ਚੰਡੀਗੜ੍ਹ, 20 ਨਵੰਬਰ (ਪੋਸਟ ਬਿਊਰੋ)- ਭਾਰਤ ਵਿੱਚ ਚੱਲਦੇ ਅਮਰੀਕਨ ਅਤੇ ਬ੍ਰਿਟਿਸ਼ ਇੰਗਲਿਸ਼ ਦੇ ਵਿਵਾਦ ਉੱਤੇ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਫੈਸਲਾ ਕਰੇਗੀ। ਬ੍ਰਿਟਿਸ਼ ਅਤੇ ਅਮਰੀਕਨ ਇੰਗਲਿਸ਼ ਵਿੱਚ ਸਪੈਲਿੰਗਸ ਦੇ ਫਰਕ ਕਾਰਨ ਹੇਠਲੀ ਜੁਡੀਸ਼ਰੀ ਵਿੱਚ ਸਟੈਨੋਗਰਾਫਰ ਦੇ ਅਹੁਦੇ 'ਤੇ ਨਿਯੁਕਤੀ ਤੋਂ ਵਾਂਝੀ ਰਹਿ ਗਈ ਬਠਿੰਡਾ ਦੀ ਰਜਨੀ ਦੀ ਪਟੀਸ਼ਨ ਨਾਲ ਇੰਗਲਿਸ਼ ਲਿਖਣ ਦੇ ਇਨ੍ਹਾਂ ਤਰੀਕਿਆਂ ਦਾ ਵਿਵਾਦ ਹਾਈ ਕੋਰਟ ਪਹੁੰਚ ਗਿਆ ਹੈ।
ਪੰਜਾਬ ਵਿੱਚ ਹੇਠਲੀ ਜੁਡੀਸ਼ਰੀ ਵਿੱਚ ਸਟੈਨੋਗਰਾਫਰ ਦੀ ਪੋਸਟ ਲਈ ਅਪਲਾਈ ਕਰਨ ਵਾਲੀ ਰਜਨੀ ਨੇ ਆਪਣੀ ਪਟੀਸ਼ਨ ਵਿੱਚ ਕਿਹਾ ਹੈ ਕਿ ਉਨ੍ਹਾਂ ਦੇ ਸਟੈਨੋਗਰਾਫਰ ਟੈਸਟ ਵਿੱਚ ‘ਐਨਰੋਲਮੈਂਟ’ ਸ਼ਬਦ ਦੇ ਸਪੈਲਿੰਗ ਨੂੰ ਗਲਤ ਕਰਾਰ ਦਿੱਤੇ ਜਾਣ ਉੱਤੇ ਉਸ ਦੇ ਦੋ ਨੰਬਰ ਕੱਟ ਲਏ ਗਏ। ਇਸ ਕਾਰਨ ਉਹ ਸਟੈਨੋਗਰਾਫਰ ਗ੍ਰੇਡ ਤਿੰਨ ਵਿੱਚ ਨਿਯੁਕਤ ਨਹੀਂ ਹੋ ਸਕੀ। ਪਟੀਸ਼ਨ ਕਰਤਾ ਨੇ ਕਿਹਾ ਹੈ ਕਿ ਬ੍ਰਿਟਿਸ਼ ਇੰਗਲਿਸ਼ ਵਿੱਚ ਐਨਰੋਲਮੈਂਟ ਸ਼ਬਦ ਵਿੱਚ ਇੱਕ ‘ਐੱਲ’ ਵਰਤਿਆ ਜਾਂਦਾ ਹੈ, ਜਦ ਕਿ ਅਮਰੀਕਨ ਇੰਗਲਿਸ਼ ਵਿੱਚ ਦੋ ‘ਐੱਲ’ ਵਰਤੇ ਜਾਂਦੇ ਹਨ। ਉਸ ਨੇ ਕਿਹਾ ਕਿ ਇਹ ਦੋਵੇਂ ਸਪੈਲਿੰਗ ਠੀਕ ਹਨ ਅਤੇ ਇਨ੍ਹਾਂ ਦਾ ਅਰਥ ਇੱਕੋ ਹੈ। ਉਸ ਦੇ ਵਕੀਲ ਡਾਕਟਰ ਰਾਓ ਪੀ ਐੱਸ ਗਿਰਵਰ ਨੇ ਕਿਹਾ ਕਿ ਪਟੀਸ਼ਨਰ ਨੇ ਦਿਵਿਆਂਗ ਸ਼੍ਰੇਣੀ ਵਿੱਚ ਅਪਲਾਈ ਕੀਤਾ ਸੀ ਅਤੇ ਉਸ ਨੂੰ 34 ਨੰਬਰ ਦਿੱਤੇ ਗਏ, ਜਦ ਕਿ ਉਸ ਦੀ ਸ਼੍ਰੇਣੀ ਵਿੱਚ 36 ਨੰਬਰ ਲੈਣ ਵਾਲੇ ਬਿਨੈਕਾਰਾਂ ਨੂੰ ਨਿਯੁਕਤੀ ਮਿਲ ਗਈ ਹੈ। ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਵੱਲੋਂ ਲਿਖੇ ਸਹੀ ਸਪੈਲਿੰਗ ਨੂੰ ਗਲਤ ਮੰਨੇ ਜਾਣ ਨਾਲ ਉਸ ਦੇ ਦੋ ਨੰਬਰ ਕੱਟੇ ਗਏ। ਹਾਈ ਕੋਰਟ ਵਿੱਚ ਇਸ ਬਾਰੇ 26 ਨਵੰਬਰ ਨੂੰ ਸੁਣਵਾਈ ਹੋਵੇਗੀ।