ਹਾਈਵੇਅ 401 ਉੱਤੇ ਉੱਡਦਾ ਹੋਇਆ ਟਾਇਰ ਗੱਡੀ ਨਾਲ ਟਕਰਾਉਣ ਕਾਰਨ ਡਰਾਈਵਰ ਦੀ ਮੌਤ
ਟੋਰਾਂਟੋ, 12 ਅਗਸਤ (ਪੋਸਟ ਬਿਊਰੋ) : ਟੋਰਾਂਟੋ ਦੇ ਮੁੱਖ ਹਾਈਵੇਅ ਉੱਤੇ ਇੱਕ ਟਾਇਰ ਅਚਾਨਕ ਹੀ ਉੱਡਦਾ ਹੋਇਆ ਕਿਤੋਂ ਆਇਆ ਤੇ ਇੱਕ ਗੱਡੀ ਦੇ ਸਾਹਮਣੇ ਵਾਲੇ ਹਿੱਸੇ ਨਾਲ ਜਾ ਟਕਰਾਇਆ, ਜਿਸ ਕਾਰਨ ਗੱਡੀ ਚਲਾ ਰਹੇ 24 ਸਾਲਾ ਵਿਅਕਤੀ ਦੀ ਮੌਤ ਹੋ ਗਈ|
ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਅਨੁਸਾਰ ਹਾਈਵੇਅ 401 ਉੱਤੇ ਮੈਕੌਵਨ ਤੇ ਮਾਰਖਮ ਰੋਡ ਦੇ ਨੇੜੇ ਤੇੜੇ ਇੱਕ ਪਿੱਕਅੱਪ ਟਰੱਕ ਇੱਕ ਟਰੇਲਰ ਨੂੰ ਟੋਅ ਕਰਕੇ ਲਿਜਾ ਰਿਹਾ ਸੀ ਕਿ ਟਰੇਲਰ ਦਾ ਇੱਕ ਟਾਇਰ ਨਿਕਲਕੇ ਪੂਰਬ ਵੱਲ ਜਾਂਦੀਆਂ ਲੇਨਜ਼ ਵਿੱਚ ਪਹੁੰਚ ਗਿਆ ਤੇ ਕਾਰ ਨਾਲ ਜਾ ਟਕਰਾਇਆ| ਜਿਸ ਕਾਰਨ ਗੱਡੀ ਚਲਾ ਰਹੇ ਵਿਅਕਤੀ ਦੀ ਮੌਤ ਹੋ ਗਈ|
ਓਪੀਪੀ ਦੇ ਕਾਰਜਕਾਰੀ ਸਾਰਜੈਂਟ ਡੈਨ ਹੰਟਰ ਨੇ ਆਖਿਆ ਕਿ ਇੰਜ ਲੱਗਦਾ ਹੈ ਕਿ ਦੋਵੇਂ ਗੱਡੀਆਂ ਹੀ ਹਾਈਵੇਅ ਉੱਤੇ ਪੂਰੀ ਸਪੀਡ ਨਾਲ ਜਾ ਰਹੀਆਂ ਸਨ ਤੇ ਟਾਇਰ ਪੂਰੀ ਰਫਤਾਰ ਨਾਲ ਟਰੇਲਰ ਵਿੱਚੋਂ ਨਿਕਲ ਕੇ ਦੂਜੀ ਲੇਨ ਵਿੱਚ ਜਾ ਪਹੁੰਚਿਆ ਤੇ ਹਾਦਸਾ ਵਾਪਰ ਗਿਆ| ਸਾਹਮਣੇ ਵਾਲੇ ਡਰਾਈਵਰ ਨੂੰ ਵੀ ਇਸ ਤਰ੍ਹਾਂ ਦੀ ਕੋਈ ਘਟਨਾ ਵਾਪਰਨ ਦਾ ਇਲਮ ਤੱਕ ਨਹੀਂ ਸੀ|
ਹੰਟਰ ਨੇ ਆਖਿਆ ਕਿ ਪੁਲਿਸ ਅਧਿਕਾਰੀਆਂ ਨੇ ਪਿੱਕਅੱਪ ਟਰੱਕ ਲੱਭ ਲਿਆ ਹੈ ਤੇ ਹਾਦਸੇ ਬਾਰੇ ਡਰਾਈਵਰ ਨਾਲ ਗੱਲ ਕੀਤੀ ਜਾ ਰਹੀ ਹੈ| ਉਨ੍ਹਾਂ ਆਖਿਆ ਕਿ ਅਸੀਂ ਅਜੇ ਵੀ ਚਸ਼ਮਦੀਦ ਗਵਾਹਾਂ ਜਾਂ ਡੈਸ਼ਕੈਮ ਫੁਟੇਜ ਦੀ ਭਾਲ ਕਰ ਰਹੇ ਹਾਂ| ਪੁਲਿਸ ਨੇ ਦੱਸਿਆ ਕਿ ਹਾਈਵੇਅ ਦੀਆਂ ਪੂਰਬ ਵਾਲੀਆਂ ਲੇਨਜ਼ ਨੂੰ ਹਾਲ ਦੀ ਘੜੀ ਬੰਦ ਕੀਤਾ ਗਿਆ ਹੈ|