ਜੈਪੁਰ, 17 ਸਤੰਬਰ (ਪੋਸਟ ਬਿਊਰੋ)- ਰਾਜਸਥਾਨ ਦੇ ਕੋਟਾ ਜ਼ਿਲ੍ਹੇ ਵਿੱਚ ਚੰਬਲ ਨਦੀ `ਚ ਕਿਸ਼ਤੀ ਡੁੱਬ ਗਈ ਤੇ ਕਰੀਬ 35 ਲੋਕਾਂ ਵਿੱਚੋਂ 12 ਦੀ ਮੌਤ ਹੋ ਗਈ। ਮ੍ਰਿਤਕਾਂ ਵਿੱਚ ਸੱਤ ਮਰਦ, ਚਾਰ ਔਰਤਾਂ ਅਤੇ ਇੱਕ ਬੱਚਾ ਸ਼ਾਮਲ ਸਨ। ਹਾਦਸੇ ਵਿੱਚ ਚਾਰ ਲੋਕ ਲਾਪਤਾ ਵੀ ਹੋ ਗਏ ਦੱਸੇ ਜਾ ਰਹੇ ਹਨ।
ਇਸ ਹਾਦਸੇ ਦੀ ਸੂਚਨਾ ਮਿਲਦੇ ਸਾਰ ਜ਼ਿਲ੍ਹਾ ਕੁਲੈਕਟਰ ਉਜਵਲ ਰਾਠੌਰ ਤੇ ਪੁਲਸ ਅਧਿਕਾਰੀ ਸ਼ਰਦ ਚੌਧਰੀ ਨੇ ਮੌਕੇ `ਤੇ ਪੁੱਜ ਕੇ ਬਚਾਅ ਕਾਰਜਾਂ ਦੀ ਨਿਗਰਾਨੀ ਕੀਤੀ। ਜ਼ਿਲ੍ਹਾ ਪ੍ਰਸ਼ਾਸਨ ਦੇ ਮੁਤਾਬਕ ਇਹ ਹਾਦਸਾ ਕੱਲ੍ਹ ਸਵੇਰੇ ਕਰੀਬ ਨੌਂ ਵਜੇ ਗੋਠੜਾ ਕਲਾ ਪਿੰਡ ਵਿੱਚ ਹੋਇਆ। ਇਸ ਦੇ ਸ਼ਿਕਾਰ ਹੋਏ ਲੋਕ ਪੁਰਾਣੀ ਖਰਾਬ ਕਿਸ਼ਤੀ ਵਿੱਚ ਸਵਾਰ ਹੋ ਕੇ ਨੇੜੇ ਕਮਲੇਸ਼ਵਰ ਧਾਮ ਮੰਦਰ ਵਿੱਚ ਦਰਸ਼ਨਾਂ ਨੂੰ ਜਾ ਰਹੇ ਸਨ। ਕਿਸ਼ਤੀ ਵਿੱਚ ਸਮਰੱਥਾ ਤੋਂ ਵੱਧ ਲੋਕ ਸਵਾਰ ਸਨ। ਇਸ ਤੋਂ ਇਲਾਵਾ ਦਸ ਮੋਟਰ ਸਾਈਕਲਾਂ ਸਮੇਤ ਹੋਰ ਸਾਮਾਨ ਵੀ ਰੱਖਿਆ ਹੋਇਆ ਸੀ, ਜਿਸ ਨਾਲ ਕਿਸ਼ਤੀ ਨਦੀ ਵਿੱਚ ਕੁਝ ਦੂਰ ਜਾ ਕੇ ਡਾਵਾਂਡੋਲ ਹੋਈ ਤੇ ਪਲਟ ਗਈ। ਲੋਕ ਨਦੀ ਦੇ ਤੇਜ਼ ਵਹਾਅ `ਚ ਰੁੜ੍ਹ ਗਏ। ਇਨ੍ਹਾਂ `ਚੋਂ ਦੋ ਜਣੇ ਤਰ ਕੇ ਬਾਹਰ ਆ ਗਏ। ਇਸ ਤੋਂ ਬਾਅਦ ਹਾਦਸੇ ਦੀ ਸੂਚਨਾ ਪ੍ਰਸ਼ਾਸਨ ਨੂੰ ਦਿੱਤੀ ਗਈ। ਸੂਚਨਾ ਮਿਲਦੇ ਸਾਰ ਕੋਟਾ ਤੋਂ ਬਚਾਅ ਲਈ ਟੀਮ ਭੇਜੀ ਗਈ। ਗੋਤਾਖੋਰਾਂ ਨੇ 19 ਲੋਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ। 12 ਲੋਕਾਂ ਦੀਆਂ ਲਾਸ਼ਾਂ ਕੱਢੀਆਂ ਗਈਆਂ।