ਵਿਲਮਿੰਗਟਨ, 12 ਅਗਸਤ (ਪੋਸਟ ਬਿਊਰੋ) : ਪਹਿਲੀ ਵਾਰੀ ਕਮਲਾ ਹੈਰਿਸ ਨੂੰ ਆਪਣੀ ਰਨਿੰਗ ਮੇਟ (ਵਾਈਸ ਪ੍ਰੈਜ਼ੀਡੈਂਟ) ਵਜੋਂ ਲੈ ਕੇ ਜੋਅ ਬਾਇਡਨ ਬੁੱਧਵਾਰ ਨੂੰ ਅਮੈਰਿਕਨਜ਼ ਦੇ ਸਾਹਮਣੇ ਪਹੁੰਚੇ| ਇਸ ਮੌਕੇ ਦੋਵਾਂ ਆਗੂਆਂ ਨੇ ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਦੇ ਕਿਰਦਾਰ ਤੇ ਕਾਰਗੁਜ਼ਾਰੀ ਉੱਤੇ ਜੰਮ ਕੇ ਹਮਲੇ ਕੀਤੇ|
77 ਸਾਲਾ ਜੋਅ ਬਾਇਡਨ ਨੇ ਪਹਿਲੀ ਵਾਰੀ ਬਲੈਕ ਵੁਮਨ ਨੂੰ ਇਸ ਮਹੱਤਵਪੂਰਣ ਅਹੁਦੇ ਲਈ ਚੁਣਿਆ ਹੈ| ਅਜਿਹਾ ਨਹੀਂ ਹੈ ਕਿ ਸਿਰਫ ਸਿਆਹ ਨਸਲ ਦਾ ਹੋਣਾ ਹੀ ਇੱਕ ਅਜਿਹਾ ਕਾਰਨ ਹੈ ਕਿ ਹੈਰਿਸ ਦੀ ਚੋਣ ਇਸ ਪ੍ਰੈਜ਼ੀਡੈਂਸ਼ੀਅਲ ਟਿਕਟ ਲਈ ਕੀਤੀ ਗਈ ਹੈ ਸਗੋਂ ਹੈਰਿਸ ਦੇ ਬੇਮਿਸਾਲ ਰਿਕਾਰਡ ਕਾਰਨ ਉਸ ਨੂੰ ਅੱਜ ਇਸ ਮੁਕਾਮ ਉੱਤੇ ਪਹੁੰਚਣ ਦਾ ਮੌਕਾ ਮਿਲਿਆ ਹੈ| 55 ਸਾਲਾਂ ਦੀ ਇਸੇ ਕਮਲਾ ਹੈਰਿਸ ਨੇ ਇੱਕ ਸਾਲ ਪਹਿਲਾਂ ਪ੍ਰਾਇਮਰੀ ਡਿਬੇਟ ਸਟੇਜ ਉੱਤੇ ਬਾਇਡਨ ਦੀ ਬੋਲਤੀ ਬੰਦ ਕਰਵਾ ਦਿੱਤੀ ਸੀ|
ਬਾਇਡਨ ਮੁਤਾਬਕ ਟਰੰਪ ਨੂੰ ਸ਼ਿਕਸਤ ਦੇਣ, ਸੰਕਟ ਵਿੱਚ ਘਿਰੇ ਦੇਸ਼ ਨੂੰ ਉਭਾਰਨ, ਚਰਮਰਾ ਚੁੱਕੇ ਅਰਥਚਾਰੇ ਨੂੰ ਸਾਂਭਣ ਤੇ ਨਸਲਵਾਦ ਨੂੰ ਖ਼ਤਮ ਕਰਨ ਲਈ ਉਨ੍ਹਾਂ ਨੂੰ ਹੈਰਿਸ ਵਰਗੀ ਹੀ ਦਮਦਾਰ ਸਾਥੀ ਦੀ ਲੋੜ ਸੀ| ਆਪਣੇ ਹੋਮਟਾਊਨ ਵਿਲਮਿੰਗਟਨ, ਡੈਲਾਵੇਅਰ ਵਿੱਚ ਹਾਈ ਸਕੂਲ ਦੇ ਜਿਮਨੇਜ਼ੀਅਮ ਵਿਖੇ ਬਾਇਡਨ ਨੇ ਆਖਿਆ ਕਿ ਹੈਰਿਸ ਸਮਾਰਟ, ਮਜ਼ਬੂਤ ਇਰਾਦਿਆਂ ਵਾਲੀ, ਤਜਰਬੇਕਾਰ ਮਹਿਲਾ ਹੈ| ਉਸ ਨੂੰ ਪਤਾ ਹੈ ਕਿ ਸਰਕਾਰ ਕਿਸ ਤਰ੍ਹਾਂ ਚਲਾਈ ਜਾਂਦੀ ਹੈ, ਲੋੜ ਪੈਣ ਉੱਤੇ ਸਖ਼ਤ ਫੈਸਲੇ ਕਿਸ ਤਰ੍ਹਾਂ ਕੀਤੇ ਜਾਂਦੇ ਹਨ| ਪਹਿਲੇ ਦਿਨ ਤੋਂ ਹੀ ਆਪਣਾ ਕੰਮ ਕਰਨ ਦਾ ਉਸ ਵਿੱਚ ਮਾਦਾ ਹੈ|
ਕਰੋਨਾਵਾਇਰਸ ਮਹਾਂਮਾਰੀ ਕਾਰਨ ਦੋਵੇਂ ਉਮੀਦਵਾਰ ਸਟੇਜ ਉੱਤੇ ਮਾਸਕ ਪਾ ਕੇ ਆਏ| ਮਹਾਂਮਾਰੀ ਕਾਰਨ ਇਸ ਮੌਕੇ ਬਹੁਤ ਜ਼ਿਆਦਾ ਲੋਕ ਹਾਲ ਵਿੱਚ ਮੌਜੂਦ ਨਹੀਂ ਸਨ ਜਿਵੇਂ ਕਿ ਅਮੂਮਨ ਹੁੰਦਾ ਹੈ| ਦੋਵਾਂ ਨੇ ਭਾਵੇਂ ਮਾਸਕਸ ਤੋਂ ਬਿਨਾ ਗੱਲ ਕੀਤੀ ਪਰ ਉਨ੍ਹਾਂ ਸੋਸ਼ਲ ਡਿਸਟੈਂਸਿੰਗ ਦਾ ਵੀ ਪਾਲਣ ਕੀਤਾ| ਬਾਇਡਨ ਵੱਲੋਂ ਇੱਕਠ ਨੂੰ ਸੰਬੋਧਨ ਕਰਨ ਤੋਂ ਬਾਅਦ ਹੈਰਿਸ ਨੇ ਸਟੇਜ ਸਾਂਭੀ ਤੇ ਆਖਿਆ ਕਿ ਬਾਇਡਨ ਅਜਿਹੇ ਸ਼ਖਸ ਹਨ ਜਿਹੜੇ ਅਮਰੀਕਾ ਨੂੰ ਸਮਾਨਤਾ ਤੇ ਨਿਆਂ ਵੱਲ ਲੈ ਕੇ ਜਾਣਗੇ| ਸਿਰਫ ਉਹੀ ਇਹੋ ਜਿਹੇ ਇਨਸਾਨ ਹਨ ਜਿਨ੍ਹਾਂ ਨੇ ਪਹਿਲੇ ਬਲੈਕ ਰਾਸ਼ਟਰਪਤੀ ਦੇ ਨਾਲ ਮੋਢੇ ਨਾਲ ਮੋਢਾ ਜੋੜ ਕੇ ਕੰਮ ਕੀਤਾ ਤੇ ਪਹਿਲੀ ਬਲੈਕ ਵੁਮਨ ਨੂੰ ਆਪਣੀ ਰਨਿੰਗ ਮੇਟ ਬਣਾਇਆ|