ਬਠਿੰਡਾ, 18 ਨਵੰਬਰ (ਪੋਸਟ ਬਿਊਰੋ)- ਨਵੀਂ ਦਿੱਲੀ ਵਿੱਚ ਪੰਜਾਬ ਰੋਡਵੇਜ਼ ਅਤੇ ਪੀ ਆਰ ਟੀ ਸੀ ਦੀਆਂ ਬਸਾਂ ਦੇ ਚਲਾਨ ਕੱਟੇ ਜਾਣ ਪਿੱਛੋਂ ਪੰਜਾਬ ਸਰਕਾਰ ਨੇ ਬਾਦਲ ਪਰਵਾਰ ਦੀਆਂ ਬਸਾਂ ਸਮੇਤ ਸੂਬੇ ਦੀ ਟੂਰਿਸਟ ਬਸ ਕੰਪਨੀਆਂ ਦੀ ਦਿੱਲੀ ਏਅਰਪੋਰਟ ਉੱਤੇ ਜਾ ਰਹੀਆਂ ਸਾਰੀਆਂ ਬਸਾਂ 'ਤੇ ਸਖਤੀ ਸ਼ੁਰੂ ਕਰ ਦਿੱਤੀ ਹੈ। ਇਸ ਬਾਰੇ ਦਿੱਲੀ ਸਰਕਾਰ ਨੇ ਬਾਦਲ ਪਰਵਾਰ ਸਮੇਤ ਸਾਰੀਆਂ ਕੰਪਨੀਆਂ ਦੀਆਂ ਟੂਰਿਸਟ ਬਸਾਂ ਨੂੰ ਨੋਟਿਸ ਜਾਰੀ ਕੀਤੇ ਹਨ। ਇਨ੍ਹਾਂ ਨੋਟਿਸਾਂ ਵਿੱਚ ਸੱਤ ਦਿਨ ਵਿੱਚ ਸੰਬੰਧਤ ਰਿਕਾਰਡ ਪੇਸ਼ ਕਰਨ ਦਾ ਹੁਕਮ ਦਿੱਤਾ ਹੈ।
ਵਰਨਣ ਯੋਗ ਹੈ ਕਿ ਟੂਰਿਸਟ ਬਸਾਂ ਇੱਕ ਜਗ੍ਹਾ ਤੋਂ ਸਵਾਰੀਆਂ ਚੁੱਕ ਕੇ ਸਿੱਧਾ ਇੱਕੋ ਸਥਾਨ 'ਤੇ ਲਾਹ ਸਕਦੀਆਂ ਹਨ, ਪਰ ਮੰਨਿਆ ਜਾ ਰਿਹਾ ਹੈ ਕਿ ਜ਼ਿਆਦਾਤਰ ਕੰਪਨੀਆਂ ਦੀਆਂ ਟੂਰਿਸਟ ਬਸਾਂ ਜਿਨ੍ਹਾਂ-ਜਿਨ੍ਹਾਂ ਸ਼ਹਿਰਾਂ ਤੋਂ ਲੰਘਦੀਆਂ ਹਨ, ਉਨ੍ਹਾਂ ਸਭ ਥਾਵਾਂ ਤੋਂ ਸਵਾਰੀਆਂ ਲੈਂਦੀਆਂ ਹਨ। ਟਰਾਂਸਪੋਰਟ ਵਿਭਾਗ ਦੇ ਨਿਯਮਾਂ ਅਨੁਸਾਰ ਟੂਰਿਸਟ ਬਸ ਮਾਲਕਾਂ ਨੂੰ ਹਰ ਹਫਤੇ ਵਿਭਾਗ ਨੂੰ ਸਵਾਰੀਆਂ ਦੀ ਸੂਚੀ ਭੇਜਣੀ ਹੁੰਦੀ ਹੈ, ਜਿਸ ਵਿੱਚ ਸਵਾਰੀ ਦੇ ਨਾਂਅ ਸਮੇਤ ਕਿੱਥੋਂ ਕਿੱਥੇ ਤੱਕ ਸਫਰ ਕੀਤਾ, ਇਸ ਦੀ ਜਾਣਕਾਰੀ ਦੇਣੀ ਹੁੰਦੀ ਹੈ। ਇਸ ਦੇ ਇਲਾਵਾ ਹਰ ਤਿੰਨ ਮਹੀਨੇ ਬਾਅਦ ਬਸ ਦੀ ਲਾਗਬੁਕ ਵੀ ਜਮ੍ਹਾ ਕਰਾਉਣੀ ਹੁੰਦੀ ਹੈ, ਪਰ ਜ਼ਿਆਦਾਤਰ ਟੂਰਿਸਟ ਬਸ ਮਾਲਕਾਂ ਵੱਲੋਂ ਵਿਭਾਗ ਕੋਲ ਰਿਕਾਰਡ ਜਮ੍ਹਾ ਨਹੀਂ ਕਰਾਇਆ ਜਾਂਦਾ। ਇਸ ਕਾਰਨ ਟਰਾਂਸਪੋਰਟ ਕਮਿਸ਼ਨਰ ਪੰਜਾਬ ਨੇ ਦਿੱਲੀ ਵਿੱਚ ਸਰਕਾਰੀ ਬਸਾਂ ਦਾ ਚਲਾਨ ਹੋਣ ਦੇ ਬਾਅਦ ਇਹ ਸਖਤ ਰੁਖ਼ ਧਾਰਨ ਕੀਤਾ ਹੈ। ਸਮਝਿਆ ਜਾਂਦਾ ਹੈ ਕਿ ਨਿੱਜੀ ਬਸ ਕੰਪਨੀਆਂ ਦੇ ਮਾਲਕਾਂ ਦੇ ਇਸ਼ਾਰੇ ਉੱਤੇ ਹੀ ਸਰਕਾਰੀ ਬਸਾਂ ਦੇ ਚਲਾਨ ਕੀਤੇ ਗਏ ਹਨ ਤਾਂ ਕਿ ਉਹ ਇਸ ਦਾ ਆਰਥਿਕ ਲਾਹਾ ਲੈ ਸਕਣ।