ਲਖਨਊ, 14 ਅਗਸਤ (ਪੋਸਟ ਬਿਊਰੋ)- ਨਿਊਜ਼ ਚੈਨਲ ਦੀ ਬਹਿਸ ਵਿੱਚ ਸ਼ਾਮਲ ਹੋਣ ਦੇ ਕੁਝ ਦੇਰ ਬਾਅਦ ਕਾਂਗਰਸੀ ਬੁਲਾਰੇ ਰਾਜੀਵ ਤਿਆਗੀ ਦੀ ਮੌਤ ਦਾ ਮਾਮਲਾ ਗਰਮਾ ਗਿਆ ਹੈ। ਤਿਆਗੀ ਦੀ ਪਤਨੀ ਨੇ ਵੀਡੀਓ ਵਿੱਚ ਭਾਜਪਾ ਦੇ ਬੁਲਾਰੇ ਸੰਬਿਤ ਪਾਤਰਾ ਨੂੰ ਕਾਤਲ ਦੱਸ ਕੇ ਕਿਹਾ ਕਿ ਉਨ੍ਹਾਂ ਦੇ ਪਤੀ ਨੇ ਮੌਤ ਤੋਂ ਪਹਿਲਾਂ ਕਿਹਾ ਸੀ, ਇਨ੍ਹਾਂ ਲੋਕਾਂ ਨੇ ਮੈਨੂੰ ਮਾਰ ਦਿੱਤਾ। ਤਿਆਗੀ ਦੀ ਪਤਨੀ ਨੇ ਕਿਹਾ, ਸੰਬਿਤ ਨੇ ਤਿੰਨ-ਚਾਰ ਵਾਰ ਮੇਰੇ ਪਤੀ ਨੂੰ ‘ਜੈਚੰਦ’ ਕਿਹਾ।
ਇਸ ਦੌਰਾਨ ਰਾਜੀਵ ਤਿਆਗੀ ਨਾਲ ਬਹਿਸ ਵਿੱਚ ਸ਼ਾਮਲ ਸੰਬਿਤ ਪਾਤਰਾ, ਨਿਊਜ਼ ਚੈਨਲ ਦੇ ਪ੍ਰਮੋਟਰ ਅਤੇ ਉਸ ਦੇ ਐਂਕਰ ਦੇ ਖਿਲਾਫ ਲਖਨਊ ਦੀ ਹਜਰਤਗੰਜ ਕੋਤਵਾਲੀ ਵਿੱਚ ਸਾਜ਼ਿਸ਼ ਹੇਠ ਹੱਤਿਆ ਦੀ ਸ਼ਿਕਾਇਤ ਕੀਤੀ ਗਈ ਹੈ। ਸ਼ਿਕਾਇਤ ਕਰਤਾ ਯੂ ਪੀ ਕਾਂਗਰਸ ਦੇ ਬੁਲਾਰੇ ਅੰਸ਼ੂ ਅਵਸਥੀ ਨੇ ਕਿਹਾ, ਨਿਊਜ਼ ਚੈਨਲ ਦੀ ਬਹਿਸ ਵਿੱਚ ਵਿਸ਼ੇ ਤੋਂ ਵੱਖ ਨਿੱਜੀ ਗੱਲਬਾਤ ਹੋਣ ਲੱਗੀ ਸੀ ਅਤੇ ਸੰਬਿਤ ਪਾਤਰਾ ਨੇ ਤਿਆਗੀ ਨੂੰ ਜੈਚੰਦ ਬੋਲਿਆ ਤੇ ਕਿਹਾ ਕਿ ਤਿਲਕ ਲਾਉਣ ਨਾਲ ਕੋਈ ਹਿੰਦੂ ਨਹੀਂ ਹੋ ਜਾਂਦਾ। ਇਸੇ ਕਾਰਨ ਤਿਆਗੀ ਨੂੰ ਸਦਮਾ ਲੱਗਾ ਅਤੇ ਮੌਤ ਹੋ ਗਈ।
ਕਾਂਗਰਸੀ ਬੁਲਾਰੇ ਜੈਵੀਰ ਸ਼ੇਰਗਿੱਲ ਨੇ ਸੂਚਨਾ ਪ੍ਰਸਾਰਨ ਮੰਤਰੀ ਨੂੰ ਪੱਤਰ ਭੇਜ ਕੇ ਨਿਊਜ਼ ਚੈਨਲਾਂ ਦੇ ਲਈ ਚੋਣ ਜ਼ਾਬਤਾ ਲਾਗੂ ਕਰਨ ਦੀ ਮੰਗ ਕੀਤੀ ਹੈ। ਪੱਤਰ ਵਿੱਚ ਕਿਹਾ ਕਿ ਟੀ ਵੀ ਬਹਿਸ ‘ਕਲੰਕਿਤ ਕਰਨ ਵਾਲਾ ਦੈਤ’ ਬਣ ਚੁੱਕੀ ਹੈ। ਇਸ ਨੂੰ ਕਾਬੂ ਕਰਨ ਲਈ ਚੋਣ ਜ਼ਾਬਤਾ ਲਿਆ ਕੇ ‘ਸ਼ਿਸ਼ਟਤਾ’ ਬਹਾਲ ਕਰਨਾ ਜ਼ਰੂਰੀ ਹੈ।