* ਹੀਰੋ ਨਾਲ ਸੌਣ ਪਿੱਛੋਂ ਮਿਲਦੀ ਸੀ ਦੋ ਮਿੰਟ ਦੇ ਰੋਲ ਵਾਲੀ ਥਾਲੀ
ਨਵੀਂ ਦਿੱਲੀ, 17 ਸਤੰਬਰ (ਪੋਸਟ ਬਿਊਰੋ)- ਰਾਜ ਸਭਾ `ਚ ਜਯਾ ਬੱਚਨ ਦੇ ਬਿਆਨ ‘ਜਿਸ ਥਾਲੀ ਵਿੱਚ ਖਾਂਦੇ ਹੋ, ਉਸ ਵਿੱਚ ਛੇਕ ਕਰਦੇ ਹੋ` ਨੂੰ ਲੈ ਕੇ ਇੱਕ ਵਾਰ ਫਿਰ ਕੰਗਣਾ ਰਣੌਤ ਨੇ ਸਿੱਧਾ ਹਮਲਾ ਬੋਲਿਆ ਹੈ।
ਕੰਗਣਾ ਨੇ ਟਵੀਟ ਕੀਤਾ ਕਿ ‘ਬਾਲੀਵੁੱਡ ਵਿੱਚ ਅਭਿਨੇਤਰੀ ਨੂੰ ਦੋ ਮਿੰਟ ਦੇ ਰੋਲ ਵਿੱਚ ਆਈਟਮ ਨੰਬਰ ਅਤੇ ਰੋਮਾਂਟਿਕ ਸੀਨ ਮਿਲਦੇ ਹਨ। ਕਿਹੜੀ ਥਾਲੀ ਦਿੱਤੀ ਹੈ ਜਯਾ ਜੀ ਅਤੇ ਉਨ੍ਹਾਂ ਦੀ ਇੰਡਸਟਰੀ ਨੇ? ਇੱਕ ਥਾਲੀ ਮਿਲਦੀ ਸੀ, ਜਿਸ ਵਿੱਚ ਦੋ ਮਿੰਟ ਦੇ ਰੋਲ `ਚ ਆਈਟਮ ਨੰਬਰ ਅਤੇ ਇੱਕ ਰੋਮਾਂਟਿਕ ਸੀਨ ਮਿਲਦਾ ਸੀ, ਉਹ ਵੀ ਹੀਰੋ ਦੇ ਨਾਲ ਸੌਣ ਤੋਂ ਬਾਅਦ। ਮੈਂ ਇਸ ਇੰਡਸਟਰੀ ਨੂੰ ਫੈਮਿਨਿਜਮ ਸਿਖਾਇਆ, ਦੇਸ਼ਭਗਤੀ, ਨਾਰੀ ਪ੍ਰਧਾਨ ਫਿਲਮਾਂ ਨਾਲ ਥਾਲੀ ਸਜਾਈ, ਇਹ ਮੇਰੀ ਆਪਣੀ ਥਾਲੀ ਹੈ, ਜਯਾ ਜੀ ਤੁਹਾਡੀ ਨਹੀਂ।’
ਮੁੰਬਈ ਤੋਂ ਸ਼ਿਵ ਸੈਨਾ ਨੇ ਰਾਜ ਸਭਾ ਮੈਂਬਰ ਅਤੇ ਅਭਿਨੇਤਰੀ ਜਯਾ ਬੱਚਨ ਦਾ ਸਮਰਥਨ ਕੀਤਾ ਹੈ। ਸ਼ਿਵ ਸੈਨਾ ਨੇ ਆਪਣੇ ਮੁੱਖ ਪੱਤਰ ਸਾਮਨਾ ਵਿੱਚ ਕਿਹਾ ਕਿ ਜਿਹੜੇ ਬਾਲੀਵੁੱਡ ਉੱਤੇ ਨਸ਼ੀਲੇ ਪਦਾਰਥਾਂ ਦੀ ਵਰਤੋਂ ਦੇ ਦੋਸ਼ ਲਾਉਂਦੇ ਹਨ, ਉਹ ਪਾਖੰਡੀ ਹਨ ਤੇ ਉਨ੍ਹਾਂ ਦੇ ਬਿਆਨ ਦੋਹਰੇ ਮਾਪ ਦੰਡਾਂ ਵਾਲੇ ਹੁੰਦੇ ਹਨ। ਜਯਾ ਬੱਚਨ ਦੇ ਵਿਚਾਰਾਂ ਦਾ ਸਮਰਥਨ ਕਰਦੇ ਹੋਏ ਮਰਾਠੀ ਅਖਬਾਰ ਸਾਮਨਾ ਨੇ ਕਿਹਾ ਕਿ ਉਨ੍ਹਾਂ ਸਾਰੇ ਲੋਕਾਂ ਦਾ ਡੋਪ ਟੈਸਟ ਕੀਤਾ ਜਾਣਾ ਚਾਹੀਦਾ ਹੈ ਜੋ ਕਹਿੰਦੇ ਹਨ ਕਿ ਫਿਲਮ ਜਗਤ `ਚ ਸਾਰੇ ਕਲਾਕਾਰ ਤੇ ਟੈਕਨੀਸ਼ੀਅਨ ਨਸ਼ੀਲੇ ਪਦਾਰਥ ਦੇ ਪ੍ਰਭਾਵ `ਚ ਰਹਿੰਦੇ ਹਨ।
ਪਾਰਲੀਮੈਂਟ `ਚ ਜਯਾ ਬੱਚਨ ਵੱਲੋਂ ਦਿੱਤੇ ਬਿਆਨ ਤੋਂ ਬਾਅਦ ਅਮਿਤਾਭ ਬੱਚਨ ਦੇ ਜੁਹੂ ਵਾਲੇ ਘਰ ਦੇ ਬਾਹਰ ਦੀ ਸੁਰੱਖਿਆ ਹੋਰ ਪੱਕੀ ਕਰ ਦਿੱਤੀ ਗਈ ਹੈ। ਸੋਸ਼ਲ ਮੀਡੀਆ `ਤੇ ਯੂਜ਼ਰਸ ਜਿਵੇਂ ਜਯਾ ਬੱਚਨ ਦੇ ਬਿਆਨ ਪਿੱਛੋਂ ਅਮਿਤਾਭ ਬੱਚਨ ਅਤੇ ਉਨ੍ਹਾਂ ਦੇ ਪਰਵਾਰ `ਤੇ ਟਿੱਪਣੀਆਂ ਕਰ ਰਹੇ ਹਨ, ਉਸ ਨੂੰ ਦੇਖਦੇ ਹੋਏ ਇਹ ਕਦਮ ਚੁੱਕਿਆ ਗਿਆ ਹੈ।