ਢਾਕਾ, 14 ਅਗਸਤ (ਪੋਸਟ ਬਿਊਰੋ)- ਢਾਕਾ ਦੀ ਅਦਾਲਤ ਨੇ ਕੱਲ੍ਹ ਬੰਗਲਾ ਦੇਸ਼ ਦੇ ਪਹਿਲੇ ਹਿੰਦੂ ਚੀਫ ਜੱਜ ਸੁਰਿੰਦਰ ਕੁਮਾਰ ਸਿਨ੍ਹਾ ਅਤੇ 10 ਹੋਰ ਦੇ ਖ਼ਿਲਾਫ਼ ਬੈਂਕ ਤੋਂ ਚਾਰ ਕਰੋੜ ਟਕਾ (ਬੰਗਲਾ ਦੇਸ਼ੀ ਕਰੰਸੀ) ਦਾ ਗਬਨ ਕਰਨ ਦੇ ਮਾਮਲੇ ਵਿੱਚ ਦੋਸ਼ ਤਹਿ ਕੀਤੇ ਹਨ। ਢਾਕਾ ਦੀ ਇੱਕ ਹੋਰ ਅਦਾਲਤ ਦੁਆਰਾ 69 ਸਾਲ ਸਾਬਕਾ ਚੀਫ ਜੱਜ ਦੇ ਖ਼ਿਲਾਫ਼ ਗ਼੍ਰਿਫ਼ਤਾਰੀ ਵਾਰੰਟ ਜਾਰੀ ਕਰਨ ਦੇ ਸੱਤ ਮਹੀਨੇ ਬਾਅਦ ਅਦਾਲਤ ਨੇ ਦੋਸ਼ ਤਹਿ ਕੀਤਾ ਹੈ।
ਜਸਟਿਸ ਸਿਨ੍ਹਾ ਇਸ ਸਮੇਂ ਅਮਰੀਕਾ ਵਿੱਚ ਰਹਿ ਰਹੇ ਹੈ ਅਤੇ ਭਿ੍ਰਸ਼ਟਾਚਾਰ ਵਿਰੋਧੀ ਕਮਿਸ਼ਨ ਨੇ ਆਪਣੇ ਦੋਸ਼ ਪੱਤਰ ਵਿੱਚ ਉਨ੍ਹਾਂ ਨੂੰ ਭਗੌੜਾ ਐਲਾਨ ਕੀਤਾ ਹੈ। ਸਰਕਾਰੀ ਪੱਖ ਦੇ ਵਕੀਲ ਨੇ ਢਾਕਾ ਵਿੱਚ ਕਿਹਾ ਕਿ ਅਦਾਲਤ ਨੇ ਐਸ ਕੇ ਸਿਨ੍ਹਾ ਉਤੇ 10 ਦੇ ਖ਼ਿਲਾਫ਼ ਦੋਸ਼ ਤਹਿ ਕੀਤੇ ਹਨ ਅਤੇ ਇਸਦੇ ਨਾਲ ਹੀ ਕਿਸਾਨ ਬੈਂਕ ਘੋਟਾਲੇ ਵਿੱਚ ਉਨ੍ਹਾਂ ਦੇ ਖ਼ਿਲਾਫ਼ ਕੇਸ ਸ਼ੁਰੂ ਹੋ ਗਿਆ ਹੈ। ਇਸ ਮਾਮਲੇ ਵਿੱਚ ਛੇ ਦੋਸ਼ੀ ਬੈਂਕ ਦੇ ਸਾਬਕਾ ਅਧਿਕਾਰੀ ਹਨ, ਬਾਕੀ ਸਿਨ੍ਹਾ ਦੇ ਸਹਿਯੋਗੀ ਦੱਸੇ ਜਾਂਦੇ ਹਨ। ਇਸ ਕੇਸ ਵਿੱਚ ਕੇਵਲ ਤਿੰਨ ਦੋਸ਼ੀ ਹੀ ਸੁਣਵਾਈ ਦਾ ਸਾਹਮਣਾ ਕਰ ਰਹੇ ਹਨ, ਬਾਕੀ ਕਾਨੂੰਨੀ ਕਾਰਵਾਈ ਤੋਂ ਬਚਣ ਲਈ ਭੱਜ ਗਏ ਹਨ। ਅਦਾਲਤ ਦੇ ਅਧਿਕਾਰੀ ਨੇ ਦੱਸਿਆ ਕਿ ਵਿਸ਼ੇਸ਼ ਜਸਟਿਸ ਸ਼ੇਖ ਨਜਮੁਲ ਆਲਮ ਨੇ ਦੋਸ਼ਾਂ ਨੂੰ ਪੜ੍ਹਿਆ ਅਤੇ ਅਗਲੀ ਸੁਣਵਾਈ ਦੇ ਲਈ 18 ਅਗਸਤ ਦੀ ਤਾਰੀਖ ਤਹਿ ਕੀਤੀ।