ਸ੍ਰੀਨਗਰ, 18 ਸਤੰਬਰ (ਪੋਸਟ ਬਿਊਰੋ)- ਜੰਮੂ-ਕਸ਼ਮੀਰ ਦੀ ਰਾਜਧਾਨੀ ਸ੍ਰੀਨਗਰ ਸ਼ਹਿਰ ਦੇ ਸੰਘਣੀ ਆਬਾਦੀ ਵਾਲੇ ਇਲਾਕੇ ਵਿੱਚ ਕੱਲ੍ਹ ਤੜਕੇ ਸੁਰੱਖਿਆ ਬਲਾਂ ਨਾਲ ਹੋਏ ਮੁਕਾਬਲੇ ਵਿੱਚ ਤਿੰਨ ਸਥਾਨਕ ਅੱਤਵਾਦੀ ਮਾਰੇ ਗਏ ਅਤੇ ਇਸ ਮੁਕਾਬਲੇ ਵਿੱਚ ਦੁਪਾਸੜ ਗੋਲੀਬਾਰੀ ਵਿੱਚ ਇੱਕ ਔਰਤ ਵੀ ਮਾਰੀ ਗਈ, ਜਦ ਕਿ ਸੀ ਆਰ ਪੀ ਐਫ ਦਾ ਇੱਕ ਸਹਾਇਕ ਕਮਾਂਡੈਟ ਅਤੇ ਇੱਕ ਜਵਾਨ ਜ਼ਖ਼ਮੀ ਹੋ ਗਿਆ।
ਪੁਲਸ ਸੂਤਰਾਂ ਨੇ ਦੱਸਿਆ ਕਿ ਮੁਕਾਬਲੇ ਦੌਰਾਨ ਮਾਰੇ ਗਏ ਅੱਤਵਾਦੀ ਸ੍ਰੀਨਗਰ ਵਿੱਚ ਸੁਰੱਖਿਆ ਬਲਾਂ ਦੇ ਜਵਾਨਾਂ ਦੀ ਹੱਤਿਆ ਵਿੱਚ ਸ਼ਾਮਲ ਸਨ। ਜੰਮੂ-ਕਸ਼ਮੀਰ ਪੁਲਸ ਦੇ ਸਪੈਸ਼ਲ ਆਪ੍ਰੇਸ਼ਨ ਗਰੁੱਪ (ਐਸ ਓ ਜੀ) ਅਤੇ ਸੀ ਆਰ ਪੀ ਐਫ ਦੀ 117 ਬਟਾਲੀਅਨ ਨੇ ਅੱਧੀ ਰਾਤ ਨੂੰ ਕਰੀਬ ਦੋ ਵਜੇ ਸ੍ਰੀਨਗਰ ਦੇ ਬਟਮਾਲੂ ਦੇ ਫਿਰਦੌਸਬਾਦ ਕਾਲੋਨੀ ਵਿੱਚ ਪੱਕੀ ਸੂਚਨਾ ਉੱਤੇ ਕਾਰਵਾਈ ਕਰਦਿਆਂ ਉਸ ਮਾਕਨ ਨੂੰ ਘੇਰ ਲਿਆ, ਜਿੱਥੇ ਅੱਤਵਾਦੀ ਲੁਕੇ ਸਨ ਅਤੇ ਅੱਤਵਾਦੀਆਂ ਨੂੰ ਆਤਮ-ਸਮਰਪਣ ਕਰਨ ਲਈ ਕਿਹਾ, ਜਿਸ ਦਾ ਜਵਾਬ ਗੋਲੀਬਾਰੀ ਨਾਲ ਦੇ ਕੇ ਅੱਤਵਾਦੀਆਂ ਨੇ ਫਰਾਰ ਹੋਣ ਦੀ ਕੋਸ਼ਿਸ਼ ਕੀਤੀ, ਪਰ ਉਹ ਸੁਰੱਖਿਆ ਬਲਾਂ ਦਾ ਘੇਰੇ ਨੂੰ ਤੋੜਨ ਵਿੱਚ ਨਾਕਾਮ ਰਹੇ। ਕੱਲ੍ਹ ਸਵੇਰ ਤੱਕ ਤਕਰੀਬਨ ਛੇ ਘੰਟਿਆਂ ਦੇ ਇਸ ਮਕਾਬਲੇ ਪਿੱਛੋਂ ਤਲਾਸ਼ੀ ਦੌਰਾਨ ਤਿੰਨ ਅੱਤਵਾਦੀਆਂ ਦੀਆਂ ਲਾਸ਼ਾਂ ਤੇ ਭਾਰੀ ਅਸਲਾ ਮਿਲਿਆ ਹੈ। ਇਹ ਅੱਤਵਾਦੀ ਦੱਖਣੀ ਕਸ਼ਮੀਰ ਨਾਲ ਸੰਬਧਿਤ ਸਨ, ਜਿਨ੍ਹਾਂ ਵਿੱਚੋਂ ਜ਼ਾਕਿਰ ਅਹਿਮਦ ਪਾਲ ਵਾਸੀ ਆਲੋਰਾ ਇਮਾਮ ਸਾਹਿਬ ਸ਼ੋਪੀਆਂ, ਮੁਸ਼ਤਾਕ ਅਹਿਮਦ ਭੱਟ ਵਾਸੀ ਭਦਰਗੁੰਡ ਕੁਲਗਾਮ ਦੋਵੇਂ ਹਿਜ਼ਬੁਲ ਨਾਲ ਸੰਬੰਧਤ ਹਨ ਅਤੇ ਆਦਿਲ ਹੁਸੈਨ ਭੱਟ ਵਾਸੀ ਭੱਟਪੋਰਾ ਅਵੰਤੀਪੋਰਾ ਅਲ-ਬਦਰ ਸੰਗਠਨ ਨਾਲ ਸਬੰਧਿਤ ਸੀ। ਇਸ ਮੁਕਾਬਲੇ ਦੌਰਾਨ ਸੀ ਆਰ ਪੀ ਐਫ ਦਾ ਸਹਾਇਕ ਕਮਾਂਡੈਂਟ ਰਾਹੁਲ ਕੁਮਾਰ ਅਤੇ ਇੱਕ ਜਵਾਨ ਤੋਂ ਇਲਾਵਾ ਇੱਕ ਔਰਤ ਕੋਸਰ ਰਿਆਜ਼ (45) ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਨੂੰ ਸ੍ਰੀਨਗਰ ਦੇ 92 ਬੇਸ ਹਸਪਤਾਲ ਬਾਦਾਮੀਬਾਗ ਭਰਤੀ ਕਰਾਇਆ ਸੀ, ਪਰ ਜ਼ਖ਼ਮੀ ਔਰਤ ਦੀ ਸ੍ਰੀਨਗਰ ਦੇ ਸਰਕਾਰੀ ਹਸਪਤਾਲ ਲਿਜਾਣ ਦੌਰਾਨ ਮੌਤ ਹੋ ਗਈ। ਮੁਕਾਬਲੇ ਵਾਲੇ ਥਾਂ ਉੱਤੇ ਸਥਾਨਕ ਲੋਕਾਂ ਨੇ ਰੋਸ ਪ੍ਰਦਰਸ਼ਨ ਕਰਦਿਆਂ ਪੁਲਸ ਉੱਤੇ ਭਾਰੀ ਪਥਰਾਅ ਕੀਤਾ, ਜਿਨ੍ਹਾਂ ਨੂੰ ਭਜਾਉਣ ਲਈ ਪੁਲਸ ਨੂੰ ਅੱਥਰੂ ਗੈਸ ਦੇ ਗੋਲੇ ਸੁੱਟੇ ਤੇ ਲਾਠੀਚਾਰਜ ਕੀਤਾ ਸੀ।