ਬਠਿੰਡਾ, 12 ਅਗਸਤ (ਪੋਸਟ ਬਿਊਰੋ)- ਪੰਜਾਬ ਵਿੱਚ ਬਹੁਤ ਸਾਰੀ ਬਿਜਲੀ ਚੋਰੀ ਹੋਣ ਦੇ ਕਾਰਨ ਆਰਥਕ ਬੋਝ ਆਮ ਲੋਕਾਂ ਉਤੇ ਪੈਂਦਾ ਹੈ ਜਿਸ ਕਾਰਨ ਹੋਰ ਰਾਜਾਂ ਮੁਕਾਬਲੇ ਮਹਿੰਗੀ ਬਿਜਲੀ ਨੇ ਪੰਜਾਬ ਸਰਕਾਰ ਨੂੰ ਵੀ ਕਈ ਵਾਰ ਸਿਆਸੀ ਤੌਰ 'ਤੇ ਕਟਿਹਰੇ ਵਿੱਚ ਖੜਾ ਕੀਤਾ ਹੈ। ਇਸ ਸਬੰਧੀ ਆਰ ਟੀ ਆਈ ਹੇਠ ਕੁਝ ਅਜਿਹੇ ਖੁਲਾਸੇ ਹੋਏ ਜਿਸ ਦੇ ਅਨੁਸਾਰ ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ ਸਿੰਘ ਬਾਦਲ ਦੇ ਹਲਕੇ ਲੰਬੀ ਵਿੱਚ ਰਿਕਾਰਡ ਤੋੜ ਪੰਜਾਬ ਵਿੱਚ ਸਭ ਤੋਂ ਵਧੇਰੇ ਬਿਜਲੀ ਚੋਰੀ ਹੁੰਦੀ ਹੈ ਅਤੇ ਇਸ ਹਲਕੇ ਵਿੱਚ ਬਾਦਲ ਪਿੰਡ ਇਸ ਪੱਖੋਂ ਮੋਹਰੀ ਹੈ।
ਸਹਾਇਕ ਕਾਰਜਕਾਰੀ ਇੰਜੀਨੀਅਰ (ਡਿਸਟਰੀਬਿਊਸ਼ਨ) ਸਬ ਡਵੀਜ਼ਨ ਲੰਬੀ ਤੋਂ ਆਰ ਟੀ ਆਈ ਕਾਰਕੁੰਨ ਸੱਤਪਾਲ ਗੋਇਲ ਵੱਲੋਂ ਮੰਗੀ ਜਾਣਕਾਰੀ ਉੱਤੇ ਹੋਏ ਖੁਲਾਸੇ ਆਪਣੇ ਆਪ ਵਿੱਚ ਰਿਕਾਰਡ ਹਨ। ਸਹਾਇਕ ਕਾਰਜਕਾਰੀ ਇੰਜੀਨੀਅਰ ਦੇ ਦਸਖਤਾਂ ਹੇਠ ਮਿਲੇ ਪੱਤਰ ਅਨੁਸਾਰ ਇਸ ਦਫ਼ਤਰ ਅਧੀਨ ਪਹਿਲੀ ਅਪ੍ਰੈਲ 2018 ਤੋਂ 31 ਮਾਰਚ 19 ਤੱਕ 13.23 ਲੱਖ ਯੂਨਿਟ ਚੋਰੀ ਹੋਣ ਕਰਕੇ ਲੀਕੇਜ ਹੋਈ ਹੈ ਜਦ ਕਿ ਸਾਲ 2018-19 ਵਿੱਚ 325 ਖਪਤਕਾਰ ਚੋਰੀ ਕਰਦੇ ਫੜੇ ਗਏ ਸਨ, ਜਿਨ੍ਹਾਂ ਤੋਂ 33.23 ਲੱਖ ਰੁਪਏ ਰਿਕਵਰੀ ਕੀਤੀ ਗਈ ਹੈ ਤੇ ਇਸੇ ਦੌਰਾਨ ਐਮ ਈ ਲੈਬ ਬਠਿੰਡਾ ਵਿਖੇ 17 ਮੀਟਰ ਭੇਜੇ ਗਏ, ਜਿਹੜੇ ਬਿਜਲੀ ਚੋਰੀ ਵਾਲੇ ਕੇਸ ਨਿਕਲੇ। ਇਸੇ ਦਫ਼ਤਰ ਦਾ ਇੱਕ ਮਾਮਲਾ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਚੰਡੀਗੜ੍ਹ ਵਿੱਚ ਚਲ ਰਿਹਾ ਹੈ।
ਇਸੇ ਸੂਚਨਾ ਵਿੱਚ ਆਰ ਟੀ ਆਈ ਵਰਕਰ ਸੱਤਪਾਲ ਗੋਇਲ ਖੁਲਾਸਾ ਕੀਤਾ ਕਿ ਲੰਬੀ ਹਲਕੇ ਅੰਦਰ ਵੀ ਸਭ ਤੋਂ ਵੱਧ ਬਿਜਲੀ ਚੋਰੀ ਸਾਬਕਾ ਮੁੱਖ ਮੰਤਰੀ ਦੇ ਪਿੰਡ ਬਾਦਲ ਵਿਖੇ ਹੁੰਦੀ ਹੈ। ਸਹਾਇਕ ਕਾਰਜਕਾਰੀ ਇੰਜੀਨੀਅਰ (ਵੰਡ) ਸਬ ਡਵੀਜ਼ਨ ਬਾਦਲ ਦੇ ਅਨੁਸਾਰ ਪਹਿਲੀ ਅਪ੍ਰੈਲ 2-18 ਤੋਂ ਮਾਰਚ 19 ਦੇ ਅੰਤ ਤੱਕ 1.84 ਲੱਖ ਯੂਨਿਟ ਬਿਜਲੀ ਚੋਰੀ ਹੋਣ ਕਰਕੇ ਲੀਕੇਜ ਹੋਈ ਹੈ, ਪਰ ਸਿਰਫ 30 ਮੀਟਰ ਐਮ ਈ ਲੈਬ ਵਿੱਚ ਭੇਜੇ ਗਏ ਸਨ।