ਨਵੀਂ ਦਿੱਲੀ, 13 ਅਗਸਤ (ਪੋਸਟ ਬਿਊਰੋ)- ਰਾਸ਼ਟਰੀ ਸਵੈ ਸੇਵਕ ਸੰਘ ਦੇ ਮੁਖੀ ਮੋਹਨ ਭਾਗਵਤ ਨੇ ਕੱਲ੍ਹ ਕਿਹਾ ਕਿ ਸਵਦੇਸ਼ੀ ਦਾ ਮਤਲਬ ਜ਼ਰੂਰੀ ਨਹੀਂ ਕਿ ਹਰ ਵਿਦੇਸ਼ੀ ਸਾਮਾਨ ਦਾ ਬਾਈਕਾਟ ਕੀਤਾ ਜਾਏ। ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ ਕਿ ਸਿਰਫ ਉਨ੍ਹਾਂ ਹੀ ਤਕਨੀਕਾਂ ਅਤੇ ਚੀਜ਼ਾਂ ਦੀ ਇੰਪੋਰਟ ਕੀਤੀ ਜਾਏ ਜਿਨ੍ਹਾਂ ਦੀ ਦੇਸ਼ ਵਿੱਚ ਰਵਾਇਤੀ ਤੌਰ 'ਤੇ ਘਾਟ ਹੈ ਜਾਂ ਸਥਾਨਕ ਤੌਰ 'ਤੇ ਮਿਲ ਹੀ ਨਹੀਂ ਸਕਦੀਆਂ।
ਕੋਵਿਡ 19 ਦੀ ਮਹਾਮਾਰੀ ਕਾਰਨ ਸਵਦੇਸ਼ੀ ਜਾਂ ਆਤਮਨਿਰਭਰ ਬਣਨ ਦੀ ਸਾਰਥਕਤਾ ਬਾਰੇ ਇੱਕ ਪੁਸਤਕ ਦੇ ਰਿਲੀਜ਼ ਲਈ ਹੋਏ ਵਰਚੁਅਲ ਪ੍ਰੋਗਰਾਮ ਵਿੱਚ ਮੋਹਣ ਭਾਗਵਤ ਨੇ ਕਿਹਾ, ਮਹਾਮਾਰੀ ਨੇ ਇਹ ਸਪੱਸ਼ਟ ਕਰ ਦਿੱਤਾ ਹੈ ਕਿ ਸੰਸਾਰੀਕਰਨ ਨੇ ਲੋੜੀਂਦੇ ਨਤੀਜੇ ਨਹੀਂ ਦਿੱਤੇ ਤੇ ਇੱਕ ਹੀ ਆਰਥਿਕ ਮਾਡਲ ਹਰ ਥਾਂ ਲਾਗੂ ਨਹੀਂ ਹੋ ਸਕਦਾ। ਕੋਵਿਡ ਦੇ ਬਾਅਦ ਦੀ ਦੁਨੀਆ ਵਿੱਚ ਅਜਿਹੇ ਆਰਥਿਕ ਮਾਡਲ ਦੀ ਲੋੜ ਮਹਿਸੂਸ ਹੋ ਰਹੀ ਹੈ ਜਿਸ ਵਿੱਚ ਪੂਰੀ ਦੁਨੀਆ ਨੂੰ ਇੱਕ ਬਾਜ਼ਾਰ ਨਹੀਂ, ਇੱਕ ਪਰਵਾਰ ਮੰਨ ਕੇ ਆਤਮ ਨਿਰਭਰ ਦੇਸ਼ਾਂ ਵਿੱਚ ਆਪਸੀ ਸਹਿਯੋਗ ਹੋਵੇ। ਐੱਨ ਡੀ ਏ ਸਰਕਾਰ ਦੀ ਆਤਮ ਨਿਰਭਰ ਭਾਰਤ ਮੁਹਿੰਮ ਦੀ ਵਕਾਲਤ ਕਰਦੇ ਹੋਏ ਮੋਹਣ ਭਾਗਵਤ ਨੇ ਕਿਹਾ ਕਿ ਸਵਦੇਸ਼ੀ ਦਾ ਮਤਲਬ ਸਵਦੇਸ਼ੀ ਸਾਮਾਨ ਜਾਂ ਤਕਨੀਕਾਂ ਨੂੰ ਬੜਾਵਾ ਦੇਣਾ ਜਾਂ ਪਹਿਲ ਦੇਣਾ ਹੈ, ਜ਼ਰੂਰੀ ਨਹੀਂ ਕਿ ਸਾਰੇ ਵਿਦੇਸ਼ੀ ਸਾਮਾਨ ਦਾ ਬਾਈਕਾਟ ਕੀਤਾ ਜਾਏ। ਉਨ੍ਹਾਂ ਨੇ ਕੁਝ ਅਜਿਹੀਆਂ ਮਿਸਾਲਾਂ ਵੀ ਦਿੱਤੀਆਂ, ਜਦ ਰਵਾਇਤੀ ਰੂਪ ਤੋਂ ਮਿਲਦੇ ਸਾਮਾਨ ਅਤੇ ਤਕਨੀਕਾਂ ਦੀ ਖਰੀਦੀਆਂ ਵਸਤੂਆਂ ਦੀ ਅਣਦੇਖੀ ਕੀਤੀ ਗਈ। ਇਸ ਬਾਰੇ ਵਿੱਚ ਸੰਘ ਮੁਖੀ ਨੇ ਮਾਨਸਿਕਤਾ ਬਦਲਣ 'ਤੇ ਜ਼ੋਰ ਦਿੱਤਾ ਤੇ ਕਿਹਾ ਕਿ ਆਜ਼ਾਦੀ ਦੇ ਬਾਅਦ ਭਾਰਤ ਵਿੱਚ ਨੀਤੀ ਦਾ ਨਿਰਧਾਰਨ ਪੱਛਮੀ ਅਤੇ ਦੂਸਰੇ ਦੇਸ਼ਾਂ ਤੋਂ ਪ੍ਰਭਾਵਤ ਸੀ।