ਨਵੀਂ ਦਿੱਲੀ, 13 ਅਗਸਤ (ਪੋਸਟ ਬਿਊਰੋ)- ਕੋਰੋਨਾ ਮਹਾਂਮਾਰੀ ਕਾਰਨ 2022 ਫੀਫਾ ਵਿਸ਼ਵ ਕੱਪ ਦੇ ਏਸ਼ਿਆਈ ਕੁਆਲੀਫਾਈਂਗ ਮੁਕਾਬਲੇ 2021 ਲਈ ਸਸਪੈਂਡ ਹੋਣ ਕਾਰਨ ਭਾਰਤ ਦੀ ਫੁੱਟਬਾਲ ਟੀਮ ਇਸ ਸਾਲ ਕੋਈ ਮੈਚ ਨਹੀਂ ਖੇਡੇਗੀ। ਏਸ਼ੀਅਨ ਫੁੱਟਬਾਲ ਕਨਫੈਡਰੇਸ਼ਨ (ਏ ਐਫ ਸੀ) ਨੇ ਸਾਲ 2022 ਦੇ ਵਿਸ਼ਵ ਕੱਪ ਤੇ 2023 ਏਸ਼ੀਆਈ ਕੱਪ ਦੇ ਅਕਤੂਬਰ ਤੇ ਨਵੰਬਰ 'ਚ ਹੋਣ ਵਾਲੇ ਸਾਰੇ ਪੁਰਸ਼ ਕੁਆਲੀਫਾਇਰ ਮੁਕਾਬਲੇ ਸਸਪੈਂਡ ਕਰ ਦਿੱਤੇ ਹਨ।
ਭਾਰਤ ਨੇ ਪਿਛਲਾ ਅੰਤਰਰਾਸ਼ਟਰੀ ਮੁਕਾਬਲਾ ਪਿਛਲੇ ਸਾਲ ਨਵੰਬਰ 'ਚ ਮਸਕਟ 'ਚ ਓਮਾਨ ਦੇ ਖ਼ਿਲਾਫ਼ ਖੇਡਿਆ ਸੀ, ਜੋ ਸਾਂਝਾ ਕੁਆਲੀਫਾਈਂਗ ਮੈਚ ਸੀ। ਭਾਰਤ ਇਹ ਮੈਚ 0-1 ਨਾਲ ਹਾਰ ਗਿਆ ਸੀ। ਵਿਸ਼ਵ ਕੱਪ ਕੁਆਲੀਫਾਇਰ ਦੇ ਅਗਲੇ ਦੌਰ 'ਚ ਥਾਂ ਬਣਾਉਣ ਦੀ ਦੌੜ ਤੋਂ ਭਾਰਤ ਬਾਹਰ ਹੋ ਚੁੱਕਾ ਹੈ, ਪਰ ਹਾਲੇ ਵੀ ਸਾਲ 2023 ਏਸ਼ੀਆਈ ਕੱਪ ਲਈ ਕੁਆਲੀਫਾਈ ਕਰਨ ਦੀ ਦੌੜ 'ਚ ਬਣਿਆ ਹੋਇਆ ਹੈ। ਇਸ ਟੀਮ ਨੂੰ 8 ਅਕਤੂਬਰ ਨੂੰ ਕਤਰ ਨਾਲ ਭਿੜਨਾ ਸੀ, ਜਦੋਂ ਕਿ ਇਸ ਦੇ ਬਾਅਦ ਨਵੰਬਰ 'ਚ ਅਫਗਾਨਿਸਤਾਨ ਦੇ ਖ਼ਿਲਾਫ਼ ਭਾਰਤ 'ਚ ਅਤੇ ਬੰਗਲਾਦੇਸ਼ ਦੇ ਖ਼ਿਲਾਫ਼ ਉਸ ਦੀ ਜ਼ਮੀਨ 'ਤੇ ਮੁਕਾਬਲੇ ਖੇਡਣੇ ਸਨ। ਭਾਰਤ ਜੇ ਗਰੁੱਪ 'ਚ ਤੀਸਰੇ ਸਥਾਨ ਤੱਕ ਰਹੇ ਤਾਂ 2023 ਏਸ਼ੀਆ ਕੱਪ ਕੁਆਲੀਫਾਇਰ ਦੇ ਤੀਸਰੇ ਦੌਰ 'ਚ ਸਿੱਧਾ ਪ੍ਰਵੇਸ਼ ਕਰ ਜਾਵੇਗਾ। ਫੀਫਾ ਅਤੇ ਏ ਐਫ ਸੀ ਨੇ ਸਾਂਝਾ ਬਿਆਨ ਜਾਰੀ ਕਰਕੇ ਕਿਹਾ ਕਿ ਕੋਰੋਨਾ ਦੀ ਸਥਿਤੀ ਨੂੰ ਵੇਖਦੇ ਹੋਏ ਫੈਸਲਾ ਲਿਆ ਗਿਆ ਹੈ ਕਿ ਫੀਫਾ ਵਿਸ਼ਵ ਕੱਪ ਕਤਰ 2022 ਅਤੇ ਏ ਐਫ ਸੀ ਏਸ਼ੀਆਈ ਕੱਪ ਚੀਨ 2023 ਦੇ ਅਗਲੇ ਕੁਆਲੀਫਾਈਂਗ ਮੁਕਾਬਲਿਆਂ ਨੂੰ 2021 'ਚ ਖੇਡਿਆ ਜਾਵੇਗਾ।