ਨਵੀਂ ਦਿੱਲੀ, 14 ਅਗਸਤ (ਪੋਸਟ ਬਿਊਰੋ)- ਈ-ਆਧਾਰ ਅਤੇ ਈ-ਪੈਨ ਕਾਰਡ ਤੋਂ ਬਾਅਦ ਅਗਲੇ ਸਾਲ ਤੋਂ ਭਾਰਤ ਦੇ ਨਾਗਰਿਕਾਂ ਨੂੰ ਈ-ਪਾਸਪੋਰਟ ਜਾਰੀ ਕੀਤੇ ਜਾਣਗੇ। ਸਰਕਾਰ ਇਸ ਲਈ ਆਈ ਟੀ ਇਨਫ੍ਰਾਸਟ੍ਰਕਚਰ ਤਿਆਰ ਕਰਨ ਦੇ ਮਕਸਦ ਨਾਲ ਏਜੰਸੀ ਦੀ ਚੋਣ ਕਰਨ 'ਚ ਜੁਟੀ ਹੋਈ ਹੈ। 

ਇੱਕ ਰਿਪੋਰਟ ਮੁਤਾਬਕ 2021 ਤੋਂ ਈ-ਪਾਸਪੋਰਟ ਜਾਰੀ ਕਰਨ ਦੀ ਸ਼ੁਰੂਆਤ ਹੋ ਸਕਦੀ ਹੈ। ਇਸ ਵਕਤ ਦੇਸ਼ ਵਿੱਚ ਛਪੇ ਹੋਏ ਪਾਸਪੋਰਟ ਜਾਰੀ ਹੁਦੇ ਹਨ, ਜੋ ਬੁਕਲੇਟ ਵਾਂਗ ਹੁੰਦੇ ਹਨ। ਇਸ ਨੂੰ ਰਿਪਲੇਸ ਕਰ ਕੇ ਈ-ਪਾਸਪੋਰਟ ਦੀ ਸਹੂਲਤ ਦਿੱਤੀ ਜਾਵੇਗੀ। 2 ਲੱਖ ਅਧਿਕਾਰੀਆਂ ਤੇ ਡਿਪਲੋਮੈਟਸ ਨੂੰ ਪਾਇਲਟ ਪ੍ਰੋਜੈਕਟ ਵਜੋਂ ਈ-ਪਾਸਪੋਰਟ ਜਾਰੀ ਕੀਤੇ ਗਏ ਹਨ। ਇਨ੍ਹਾਂ 'ਚ ਇਲੈਕਟ੍ਰਾਨਿਕ ਮਾਈਕ੍ਰੋਪੋ੍ਰਸੈਸਰ ਚਿਪ ਲੱਗੀ ਹੈ। ਸਰਕਾਰ ਈ-ਪਾਸਪੋਰਟ ਇਸ ਲਈ ਜਾਰੀ ਕਰਨਾ ਚਾਹੁੰਦੀ ਹੈ ਕਿ ਧੋਖਾਦੇਹੀ ਦੇ ਕੇਸਾਂ ਨੂੰ ਰੋਕਿਆ ਜਾ ਸਕੇ। ਇਸ ਤੋਂ ਇਲਾਵਾ ਪਾਸਪੋਰਟ ਜਾਰੀ ਕਰਨ ਦੀ ਪ੍ਰਕਿਰਿਆ ਵੀ ਇਸ ਨਾਲ ਸੌਖਾਲੀ ਹੋਵੇਗੀ ਅਤੇ ਤੇਜ਼ੀ ਆਵੇਗੀ। ਅੱਜੱਕਲ੍ਹ ਘੱਟ ਤੋਂ ਘੱਟ 15 ਦਿਨਾਂ 'ਚ ਪਾਸਪੋਰਟ ਘਰ ਪਹੁੰਚਦਾ ਹੈ।
ਰਿਪੋਰਟ ਮੁਤਾਬਕ ਆਈ ਟੀ ਇਨਫ੍ਰਾਸਟ੍ਰਕਚਰ ਤਿਆਰ ਹੋਣ ਪਿੱਛੋਂ ਦੇਸ਼ ਭਰ 'ਚ ਮੌਜੂਦਾ ਸਾਰੇ 36 ਪਾਸਪੋਰਟ ਦਫ਼ਤਰਾਂ ਤੋਂ ਈ-ਪਾਸਪੋਰਟ ਜਾਰੀ ਕੀਤੇ ਜਾਣਗੇ। ਇਨ੍ਹਾਂ ਲਈ ਅਰਜ਼ੀ ਦਾ ਤਰੀਕਾ ਪਹਿਲਾਂ ਵਰਗਾ ਹੀ ਹੋਵੇਗਾ। ਇਸ ਤੋਂ ਇਲਾਵਾ ਈ-ਪਾਸਪੋਰਟ ਜਾਰੀ ਕਰਨ ਲਈ ਇੱਕ ਅਜਿਹੀ ਯੂਨਿਟ ਵੀ ਤਿਆਰ ਕੀਤੀ ਜਾਵੇਗੀ, ਜਿੱਥੇ ਹਰ ਇੱਕ ਘੰਟੇ 'ਚ 10 ਤੋਂ 20 ਹਜ਼ਾਰ ਪਾਸਪੋਰਟ ਜਾਰੀ ਕੀਤੇ ਜਾਣਗੇ।