ ਲਿਫਾਫੇ ਵਿਚ ਨਹੀਂ ਦਿੱਤੇ ਗਏ ਸਨ ਤੇ ਨਾ ਸੁਪਰੀਮ ਕੋਰਟ ਨੂੰ ਦਿੱਤੇ ਗਏ ਸਨ। ਜਿੱਥੋਂ ਤੱਕ ਸੀ ਵੀ ਸੀ ਦੀ ਅੰਤਮ ਰਿਪੋਰਟ ਬਾਰੇ ਸੀਲਬੰਦ ਲਿਫਾਫੇ ਵਿਚ ਦਾਖ਼ਲ ਕੀਤੇ ਉਨ੍ਹਾਂ ਦੇ ਜਵਾਬ ਦਾ ਸੰਬੰਧ ਹੈ, ਉਸ ਬਾਰੇ ਅਸੀਂ ਕੋਈ ਟੀਕਾ ਟਿੱਪਣੀ ਨਹੀਂ ਕੀਤੀ।