ਸਾਲ 2018 ਵਿੱਚ ਵਿਸ਼ਾਲ ਭਾਰਦਵਾਜ ਦੀ ਫਿਲਮ ‘ਪਟਾਕਾ’ ਨਾਲ ਵੱਡੇ ਪਰਦੇ 'ਤੇ ਡੈਬਿਊ ਕਰ ਚੁੱਕੀ ਰਾਧਿਕਾ ਮਦਾਨ ਨੇ ਇਸ ਤੋਂ ਪਹਿਲਾਂ 2014 ਵਿੱਚ ਛੋਟੇ ਪਰਦੇ 'ਤੇ ਸੀਰੀਅਲ ‘ਮੇਰੀ ਆਸ਼ਿਕੀ ਤੁਮ ਸੇ ਹੀ’ ਨਾਲ ਆਪਣਾ ਅਭਿਨੈ ਕਰੀਅਰ ਸ਼ੁਰੂ ਕੀਤਾ ਸੀ। ਉਂਝ ਉਸ ਤੋਂ ਪਹਿਲਾਂ ਉਹ ਬਤੌਰ ਡਾਂਸ ਇੰਸਟ੍ਰਕਟਰ ਕੰਮ ਕਰ ਚੁੱਕੀ ਸੀ। ਰਾਧਿਕਾ ਦੀ ਦੂਜੀ ਫਿਲਮ ‘ਮਰਦ ਕੋ ਦਰਦ ਨਹੀਂ ਹੋਤਾ’ ਅਤੇ ਪਿਛਲੀ ਫਿਲਮ ‘ਹਿੰਦੀ ਮੀਡੀਅਮ’ ਵਿੱਚ ਉਸ ਦੀ ਐਕਟਿੰਗ ਨੂੰ ਖੂਬ ਪਸੰਦ ਕੀਤਾ ਗਿਆ। ਉਸ ਦੀ ਝੋਲੀ 'ਚ ਫਿਲਮ ‘ਸ਼ਿੱਦਤ’ ਹੈ। ਪੇਸ਼ ਹਨ ਰਾਧਿਕਾ ਨਾਲ ਹੋਈ ਇੱਕ ਗੱਲਬਾਤ ਦੇ ਕੁਝ ਅੰਸ਼ :
* ਪਿਛਲੀ ਫਿਲਮ ‘ਅੰਗਰੇਜ਼ੀ ਮੀਡੀਅਮ’ ਲਈ ਖੁਦ ਨੂੰ ਸਕੂਲ ਗਰਲ ਦੀ ਸ਼ੇਪ 'ਚ ਲਿਆਉਣਾ ਕਿੰਨਾ ਮੁਸ਼ਕਲ ਰਿਹਾ?
-ਮੈਨੂੰ ਇਕ ਸਕੂਲ ਗਰਲ ਦੀ ਤਰ੍ਹਾਂ ਦਿਸਣ ਲਈ ਕਾਫੀ ਮਿਹਨਤ ਕਰਨੀ ਪਈ ਅਤੇ ਮਨ 'ਤੇ ਕੰਟਰੋਲ ਵੀ ਕਰਨਾ ਪਿਆ। ਕਿਉਂਕਿ ਮੈਂ ਹੈਲਦੀ ਨਹੀਂ ਦਿਸਣਾ ਸੀ, ਇਸ ਲਈ ਮੈਂ ਬਾਡੀ ਨੂੰ ਸ਼ੇਪ ਵਿੱਚ ਲਿਆਉਣ ਲਈ ਯੋਗਾ ਅਤੇ ਕਾਰਡੀਓ ਦਾ ਸਹਾਰਾ ਲਿਆ। ਇਹੀ ਨਹੀਂ ਮੈਂ ਸ਼ਾਕਾਹਾਰੀ ਬਣਨ ਦਾ ਫੈਸਲਾ ਵੀ ਲਿਆ, ਜੋ ਮੈਂ ਕੀਤਾ ਉਸ ਨਾਲ ਮੈਨੂੰ ਕਿਰਦਾਰ ਵਿੱਚ ਢਲਣ ਵਿੱਚ ਮਦਦ ਮਿਲੀ। ਮੈਂ ਡਾਈਟ ਦਾ ਸਖਤੀ ਨਾਲ ਪਾਲਣ ਕੀਤਾ ਤੇ ਅੰਗੂਰ ਤੱਕ ਨਹੀਂ ਖਾਧੇ। ਮੈਂ ਦਿਨ 'ਚ ਦੋ ਵਾਰ ਵਰਕਆਊਟ ਕਰਦੀ ਸੀ, ਪਰ ਸਖਤ ਮਿਹਨਤ ਤੋਂ ਬਾਅਦ ਮੇਰੀ ਬਾਡੀ ਕਿਰਦਾਰ ਦੇ ਅਨੁਸਾਰ ਸ਼ੇਪ 'ਚ ਆ ਗਈ।
* ਅੱਗੇ ਕਿਸ ਤਰ੍ਹਾਂ ਦੀਆਂ ਫਿਲਮਾਂ ਅਤੇ ਰੋਲ ਕਰਨਾ ਚਾਹੰੁਦੇ ਹੋ?
-ਮੈਂ ਹਰ ਫਿਲਮ ਨਾਲ ਕੁਝ ਨਵਾਂ ਕਰਨਾ ਚਾਹੁੰਦੀ ਹਾਂ। ਅੱਜ ਅਸੀਂ ਨਵੀਂ ਤਰ੍ਹਾਂ ਦੀਆਂ ਫਿਲਮਾਂ ਦਾ ਤਜਰਬਾ ਕਰ ਰਹੇ ਹਾਂ ਮੈਂ ਇਨ੍ਹਾਂ ਫਿਲਮਾਂ ਦਾ ਹਿੱਸਾ ਬਣਨਾ ਚਾਹੰੁਦੀ ਹਾਂ। ‘ਪਟਾਕਾ’ ਫਿਲਮ ‘ਮਰਦ ਕੋ ਦਰਦ ਨਹੀਂ ਹੋਤਾ' ਤੋਂ ਕਾਫੀ ਵੱਖਰੀ ਸੀ ਅਤੇ ‘ਅੰਗੇਰਜ਼ੀ ਮੀਡੀਅਮ’ ਵੀ ਅਜਿਹੀ ਹੈ। ਮੈਂ ਕਿਸੇ ਕੰਫਰਟ ਜ਼ੋਨ 'ਚ ਨਹੀਂ ਰਹਿਣਾ ਚਾਹੰੁਦੀ ਸਗੋਂ ਜੋ ਕੁਝ ਵੀ ਕਰਦੀ ਹਾਂ, ਉਸ ਤੋਂ ਲੋਕਾਂ ਨੂੰ ਹੈਰਾਨ ਕਰਨਾ ਚਾਹੁੰਦੀ ਹਾਂ। ਮੈਂ ਐਕਟਰ ਹਾਂ। ਮੈਨੂੰ ਐਕਟਿੰਗ ਕਰਨ ਦਿਓ, ਆਡੀਸ਼ਨ ਦੇਣ ਦਿਓ, ਮੈਨੂੰ ਦੱਸਣ ਦਿਓ ਕਿ ਮੈਂ ਕੀ ਕਰ ਸਕਦੀ ਹਾਂ। ਤੁਹਾਨੂੰ ਹਰ ਸਮੇਂ ਖੁਦ ਨੂੰ ਸਰਪ੍ਰਾਈਜ਼ ਕਰਨ ਦੀ ਲੋੜ ਹੈ ਅਤੇ ਇਹੀ ਦਰਸ਼ਕਾਂ ਨੂੰ ਵੀ ਹੈਰਾਨ ਕਰਦਾ ਹੈ।
* ਪਿਛਲੇ ਦਿਨੀਂ ਤੁਸੀਂ ‘ਬਾਰ ਬ੍ਰਾ ਦੇਖੋ’ ਨਾਂਅ ਦੀ ਮੁਹਿੰਮ ਦਾ ਸਮਰਥਨ ਕੀਤਾ ਸੀ। ਇਸ ਦੇ ਬਾਰੇ ਦੱਸੋ?
-ਇਹ ਇੱਕ ਅਨੋਖੀ ਪਹਿਲ ਹੈ ਜਿਸ ਦੇ ਤਹਿਤ ਬ੍ਰਾ ਸਟ੍ਰੈਪ ਬਾਰੇ ਸ਼ਰਮਸਾਰ ਹੋਣ ਦੇ ਵਿਰੁੱਧ ਆਵਾਜ਼ ਉਠਾਈ ਜਾਵੇਗੀ ਅਤੇ ਇਸ ਦੇ ਨਾਲ ਇਸ ਬਾਰੇ ਗੱਲ ਕੀਤੀ ਜਾਵੇਗੀ ਤਾਂ ਕਿ ਲੋਕ ਇਸ ਨੂੰ ਆਮ ਤੌਰ 'ਤੇ ਲੈਣ। ਰੋਜ਼ਾਨਾ ਸਫਰ ਦੌਰਾਨ ਜਾਂ ਕਿਤੇ ਹੋਰ ਵੀ ਕਈ ਵਾਰ ਅਸੀਂ ਸਭ ਨੇ ਅਜੀਬ ਜਿਹੀਆਂ ਭੱਦੀਆਂ ਨਜ਼ਰਾਂ ਨਾਲ ਦੇਖੇ ਜਾਣ ਵਾਲੇ ਗਲਤ ਤਰੀਕੇ ਨਾਲ ਛੂਹਣ ਵਰਗੀਆਂ ਚੀਜ਼ਾਂ ਦਾ ਸਾਹਮਣਾ ਕੀਤਾ ਹੈ। ਮੈਨੂੰ ਇਹ ਦੇਖ ਕੇ ਗੁੱਸਾ ਆਉਂਦਾ ਹੈ ਕਿ ਕਿਸ ਤਰ੍ਹਾਂ ਨਾਲ ਅੱਜ ਵੀ ਬ੍ਰਾ ਸਟ੍ਰੈਪ ਨੂੰ ਦੇਖੇ ਜਾਣ ਵਰਗੀ ਕਿਸੇ ਚੀਜ਼ ਬਾਰੇ ਔਰਤਾਂ ਨੂੰ ਪਰਖਿਆ ਜਾਂਦਾ ਹੈ। ਇਸ ਨੂੰ ਕਾਫੀ ਪਹਿਲਾਂ ਸਾਧਾਰਨ ਤੌਰ 'ਤੇ ਲਿਆ ਜਾਣਾ ਚਾਹੀਦਾ ਸੀ। ਕੱਪੜੇ ਕਿਸੇ ਨੂੰ ਪਰਿਭਾਸ਼ਿਤ ਨਹੀਂ ਕਰਦੇ। ਇਹ ਪੂਰੀ ਤਰ੍ਹਾਂ ਨਾਲ ਇੱਕ ਮਹਿਲਾ ਦੀ ਇੱਛਾ 'ਤੇ ਨਿਰਭਰ ਹੈ ਕਿ ਕੀ ਪਹਿਨੇ ਅਤੇ ਕਿਵੇਂ ਪਹਿਨੇ। ‘ਬਾਰ ਬ੍ਰਾ ਦੇਖੋ’ ਵਰਗੀ ਪਹਿਲ ਨਾਲ ਆਪਣੀ ਆਵਾਜ਼ ਉਠਾ ਕੇ ਮੈਂ ਖੁਸ਼ ਹਾਂ। ਜੋ ਔਰਤਾਂ ਨੂੰ ਸਹਿਜ ਮਹਿਸੂਸ ਕਰਾਉਣ ਲਈ ਹੈ। ਬ੍ਰਾ ਦੇ ਸਟ੍ਰੈਪ ਨੂੰ ਦਿਖਾਉਣ 'ਚ ਅਜੀਬ ਮਹਿਸੂਸ ਨਾ ਕਰੋ।
* ਕੀ ਤੁਸੀਂ ਵੀ ਅਜਿਹਾ ਕੁਝ ਝੱਲਿਆ ਹੈ?
- ਮੈਂ ਸਕੂਲ ਵਿੱਚ ਸੀ ਤੇ ਉਹ ਸਮਾਂ ਸੀ ਜਦੋਂ ਤੁਸੀਂ ਵੱਡੇ ਹੋ ਰਹੇ ਹੁੰਦੇ ਹੋ ਅਤੇ ਨਵੀਆਂ-ਨਵੀਆਂ ਚੀਜ਼ਾਂ ਟਰਾਈ ਕਰਦੇ ਹੋ। ਇੱਕ ਦਿਨ ਮੈਂ ਕਲਰਫੁੱਲ ਬ੍ਰਾ ਪਹਿਨ ਕੇ ਗਈ। ਇੱਕ ਲੜਕਾ ਮੇਰੇ ਕੋਲ ਆਇਆ ਅਤੇ ਉਸ ਨੇ ਕਿਹਾ ਕਿ ਤੇਰੀ ਬ੍ਰਾ ਦੀ ਸਟ੍ਰੈਪ ਦਿਸ ਰਹੀ ਹੈ। ਉਸ ਟਾਈਮ ਮੈਨੂੰ ਲੱਗਾ ਕਿ ਬ੍ਰਾ ਦੀ ਸਟ੍ਰੈਪ ਦਿਸਣਾ ਪਾਪ ਹੋ ਗਿਆ, ਮਤਲਬ ਅਜਿਹਾ ਨਹੀਂ ਕਰ ਸਕਦੇ। ਮੈਨੂੰ ਉਸ ਸਮੇਂ ਬਹੁਤ ਸ਼ਰਮਿੰਦਗੀ ਹੋਈ। ਅੱਜ ਮੈਂ ਜਾਣਦੀ ਹਾਂ ਕਿ ਇਸ 'ਚ ਸ਼ਰਮ ਦੀ ਕੋਈ ਗੱਲ ਨਹੀਂ ਹੈ ਇਸ ਲਈ ਸ਼ਰਮਾਉਣ ਦੀ ਵੀ ਲੋੜ ਨਹੀਂ ਹੈ।
* ‘ਅੰਗਰੇੇਜ਼ੀ ਮੀਡੀਅਮ’ ਫਿਲਮ ਦੇ ਸੈੱਟ 'ਤੇ ਇਰਫਾਨ ਨਾਲ ਆਪਣੇ ਰਿਸ਼ਤੇ ਦੇ ਬਾਰੇ ਕੁਝ ਦੱਸੋ?
- ਮੈਂ ਉਨ੍ਹਾਂ ਨੂੰ ਹਮੇਸ਼ਾ ਪਾਪਾ ਜਾਂ ਡੈਡ ਕਹਿ ਕੇ ਬੁਲਾਉਂਦੀ ਸੀ। ਮੈਂ ਉਨ੍ਹਾਂ ਨੂੰ ਕਦੇ ਸਰ ਕਹਿ ਕੇ ਸੰਬੋਧਨ ਨਹੀਂ ਕੀਤਾ, ਮੈਂ ਹਮੇਸ਼ਾ ਉਨ੍ਹਾਂ ਨੂੰ ਪਾਪਾ ਜਾਂ ਡੈਡ ਕਹਿ ਕੇ ਬੁਲਾਉਂਦੀ ਸੀ। ਉਹ ਬੱਸ ਮੁਸਕਰਾ ਦਿੰਦੇ ਸਨ। ਮੈਨੂੰ ਯਾਦ ਹੈ ਕਿ ਜਦ ਮੈਂ ਉਨ੍ਹਾਂ ਨੂੰ ਪਹਿਲੀ ਵਾਰ ਮਿਲੀ ਅਤੇ ਮੈਂ ਉਨ੍ਹਾਂ ਨੂੰ ‘ਡੈਡ’ ਕਿਹਾ ਤਾਂ ਇਸ ਬਾਰੇ ਅਜੀਬ ਮਹਿਸੂਸ ਕਰਨ ਦੇ ਬਜਾਏ ਮੈਨੂੰ ਗਲੇ ਲਾ ਲਿਆ ਸੀ। ਮੈਂ ਹਮੇਸ਼ਾ ਉਨ੍ਹਾਂ ਨੂੰ ਡੈਡ ਵਜੋਂ ਯਾਦ ਰੱਖਾਂਗੀ। ਮੈਂ ਇੱਕ ਕਲਾਕਾਰ ਅਤੇ ਇੱਕ ਵਿਅਕਤੀ ਦੇ ਰੂਪ ਵਿੱਚ ਉਨ੍ਹਾਂ ਤੋਂ ਬਹੁਤ ਕੁਝ ਸਿਖਿਆ। ਉਨ੍ਹਾਂ ਨਾਲ ਕੰਮ ਕਰਨਾ ਮੇਰੀ ਇੱਛਾ ਸੂਚੀ ਵਿੱਚ ਇੱਕ ਵੱਡਾ ਅਤੇ ਸਹੀ ਨਿਸ਼ਾਨਾ ਸੀ।