ਕਲਾਕਾਰ ਕਦੇ ਖੁਦ ਨੂੰ ਕਿਸੇ ਇੱਕ ਕਿਸਮ ਦੇ ਕਿਰਦਾਰਾਂ ਵਿੱਚ ਬੰਨ੍ਹ ਕੇ ਨਹੀਂ ਰੱਖਣਾ ਚਾਹੁੰਦੇ। ਉਹ ਖੁਦ ਨੂੰ ਵੱਖ ਵੱਖ ਕਿਰਦਾਰਾਂ ਵਿੱਚ ਅਜ਼ਮਾ ਕੇ ਲੋਕਾਂ ਸਾਹਮਣੇ ਆਪਣੀ ਐਕਟਿੰਗ ਕਲਾ ਦਾ ਪ੍ਰਦਰਸ਼ਨ ਕਰਨਾ ਚਾਹੁੰਦੇ ਹਨ। ਅੱਜ ਕੱਲ੍ਹ ਕੁਝ ਅਜਿਹਾ ਹੀ ਦਸ਼ਰਥ ਮਾਂਝੀ, ਗਣੇਸ਼ ਗਾਇਤੋਂਡੇ ਅਤੇ ਰਮੰਨਾ ਵਰਗੇ ਗੰਭੀਰ ਕਿਰਦਾਰ ਨਿਭਾਉਣ ਵਾਲੇ ਨਵਾਜੂਦੀਨ ਸਿੱਦੀਕੀ ਨਾਲ ਵੀ ਦੇਖਣ ਨੂੰ ਮਿਲ ਰਿਹਾ ਹੈ। ਨਵਾਜੂਦੀਨ ਗੰਭੀਰ ਕਿਰਦਾਰਾਂ ਨਾਲੋਂ ਅਲੱਗ ਰੋਮਾਂਟਿਕ ਅਤੇ ਹਲਕੇ-ਫੁਲਕੇ ਕਾਮਿਕ ਕਿਰਦਾਰਾਂ ਵਿੱਚ ਜ਼ਿਆਦਾ ਦਿਲਚਸਪੀ ਲੈ ਰਹੇ ਹਨ। ਉਨ੍ਹਾਂ ਨੇ ਆਪਣੀ ਅਗਲੀ ਫਿਲਮ ਸਾਈਨ ਕਰ ਲਈ ਹੈ, ਜੋ ਰੋਮਾਂਟਿਕ ਕਾਮੇਡੀ ਹੋਵੇਗੀ। ‘ਜੋਗੀਰਾ ਸਾਰਾ ਰਾ ਰਾ’ ਨਾਂਅ ਦੀ ਇਸ ਫਿਲਮ ਵਿੱਚ ਉਹ ਪਹਿਲੀ ਵਾਰ ਨੇਹਾ ਸ਼ਰਮਾ ਨਾਲ ਰੋਮਾਂਸ ਕਰਦੇ ਨਜ਼ਰ ਆਉਣਗੇ। ਨਈਮ ਏ ਸਿੱਦੀਕੀ ਦੇ ਪ੍ਰੋਡਕਸ਼ਨ ਹਾਊਸ ਵਿੱਚ ਬਣ ਰਹੀ ਇਹ ਫਿਲਮ ‘ਹਮਦਮ’ ਅਤੇ ‘ਬਾਬੂ ਮੋਸ਼ਾਇ ਬੰਦੂਕਬਾਜ਼’ ਆਦਿ ਫਿਲਮਾਂ ਦੇ ਡਾਇਰੈਕਟਰ ਕੁਸ਼ਾਨ ਨੰਦੀ ਨਿਰਦੇਸ਼ਤ ਕਰਨਗੇ। ਗਾਲਿਬ ਅਸਦ ਭੋਪਾਲੀ ਵੱਲੋਂ ਲਿਖੀ ਇਸ ਫਿਲਮ ਦੇ ਪ੍ਰੀ-ਪ੍ਰੋਡਕਸ਼ਨ ਦਾ ਕੰਮ ਚੱਲ ਰਿਹਾ ਹੈ। ਅਗਲੇ ਸਾਲ ਫਰਵਰੀ ਵਿੱਚ ਇਸ ਫਿਲਮ ਦੀ ਸ਼ੂਟਿੰਗ ਸ਼ੁਰੂ ਹੋਵੇਗੀ ਅਤੇ ਫਿਲਮ ਨੂੰ ਲਖਨਊ, ਵਾਰਾਣਸੀ ਅਤੇ ਮੁੰਬਈ ਦੇ ਕੁਝ ਸਥਾਨਾਂ 'ਤੇ ਸ਼ੂਟ ਕੀਤਾ ਜਾਏਗਾ।
ਫਿਲਮ ਦੇ ਬਾਰੇ ਕੁਸ਼ਾਨ ਦੱਸਦੇ ਹਨ ਕਿ ‘ਜੋਗੀਰਾ ਸਾਰਾ ਰਾ ਰਾ’ ਦੇਸ਼ ਦੇ ਛੋਟੇ ਸ਼ਹਿਰ ਦੇ ਪਿਛੋਕੜ 'ਤੇ ਆਧਾਰਤ ਅਜੀਬ ਪ੍ਰੇਮੀ ਜੋੜੇ ਦੇ ਸ਼ੌਕ ਅਤੇ ਪਾਗਲਪਨ ਦੀ ਕਹਾਣੀ ਹੈ। ਇਹ ਫਿਲਮ ਛੋਟੇ ਸ਼ਹਿਰਾਂ ਦੀ ਕਹਾਣੀਆਂ ਨਾਲੋਂ ਬਿਲਕੁਲ ਅਲੱਗ ਹੈ। ਨਵਾਜ਼ ਹਾਲ ਹੀ ਵਿੱਚ ਨੈੱਟਫਲਿਕਸ 'ਤੇ ਰਿਲੀਜ਼ ਹੋਈ ਫਿਲਮ ‘ਰਾਤ ਅਕੇਲੀ ਹੈ’ ਵਿੱਚ ਨਜ਼ਰ ਆਏ ਹਨ।