ਨਵੀਂ ਦਿੱਲੀ, 13 ਅਗਸਤ (ਪੋਸਟ ਬਿਊਰੋ)- ਡੈਮੋਕਰੇਟਿਕ ਪਾਰਟੀ ਦੀ ਉਮੀਦਵਾਰ ਵਜੋਂ ਕਮਲਾ ਹੈਰਿਸ ਨਵੰਬਰ ਵਿੱਚ ਅਮਰੀਕਾ ਦੀ ਉਪ ਰਾਸ਼ਟਰਪਤੀ ਚੁਣੀ ਵੀ ਜਾਵੇ ਤਾਂ ਇਹ ਕਹਿਣਾ ਮੁਸ਼ਕਲ ਹੈ ਕਿ ਭਾਰਤ ਪ੍ਰਤੀ ਉਨ੍ਹਾਂ ਦੀਆਂ ਨੀਤੀਆਂ ਜ਼ਿਆਦਾ ਲਚਕੀਲੀਆਂ ਹੋਣਗੀਆਂ। ਹੈਰਿਸ ਨੇ ਪਹਿਲਾਂ ਵੀ ਦਿਖਾਇਆ ਹੈ ਕਿ ਜਦ ਮੁੱਦਿਆਂ ਦੀ ਗੱਲ ਹੁੰਦੀ ਹੈ ਤਾਂ ਉਹ ਪਾਰਟੀ ਦੀਆਂ ਨੀਤੀਆਂ ਤੋਂ ਇੱਕ ਇੰਚ ਵੀ ਟੱਸ ਤੋਂ ਮੱਸ ਨਹੀਂ ਹੁੰਦੀ। ਵਰਨਣ ਯੋਗ ਹੈ ਕਿ ਇੱਕ ਵਾਰ ਉਹ ਭਾਰਤੀ ਵਿਦੇਸ਼ ਨੀਤੀ ਚਲਾਉਣ ਵਾਲਿਆਂ ਨੂੰ ਝਟਕਾ ਦੇ ਚੁੱਕੀ ਹੈ।
ਕਮਲਾ ਹੈਰਿਸ ਨੂੰ ਭਾਰਤੀ ਮਾਂ ਦੀ ਬੇਟੀ ਹੋਣ ਦਾ ਬੇਹੱਦ ਮਾਣ ਹੈ। ਆਪਣੀ ਮਾਂ ਸ਼ਿਆਮਲਾ ਗੋਪਾਲਨ ਦਾ ਜ਼ਿਕਰ ਉਹ ਹਰ ਸਿਆਸੀ ਭਾਸ਼ਣ ਵਿੱਚ ਕਰਦੀ ਹੈ। ਸਿਆਸਤ ਅਤੇ ਨੀਤੀਆਂ ਵੇਲੇ ਉਨ੍ਹਾਂ ਦਾ ਲਗਾਅ ਸਿਰਫ ਪਾਰਟੀ ਨਾਲ ਹੈ। ਪਿਛਲੇ ਸਾਲ ਜਦ ਭਾਰਤ ਨੇ ਜੰਮੂ-ਕਸ਼ਮੀਰ ਵਿੱਚੋਂ ਧਾਰਾ 370 ਹਟਾਉਣ ਦਾ ਫੈਸਲਾ ਕੀਤਾ ਸੀ ਤਾਂ ਕਮਲਾ ਨੇ ਵਿਰੋਧ ਜਤਾਇਆ ਸੀ। ਦਸੰਬਰ 2019 ਵਿੱਚ ਵਿਦੇਸ਼ ਮੰਤਰੀ ਐੱਸ ਜੈਸ਼ੰਕਰ ਨੇ ਅਮਰੀਕਾ ਦੀ ਯਾਤਰਾ ਕੀਤੀ ਤਾਂ ਉਥੋਂ ਉਨ੍ਹਾਂ ਦੀ ਇੱਕ ਬੈਠਕ ਵਿਦੇਸ਼ ਮਾਮਲਿਆਂ ਦੇ ਅਮਰੀਕੀ ਪਾਰਲੀਮੈਂਟਰੀ ਗਰੁੱਪ ਨਾਲ ਹੋਣੀ ਸੀ ਜਿਸ ਵਿੱਚ ਭਾਰਤੀ ਮੂਲ ਦੀ ਪਾਰਲੀਮੈਂਟ ਮੈਂਬਰ ਪ੍ਰੋਮਿਲਾ ਜੈਪਾਲ ਆਪਣੇ ਸਮਰਥਕਾਂ ਨਾਲ ਸ਼ਾਮਲ ਹੋਣ ਵਾਲੀ ਸੀ, ਉਸ ਵੇਲੇ ਭਾਰਤੀ ਵਿਦੇਸ਼ ਮੰਤਰੀ ਨੇ ਇਹ ਬੈਠਕ ਰੱਦ ਕਰ ਦਿੱਤੀ ਸੀ। ਪ੍ਰੋਮਿਲਾ ਜੈਪਾਲ ਕਸ਼ਮੀਰ ਤੋਂ ਧਾਰਾ 370 ਹਟਾਉਣ, ਸੀ ਏ ਏ ਵਰਗੇ ਮੁੱਦਿਆਂ 'ਤੇ ਭਾਰਤੀ ਨੀਤੀ ਦੀ ਆਲੋਚਨਾ ਕਰ ਚੁੱਕੀ ਸੀ। ਉਸ ਨੇ ਅਮਰੀਕਾ ਕਾਂਗਰਸ ਵਿੱਚ ਕਸ਼ਮੀਰ ਨੂੰ ਲੈ ਕੇ ਇੱਕ ਨਿੰਦਾ ਪ੍ਰਸਤਾਵ ਵੀ ਪੇਸ਼ ਕੀਤਾ ਸੀ। ਬਾਅਦ ਵਿੱਚ ਜੈਸ਼ੰਕਰ ਨੇ ਇਹ ਵੀ ਕਿਹਾ ਕਿ ਉਨ੍ਹਾਂ ਦੀ ਜੈਪਾਲ ਨੂੰ ਮਿਲਣ ਵਿੱਚ ਕੋਈ ਦਿਲਚਸਪੀ ਨਹੀਂ ਹੈ। ਭਾਰਤੀ ਵਿਦੇਸ਼ ਮੰਤਰੀ ਦੇ ਇਸ ਫੈਸਲੇ ਦੀ ਹੈਰਿਸ ਨੇ ਸਖਤ ਸ਼ਬਦਾਂ ਵਿੱਚ ਆਲੋਚਨਾ ਕੀਤੀ ਸੀ।