ਚੇਨਈ, 18 ਸਤੰਬਰ (ਪੋਸਟ ਬਿਊਰੋ)- ਤਾਮਿਲ ਨਾਡੂ ਵਿੱਚ ਪ੍ਰਧਾਨ ਮੰਤਰੀ ਕਿਸਾਨ ਫੰਡ ਸਨਮਾਨ ਯੋਜਨਾ ਵਿੱਚ 110 ਕਰੋੜ ਦਾ ਘਪਲਾ ਨਿਕਲਣ ਪਿੱਛੋਂ ਸੀ ਬੀ ਆਈ ਦੀ ਕਾਰਵਾਈ ਜਾਰੀ ਹੈ।
ਜਾਣਕਾਰ ਸੂਤਰਾਂ ਅਨੁਸਾਰ ਜਾਂਚ ਵਿੱਚ ਪਤਾ ਲੱਗਾ ਹੈ ਕਿ ਤਾਮਿਲ ਨਾਡੂ ਦੇ 13 ਪੱਛਮੀ ਜ਼ਿਲ੍ਹਿਆਂ ਵਿੱਚ ਠੱਗਾਂ ਨੇ ਘੋਟਾਲਾ ਕੀਤਾ ਹੈ। ਠੱਗਾਂ ਨੇ ਪੰਜ ਲੱਖ ਤੋਂ ਵੱਧ ਅਯੋਗ ਲੋਕਾਂ ਦੇ ਖਾਤਿਆਂ ਵਿੱਚ 110 ਕਰੋੜ ਰੁਪਏ ਟਰਾਂਸਫਰ ਕਰਾਏ ਹਨ। ਇਸ ਦੇ ਲਈ ਖੇਤੀ ਵਿਭਾਗ ਦੇ ਅਫਸਰਾਂ ਨਾਲ ਮਿਲੀ ਭੁਗਤ ਕੀਤੀ ਗਈ। ਇਹ ਪੈਸੇ ਅਜਿਹੇ ਲੋਕਾਂ ਦੇ ਖਾਤੇ ਵਿੱਚ ਟਰਾਂਸਫਰ ਹੋਏ ਹਨ, ਜੋ ਖੇਤੀ ਨਹੀਂ ਕਰਦੇ। ਇਨ੍ਹਾਂ ਵਿੱਚ ਕਈ ਸਰਕਾਰੀ ਕਰਮਚਾਰੀ ਵੀ ਹਨ। ਚੇਨਈ ਨਗਰ ਨਿਗਮ ਦੇ ਇਲਾਕੇ ਅੰਬ ਬੁੱਟਰ, ਮਡੁਰਾ ਵੋਇਲ ਅਤੇ ਤਿਰੂ ਵੋਟਿਆਰ ਵਿੱਚ ਵੀ ਹਜ਼ਾਰਾਂ ਲੋਕਾਂ ਦੇ ਖਾਤਿਆਂ ਵਿੱਚ ਪੈਸੇ ਪਹੁੰਚੇ, ਜਿੱਥੇ ਖੇਤੀ ਜ਼ਮੀਨ ਨਾ ਹੋਣ ਬਰਾਬਰ ਹਨ। ਠੱਗਾਂ ਨੇ ਖੇਤੀ ਅਧਿਕਾਰੀਆਂ ਦੀ ਲਾਗ ਇਨ ਅਤੇ ਪਾਸਵਰਡ ਦਾ ਵਰਤ ਕੇ ਫਰਜ਼ੀ ਐਂਟਰੀ ਕੀਤੀ ਸੀ ਅਤੇ ਇਸ ਤਰ੍ਹਾਂ ਸਾਰੀ ਠੱਗੀ ਕੀਤੀ ਗਈ ਸੀ।
ਖੇਤੀ ਵਿਭਾਗ ਦੇ ਸਹਾਇਕ ਡਾਇਰੈਕਟਰਾਂ ਦੇ ਦਫਤਰਾਂ ਵਿਚ ਡਾਟਾ ਐਂਟਰੀ ਦੇ ਕੁਝ ਫੀਲਡ ਅਫਸਰਾਂ ਨੂੰ ਨਿੱਜੀ ਕੰਪਿਊਟਰ ਕੇਂਦਰਾਂ ਨਾਲ ਜੋੜਿਆ ਗਿਆ ਸੀ। ਇਸ ਦਾ ਫਾਇਦਾ ਉਠਾ ਕੇ ਇੰਟਰਨੈਟ ਕੇਂਦਰਾਂ ਵਿੱਚ ਬੈਠੇ ਠੱਗਾਂ ਨੇ ਖੇਤੀ ਅਫਸਰਾਂ ਦੇ ਲਾਗ ਇਨ ਅਤੇ ਪਾਸਵਰਡ ਦੀ ਵਰਤੋਂ ਕਰ ਕੇ ਅਯੋਗ ਲੋਕਾਂ ਦੇ ਖਾਤੇ ਖੋਲ੍ਹੇ। ਉਨ੍ਹਾਂ ਨੇ ਇਹੋ ਜਿਹੇ ਲੋਕਾਂ ਨੂੰ ਕਿਹਾ ਕਿ ਉਨ੍ਹਾਂ ਦੇ ਖਾਤੇ ਕੇਂਦਰ ਦੀ ਯੋਜਨਾ ਨਾਲ ਜੋੜ ਰਹੇ ਹਨ, ਜਿਸ ਵਿੱਚ ਉਨ੍ਹਾਂ ਨੂੰ ਹਰ ਚਾਰ ਮਹੀਨੇ ਮਗਰੋਂ ਕੋਰੋਨਾ ਮਨੀ ਵਜੋਂ 2000 ਰੁਪਏ ਮਿਲਣਗੇ, ਇਸ ਦੇ ਬਦਲੇ ਠੱਗਾਂ ਨੇ ਹਰ ਖਾਤੇ `ਚੋਂ 1500 ਰੁਪਏ ਵਸੂਲੇ। ਵਿਲੁਪੁਰਮ ਜ਼ਿਲੇ ਵਿੱਚ ਸਭ ਤੋਂ ਜ਼ਿਆਦਾ ਨੱਬੇ ਹਜ਼ਾਰ ਗਲਤ ਲੋਕਾਂਂ ਦੀ ਪਛਾਣ ਹੋਈ ਹੈ।
ਤਾਮਿਲ ਨਾਡੂ ਦੇ ਖੇਤੀ ਸੈਕਟਰੀ ਗਗਨਦੀਪ ਸਿੰਘ ਮੁਤਾਬਕ ਇਸ ਦਾ ਖੁਲਾਸਾ ਉਸ ਵਕਤ ਹੋਇਆ, ਜਦ ਖੇਤੀ ਅਫਸਰਾਂ ਦੀ ਨਜ਼ਰ ਪੀ ਐਮ ਫੰਡ ਯੋਜਨਾ ਦੇ ਲਾਭ ਪਾਤਰੀਆਂ ਦੀ ਗਿਣਤੀ ਇਕਦਮ ਵਧਣ ਉੱਤੇ ਪਈ। ਮਾਰਚ ਵਿੱਚ ਕਰੀਬ 3 ਲੱਖ ਲਾਭ ਪਾਤਰੀ ਸਨ। ਇਹ ਅਗਸਤ ਦੇ ਆਖਰੀ ਹਫਤੇ ਵਿੱਚ ਪੰਜ ਲੱਖ ਤੋਂ ਵਧ ਕੇ 45 ਲੱਖ ਹੋ ਗਏ। ਸੀ ਬੀ, ਸੀ ਆਈ ਡੀ ਨੇ ਇਸ ਸਕੀਮ ਦੀ ਰਾਸ਼ੀ ਲੈਣ ਵਾਲੇ ਜ਼ਿਆਦਾਤਰ ਲੋਕਾਂ ਨੂੰ ਨੋਟਿਸ ਜਾਰੀ ਕੀਤਾ ਹੈ ਅਤੇ ਅੱਸੀ ਅਫਸਰ ਸਸਪੈਂਡ ਕੀਤੇ ਜਾ ਚੁੱਕੇ ਹਨ, ਜਦ ਕਿ 18 ਲੋਕਾਂ ਦੀ ਗ੍ਰਿਫਤਾਰੀ ਕੀਤੀ ਗਈ ਹੈ।