ਨਾਮਪੇਨਹ, 20 ਨਵੰਬਰ (ਪੋਸਟ ਬਿਊਰੋ)- ਪਿਛਲੇ 33 ਸਾਲਾਂ ਤੋਂ ਕੰਬੋਡੀਆ ਦੀ ਸੱਤਾ 'ਤੇ ਕਾਬਜ਼ ਪ੍ਰਧਾਨ ਮੰਤਰੀ ਹੁਨ ਸੇਨ ਨੇ ਅਮਰੀਕੀ ਚਿੰਤਾਵਾਂ ਨੂੰ ਦੂਰ ਕਰਦਿਆਂ ਕਿਹਾ ਹੈ ਕਿ ਕੰਬੋਡੀਆ ਦੀ ਧਰਤੀ 'ਤੇ ਚੀਨ ਦਾ ਸਮੁੰਦਰੀ ਫੌਜੀ ਅੱਡਾ ਨਹੀਂ ਬਣੇਗਾ। ਹੁਨ ਸੇਨ ਦਾ ਇਹ ਬਿਆਨ ਬੇਹੱਦ ਅਹਿਮ ਹੈ ਕਿਉਂਕਿ ਦੱਖਣੀ ਪੂਰਬੀ ਏਸ਼ਿਆਈ ਦੇਸ਼ਾਂ 'ਚ ਕੰਬੋਡੀਆ ਨੂੰ ਚੀਨ ਦਾ ਗਹਿਰਾ ਦੋਸਤ ਮੰਨਿਆ ਜਾਂਦਾ ਹੈ।
ਕੱਲ੍ਹ ਇਥੇ ਹੁਨ ਸੇਨ ਨੇ ਕਿਹਾ, ‘ਮੈਨੂੰ ਅਮਰੀਕਾ ਦੇ ਉਪ ਰਾਸ਼ਟਰਪਤੀ ਮਾਈਕ ਪੈਂਸ ਦਾ ਖਤ ਮਿਲਿਆ ਹੈ। ਇਸ ਵਿੱਚ ਉਨ੍ਹਾਂ ਨੇ ਕੰਬੋਡੀਆ 'ਚ ਚੀਨ ਦਾ ਸਮੁੰਦਰੀ ਫੌਜੀ ਅੱਡਾ ਬਣਾਏ ਜਾਣ ਬਾਰੇ ਚਿੰਤਾ ਜ਼ਾਹਿਰ ਕੀਤੀ ਹੈ। ਮੈਂ ਉਨ੍ਹਾਂ ਨੂੰ ਯਕੀਨ ਦਿਵਾਉਂਦਾ ਹਾਂ ਕਿ ਕੰਬੋਡੀਆ ਦੀ ਧਰਤੀ ਉੱਤੇ ਚੀਨ ਦਾ ਕਿਸੇ ਵੀ ਤਰ੍ਹਾਂ ਦਾ ਫੌਜੀ ਅੱਡਾ ਨਹੀਂ ਬਣੇਗਾ। ਸਾਡਾ ਸੰਵਿਧਾਨ ਇਸ ਦੀ ਇਜਾਜ਼ਤ ਨਹੀਂ ਦਿੰਦਾ।' ਅਸਲ 'ਚ ਅਮਰੀਕਾ ਦੀ ਚਿੰਤਾ ਵਪਾਰਕ ਲਿਹਾਜ਼ ਨਾਲ ਬੇਹੱਦ ਅਹਿਮ ਦੱਖਣੀ ਚੀਨ ਸਾਗਰ 'ਚ ਚੀਨ ਦੇ ਵਧਦੇ ਪ੍ਰਭਾਵ ਨੂੰ ਲੈ ਕੇ ਹੈ। ਦੱਖਣੀ ਚੀਨ ਸਾਗਰ ਦੇ ਵੱਡੇ ਹਿੱਸੇ 'ਤੇ ਚੀਨ ਆਪਣਾ ਹੱਕ ਜਤਾਉਂਦਾ ਹੈ ਤੇ ਇਸ ਖੇਤਰ ਦਾ ਹੌਲੀ-ਹੌਲੀ ਫੌਜੀਕਰਨ ਕਰ ਰਿਹਾ ਹੈ।