ਨਵੀਂ ਦਿੱਲੀ, 12 (ਪੋਸਟ ਬਿਊਰੋ)- ਜਰਮਨ ਆਟੋ ਪ੍ਰਮੁੱਖ ਫੌਕਸਵੈਗਨ ਦੇ ਭਾਰਤ ਦੇ ਮੁਖੀ ਨੇ ਕਿਹਾ ਕਿ ਭਾਰਤ ਵਿੱਚ ਵਪਾਰ ਕਰਨਾ ਸੌਖਾਲਾ ਨਹੀਂ ਹੈ। ਇਸ ਗਰੁੱਪ ਦੇ ਭਾਰਤ ਵਿਚਲੇ ਕਾਰੋਬਾਰਾਂ ਅਤੇ ਕੰਪਨੀਆਂ (ਸਕੋਡਾ, ਬੀ ਐਮ ਡਬਲਯੂ, ਆਡੀ, ਲੈਬੋਰਗਿਨੀ, ਪੋਰਸ਼) ਦੇ ਐਮ ਡੀ ਗੁਰਪ੍ਰਤਾਪ ਐਸ ਬੋਪਾਰਾਏ ਨੇ ਕਿਹਾ ਕਿ ਚੀਨ ਤੋਂ ਅਹਿਮ ਚੀਜ਼ਾਂ ਦੀ ਇੰਪੋਰਟ 'ਤੇ ਪਾਬੰਦੀ ਲਾਉਣੀ ਜਾਂ ਦੇਰੀ ਕਰਨਾ ਇੱਕ ਸਖ਼ਤ ਕਦਮ ਹੈ।
ਇਸ ਬਾਰੇ ਗੁਰਪ੍ਰਤਾਪ ਐੱਸ ਬੋਪਾਰਾਏ ਨੇ ਕਿਹਾ ਕਿ ਇੰਪੋਰਟ 'ਤੇ ਪਾਬੰਦੀ ਨਾਲ ਭਾਰਤ ਦੀ ਘਰੇਲੂ ਮੁਕਾਬਲੇ ਨੂੰ ਨੁਕਸਾਨ ਹੋਵੇਗਾ ਅਤੇ ਦੇਸ਼ ਦੀਆਂ ਐਕਸਪੋਰਟ ਸੰਭਾਵਨਾਵਾਂ 'ਚ ਰੁਕਾਵਟ ਪੈਦਾ ਹੋਵੇਗੀ। ਉਨ੍ਹਾਂ ਕਿਹਾ ਕਿ ਜੋ ਅਸੀਂ ਇੱਕ ਐਕਸਪੋਰਟਰ ਬਣਨਾ ਚਾਹੁੰਦੇ ਹਾਂ ਤਾਂ ਐਕਸਪੋਰਟ ਮੁਕਾਬਲੇ ਲਈ ਇਲੈਕਟ੍ਰਾਨਿਕਸ ਸਮੇਤ ਕੁਝ ਇੰਪੋਰਟ ਜ਼ਰੂਰੀ ਹੈ।
ਫੌਕਸਵੈਗਨ ਗਰੁੱਪ ਦੀਆਂ ਭਾਰਤ ਵਿੱਚ ਦੋ ਫੈਕਟਰੀਆਂ ਪੁਣੇ ਅਤੇ ਔਰੰਗਾਬਾਦ 'ਚ ਹਨ ਅਤੇ ਸਥਾਨਕ ਤੌਰ 'ਤੇ ਉਹ ਸਕੋਡਾ, ਫੌਕਸਵੈਗਨ ਅਤੇ ਆਡੀ ਵਰਗੇ ਬ੍ਰਾਂਡਾਂ ਦੇ ਮਾਡਲ ਬਣਾਉਂਦੀਆਂ ਹਨ। ਕੰਪਨੀ ਦੁਕਾਤੀ ਮੋਟਰਸਾਈਕਲਾਂ ਤੋਂ ਇਲਾਵਾ ਪੋਰਸ਼, ਲੈਬੋਰਗਿਨੀ ਆਦਿ ਵਾਹਨਾਂ ਦੀ ਇੰਪੋਰਟ ਵੀ ਕਰਦੀ ਹੈ।