ਵੈੱਬ ਸ਼ੋਅ ‘ਦ ਟੇਸਟ ਕੇਸ’ ਵਿੱਚ ਨਿਮਰਤ ਕੌਰ ਨੇ ਇੱਕ ਫੌਜੀ ਅਧਿਕਾਰੀ ਦੀ ਭੂਮਿਕਾ ਨਿਭਾਈ ਸੀ। ਸ਼ੋਅ ਨੂੰ ਕਾਫੀ ਪਸੰਦ ਕੀਤਾ ਗਿਆ ਸੀ। ਪਿੱਛੇ ਜਿਹੇ ਨਿਰਮਾਤਾਵਾਂ ਨੇ ਸ਼ੋਅ ਦੇ ਦੂਸਰੇ ਸੀਜ਼ਨ ‘ਦ ਟੇਸਟ ਕੇਸ 2’ ਨੂੰ ਬਣਾਉਣ ਦਾ ਐਲਾਨ ਕੀਤਾ ਹੈ। ਉਸ ਦੇ ਨਾਲ ਕਿਆਸ ਲਾਏ ਜਾ ਰਹੇ ਹਨ ਕਿ ਮੁੱਖ ਅਭਿਨੇਤਰੀ ਕੌਣ ਹੋਵੇਗੀ। ਫਿਲਮੀ ਗਲਿਆਰਿਆਂ ਦੀਆਂ ਖਬਰਾਂ ਮੁਤਾਬਕ ਕਿਉਂਕਿ ਇਹ ਮੇਨ ਭੂਮਿਕਾ ਹੈ, ਇਸ ਲਈ ਨਿਰਮਾਤਾ ਕਿਸੇ ਅਜਿਹੀ ਅਭਿਨੇਤਰੀ ਦੀ ਤਲਾਸ਼ ਵਿੱਚ ਹਨ, ਜੋ ਇਸ ਭੂਮਿਕਾ ਨੂੰ ਬੜੀ ਦਿ੍ਰੜ੍ਹਤਾ ਅਤੇ ਜ਼ਿੰਮੇਵਾਰੀ ਨਾਲ ਨਿਭਾ ਸਕੇ। ਉਹ ਪਰਿਣੀਤੀ ਚੋਪੜਾ ਦੇ ਨਾਂਅ 'ਤੇ ਵਿਚਾਰ ਕਰ ਰਹੇ ਹਨ।
ਖੈਰ, ਇਹ ਤਾਂ ਸਮਾਂ ਆਉਣ 'ਤੇ ਪਤਾ ਲੱਗੇਗਾ। ਜੇ ਅਜਿਹਾ ਹੁੰਦਾ ਹੈ ਤਾਂ ਇਹ ਪਰਿਣੀਤੀ ਦਾ ਡਿਜੀਟਲ ਡੈਬਿਊ ਹੋਵੇਗਾ। ‘ਦ ਟੇਸਟ ਕੇਸ 2’ ਪਿਛਲੇ ਸੀਜ਼ਨ ਦੇ ਮੁਕਾਬਲੇ ਜ਼ਿਆਦਾ ਵੱਡਾ, ਬਿਹਤਰ ਤੇ ਦਮਦਾਰ ਹੋਵੇਗਾ। ਕਸ਼ਮੀਰ ਵਿੱਚ ਸਥਾਪਤ ਇਹ ਵਿਸ਼ਵਾਸ, ਵਫਾਦਾਰੀ, ਜਾਸੂਸੀ ਤੇ ਗੁਰੀਲਾ ਯੁੱਧ ਦੀ ਕਹਾਣੀ ਹੋਵੇਗੀ। ਕਹਾਣੀ ਇੱਕ ਮਹਿਲਾ ਅਧਿਕਾਰੀ ਦੇ ਆਲੇ ਦੁਆਲੇ ਘੰੁਮਦੀ ਹੈ। ਉਹ ਇਹ ਸਾਬਿਤ ਕਰਨ ਦੀ ਕੋਸ਼ਿਸ਼ ਕਰਦੀ ਹੈ ਕਿ ਸੰਘਰਸ਼ ਅਤੇ ਯੁੱਧ ਖੇਤਰ ਵਿੱਚ ਔਰਤਾਂ ਵੀ ਆਹਮਣੇ-ਸਾਹਮਣੇ ਖੜ੍ਹੀਆਂ ਹੋ ਸਕਦੀਆਂ ਹਨ ਅਤੇ ਦੁਸ਼ਮਣ 'ਤੇ ਕਾਰਵਾਈ ਕਰ ਸਕਦੀਆਂ ਹਨ। ਮਿਸ਼ਨ ਦੇ ਕਿਸੇ ਵੀ ਕੋਣੇ 'ਤੇ ਉਹ ਕਮਜ਼ੋਰ ਮਹਿਸੂਸ ਨਹੀਂ ਕਰਨਗੀਆਂ ਅਤੇ ਨਾ ਹੀ ਪਿੱਛੇ ਹਟਣਗੀਆਂ।