ਟਾਂਡਾ, 12 ਅਗਸਤ (ਪੋਸਟ ਬਿਊਰੋ)- ਗੜ੍ਹਸ਼ੰਕਰ ਦੇ ਖ਼ਾਲਸਾ ਕਾਲਜ ਦੇ ਸਾਬਕਾ ਗੁਰਸਿੱਖ ਪ੍ਰਿੰਸੀਪਲ ਉਤੇ ਇਹ ਦੋਸ਼ ਲਾ ਕੇ ਕਿ ਉਸ ਦੇ ਘਰ ਮੀਟ ਤੇ ਆਂਡੇ ਦੀ ਵਰਤੋਂ ਹੁੰਦੀ ਹੈ, ਸਤਿਕਾਰ ਕਮੇਟੀ ਵੱਲੋਂ ਉਸ ਦੇ ਘਰ ਤੋਂ ਜਬਰੀ ਗੁਰੂ ਗ੍ਰੰਥ ਸਾਹਿਬ ਦਾ ਸਰੂਪ ਚੁੱਕਣ ਦਾ ਮਾਮਲਾ ਭਖ ਗਿਆ ਹੈ। ਪ੍ਰਿੰਸੀਪਲ ਨੂੰ ਇਸ ਦੀ ਸਿ਼ਕਾਇਤ ਪੁਲਸ ਕੋਲ ਵੀ ਤੇ ਅਕਾਲ ਤਖ਼ਤ ਦੇ ਜਥੇਦਾਰ ਨੂੰ ਵੀ ਭੇਜੀ ਹੈ। ਸੂਝਵਾਨ ਸਿੱਖ ਇੱਕ ਜਥੇਬੰਦੀ ਵੱਲੋਂ ਏਦਾਂ ਲੋਕਾਂ ਨੂੰ ਬ੍ਰਾਹਮਣੀ ਢੰਗ ਨਾਲ ਬਾਣੀ ਤੋਂ ਦੂਰ ਕਰਨ ਦੀ ਜਬਰਦਸਤੀ ਨੂੰ ਪਸੰਦ ਨਹੀਂ ਕਰ ਰਹੇ ਤੇ ਨਾ ਇਹ ਹੀ ਮੰਨਦੇ ਹਨ ਕਿ ਮੀਟ ਆਂਡਾ ਖਾਣ ਵਾਲਾ ਸਿੱਖ ਆਪਣੇ ਘਰ ਵਿੱਚ ਗੁਰੂ ਗ੍ਰੰਥ ਸਾਹਿਬ ਦਾ ਪ੍ਰਕਾਸ਼ ਨਹੀਂ ਕਰ ਸਕਦਾ।
ਇਤਹਾਸ ਮੁਤਾਬਕ ਕਿਸੇ ਸਮੇਂ ਬ੍ਰਾਹਮਣਾਂ ਨੇ ਗ਼ੈਰ-ਬ੍ਰਾਹਮਣਾਂ ਅਤੇ ਖ਼ਾਸ ਤੌਰ 'ਤੇ ਦਲਿਤਾਂ ਉਪਰ ਵੇਦ ਅਤੇ ਪੁਰਾਣ ਪੜ੍ਹਨ ਤੇ ਸੁਣਨ ਉਤੇ ਪਾਬੰਦੀ ਲਾ ਦਿੱਤੀ ਸੀ। ਉਹ ਜਿਸ ਕਿਸਮ ਦਾ ਜਾਤ ਆਧਾਰਤ ਕੱਟੜਵਾਦ ਸੀ, ਉਸ ਨੂੰ ਆਖਰ ਸਮਾਂ ਪਾ ਕੇ ਵਾਪਸ ਲੈਣ ਪਿਆ ਸੀ। ਅੱਜ ਕੱਲ੍ਹ ਕੁਝ ਸਿੱਖ ਕੱਟੜਵਾਦੀ ਵੀ ਇਹ ਕਹਿ ਕੇ ਸਿੱਖਾਂ ਦੇ ਘਰਾਂ ਤੋਂ ਗੁਰੂ ਗ੍ਰੰਥ ਸਾਹਿਬ ਜਬਰੀ ਚੁੱਕ ਕੇ ਦੋਸ਼ ਲਾ ਰਹੇ ਹਨ ਕਿ ਇਸ ਘਰ ਵਿੱਚ ਮੀਟ ਆਂਡੇ ਦੀ ਵਰਤੋਂ ਕੀਤੀ ਜਾਂਦੀ ਹੈ, ਪਰ ਉਹ ਇਹ ਨਹੀਂ ਦੱਸਦੇ ਕਿ ਸਿੱਖ ਰਹਿਤ ਮਰਿਆਦਾ ਜਾਂ ਸ਼੍ਰੋਮਣੀ ਕਮੇਟੀ ਦੇ ਕਿਸੇ ਮਤੇ ਵਿੱਚ ਲਿਖਿਆ ਹੈ ਕਿ ਕੇਵਲ ਦਾਲ-ਭਾਜੀ ਖਾਣ ਵਾਲੇ ਹੀ ਗੁਰੂ ਗ੍ਰੰਥ ਸਾਹਿਬ ਦਾ ਬਾਣੀ ਘਰ ਵਿੱਚ ਰੱਖ ਸਕਦੇ ਹਨ। ਆਮ ਸਿੱਖਾਂ ਦੀ ਰਾਏ ਹੈ ਕਿ ਗੁਰੂ ਗ੍ਰੰਥ ਸਾਹਿਬ ਸਤਿਕਾਰ ਕਮੇਟੀ ਅਸਲ ਵਿੱਚ ਸਤਿਕਾਰ ਸ਼ਬਦ ਦੀ ਦੁਰਵਰਤੋਂ ਕਰ ਕੇ ਲੋਕਾਂ ਨੂੰ ਗੁਰਬਾਣੀ ਤੋਂ ਦੂਰ ਕਰ ਰਹੀ ਹੈ। ਇਹ ਕੇਸ ਅਕਾਲ ਤਖ਼ਤ ਤੋਂ ਬਿਨਾ ਪੁਲਸ ਕੋਲ ਵੀ ਪੁੱਜ ਗਿਆ ਹੈ ਕਿਉਂਕਿ ਇਸ ਵਾਰ ਖ਼ਾਲਸਾ ਕਾਲਜ ਦੇ ਸਾਬਕਾ ਪ੍ਰਿੰਸੀਪਲ ਨਾਲ ਏਦਾਂ ਹੋਈ ਹੈ।
ਗੜ੍ਹਸ਼ੰਕਰ ਦੇ ਖ਼ਾਲਸਾ ਕਾਲਜ ਦੇ ਸੇਵਾ ਮੁਕਤ ਪ੍ਰਿੰਸੀਪਲ ਜਸਵੰਤ ਸਿੰਘ ਟਾਂਡਾ ਨੇ ਦੱਸਿਆ ਕਿ 9 ਅਗਸਤ ਨੂੰ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਸਤਿਕਾਰ ਕਮੇਟੀ ਨਾਲ ਸਬੰਧਤ ਕੁਝ ਲੋਕ ਉਨ੍ਹਾਂ ਦੇ ਘਰ ਆਏ ਅਤੇ ਘਰ ਵਿੱਚ ਪ੍ਰਕਾਸ਼ ਕੀਤੇ ਗੁਰੂ ਗ੍ਰੰਥ ਸਾਹਿਬ ਦੇ ਸਰੂਪ ਨੂੰ ਜਬਰੀ ਲੈ ਗਏ। ਦੂਸਰੇ ਪਾਸੇ ਸ੍ਰੀ ਗੁਰੂ ਗ੍ਰੰਥ ਸਤਿਕਾਰ ਕਮੇਟੀ ਦੇ ਬਲਬੀਰ ਸਿੰਘ ਮੁੱਛਲ ਨੇ ਦੱਸਿਆ ਕਿ ਪ੍ਰਿੰਸੀਪਲ ਟਾਂਡਾ ਦੇ ਘਰ ਮੌਜੂਦ ਗੁਰੂ ਗ੍ਰੰਥ ਸਾਹਿਬ ਦਾ ਸਰੂਪ ਬੇਹਦ ਬਿਰਧ ਹਾਲਤ ਵਿੱਚ ਸੀ। ਉਹ ਮਾਸ ਅਤੇ ਆਂਡੇ ਦਾ ਸੇਵਨ ਕਰਦੇ ਹਨ ਤੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦਾ ਸਤਿਕਾਰ ਕਾਇਮ ਨਹੀਂ ਸੀ ਰੱਖਿਆ ਗਿਆ। ਉਨ੍ਹਾਂ ਦੱਸਿਆ ਕਿ ਪ੍ਰਿੰਸੀਪਲ ਟਾਂਡਾ ਦੇ ਘਰੋਂ ਕੁਝ ਗੁਟਕਾ ਸਾਹਿਬ ਮਿਲੇ ਹਨ ਜੋ ਕੈਂਚੀ ਨਾਲ ਕੱਟੇ ਹੋਏ ਸਨ। ਪ੍ਰਿੰਸੀਪਲ ਟਾਂਡਾ ਨੇ ਦੱਸਿਆ ਕਿ ਉਹ ਕਿਰਤੀ ਸਿੱਖ ਹਨ ਤੇ ਕਰੀਬ 40 ਸਾਲ ਤੋਂ ਗੁਰੂ ਗ੍ਰੰਥ ਸਾਹਿਬ ਦਾ ਪਾਠ ਕਰਦੇ ਆ ਰਹੇ ਹਨ। ਅਸੀਂ ਕਦੇ ਗੁਰੂ ਗ੍ਰੰਥ ਸਾਹਿਬ ਦੇ ਸਤਿਕਾਰ ਵਿੱਚ ਵੀ ਕਮੀ ਨਹੀਂ ਆਉਣ ਦਿੱਤੀ। ਉਨ੍ਹਾਂ ਨੇ ਪੁਲਸ ਨੂੰ ਕੀਤੀ ਸ਼ਿਕਾਇਤ ਵਿੱਚ ਕਿਹਾ ਹੈ ਕਿ ਉਹ ਅੰਮ੍ਰਿਤਧਾਰੀ ਸਿੱਖ ਹਨ ਤੇ ਕੁਝ ਲੋਕ ਜਬਰੀ ਉਨ੍ਹਾਂ ਦੇ ਘਰ ਵਿੱਚ ਦਾਖ਼ਲ ਹੋ ਗਏ ਅਤੇ ਆ ਕੇ ਗੁਰੂ ਗ੍ਰੰਥ ਸਾਹਿਬ ਦਾ ਸਰੂਪ ਜਬਰੀ ਲੈ ਗਏ ਹਨ।