ਸ਼੍ਰੀਨਗਰ, 13 ਅਗਸਤ (ਪੋਸਟ ਬਿਊਰੋ)- ਕਸ਼ਮੀਰ ਵਿੱਚ ਕੇਸਰ ਦੀ ਖੇਤੀ ਕਰਨ ਵਾਲਿਆਂ ਦੇ ਲਈ ਪਹਿਲਾ ਹਾਈਟੈਕ ਸਪਾਈਸ ਪਾਰਕ ਬਣ ਚੁੱਕਾ ਹੈ। ਇਹ ਪਾਰਕ ਦੱਖਣੀ ਕਸ਼ਮੀਰ ਦੇ ਪਮਪੋਰ ਵਿੱਚ ਬਣਾਇਆ ਗਿਆ ਹੈ, ਜੋ ਦੁਨੀਆ ਭਰ ਵਿੱਚ ਕੇਸਰ ਦੇ ਲਈ ਪ੍ਰਸਿੱਧ ਨਗਰ ਹੈ, ਇਸ ਲਈ ਇਸ ਦੀ ਵਿਸ਼ੇਸ਼ ਮਹੱਤਤਾ ਹੈ।
ਇਸ ਹਾਈਟੈਕ ਸਪਾਈਸ ਪਾਰਕ ਵਿੱਚ ਇੱਕ ਵਿਗਿਆਨਿਕ ਲੈਬ ਤੇ ਟੈਸਟ ਬਲਾਕ ਹੈ, ਜਿੱਥੇ ਕੇਸਰ ਵਿੱਚ ਨਮੀ ਦੀ ਜਾਂਚ ਲਈ ਟੈਸਟ ਕੀਤਾ ਜਾਂਦਾ ਹੈ, ਜੋ ਇਸ ਦੀ ਗੁਣਵਤਾ ਲਈ ਮਹੱਤਵਪੂਰਨ ਹੈ। ਕੁਆਲਿਟੀ ਮੈਨੇਜਰ ਸਪਾਈਸ ਪਾਰਕ ਖੁਰਸ਼ੀਦ ਨੇ ਕਿਹਾ ਕਿ ਪਹਿਲਾਂ ਕਿਸਾਨ ਆਪਣੇ ਘਰ ਕੇਸਰ ਨੂੰ ਸੁਖਾਉਂਦੇ ਸਨ, ਜਿਸ ਦੇ ਕਾਰਨ ਉਨ੍ਹਾਂ ਨੂੰ ਬਾਜ਼ਾਰ ਵਿੱਚ ਕਾਫ਼ੀ ਨੁਕਸਾਨ ਹੁੰਦਾ ਸੀ। ਅਸੀਂ ਇਥੇ ਕੇਸਰ ਸੁਖਾਵਾਗੇ। ਸਰਕਾਰ ਦਾ ਉਦੇਸ਼ ਕੇਸਰ ਦੀ ਗੁਣਵਤਾ ਬਣਾਏ ਰੱਖਣਾ ਹੈ। ਇੱਕ ਕਰਮਚਾਰੀ ਮੁਦੱਸਿਰ ਅਮੀਰ ਨੇ ਕਿਹਾ ਕਿ ਪਹਿਲਾਂ ਕੇਸਰ ਦਾ ਟੈਸਟ ਕੀਤਾ ਜਾਂਦਾ ਹੈ ਤੇ ਫਿਰ ਉਨ੍ਹਾਂ ਦਾ ਸੈਂਪਲ ਲਿਆ ਜਾਂਦਾ ਹੈ। ਸਾਡੇ ਕੋਲ 1.2 ਅਤੇ 3 ਗ੍ਰੇਡ ਹੈ। ਗ੍ਰੇਡ ਦੇ ਆਧਾਰ 'ਤੇ ਪੈਕੇਜਿੰਗ ਕੀਤੀ ਜਾਂਦੀ ਹੈ। ਡਾਇਰੈਕਟਰ ਖੇਤੀ ਵਿਭਾਗ ਕਸ਼ਮੀਰ ਅਲਤਾਫ ਏਜਾਜ ਅੰਦ੍ਰਾਬੀ ਨੇ ਕਿਹਾ ਕਿ ਕਸ਼ਮੀਰੀ ਕੇਸਰ ਦੁਨੀਆ ਵਿੱਚ ਸਭ ਤੋਂ ਚੰਗਾ ਹੈ। ਉਨ੍ਹਾ ਕਿਹਾ ਕਿ ਇਹ ਪਾਰਕ 37 ਕਰੋੜ ਰੁਪਏ ਦੀ ਲਾਗਤ ਨਾਲ ਸਭ ਸਹੂਲਤਾਂ ਸਮੇਤਂ ਬਣਾਇਆ ਗਿਆ ਹੈ।