ਸਿਟੀ ਆਫ ਵਾਅਨ ਵੱਲੋਂ ਕੀਤੀ ਜਾ ਰਹੀ ਹੈ
1100 ਵਰਕਰਜ਼ ਦੀ ਛਾਂਗੀ
ਟੋਰਾਂਟੋ, 11 ਅਗਸਤ (ਪੋਸਟ ਬਿਊਰੋ) : ਕੋਵਿਡ-19 ਮਹਾਂਮਾਰੀ ਕਾਰਨ ਸਿਟੀ ਆਫ ਵਾਅਨ ਵੱਲੋਂ ਅਸਥਾਈ ਤੌਰ ਉੱਤੇ ਆਪਣੇ 1100 ਵਰਕਰਜ਼ ਦੀ ਛਾਂਗੀ ਕੀਤੀ ਜਾ ਰਹੀ ਹੈ|
ਸਿਟੀ ਦੇ ਬੁਲਾਰੇ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਕੋਵਿਡ-19 ਮਹਾਂਮਾਰੀ ਦੌਰਾਨ ਵਾਅਨ ਅਤੇ ਓਨਟਾਰੀਓ ਵਿੱਚ ਐਲਾਨੀ ਗਈ ਸਟੇਟ ਆਫ ਐਮਰਜੰਸੀ ਕਾਰਨ ਸਿਟੀ ਦੀਆਂ ਸੇਵਾਵਾਂ ਕਈ ਤਰ੍ਹਾਂ ਨਾਲ ਪ੍ਰਭਾਵਿਤ ਹੋਈਆਂ ਹਨ| ਇਸ ਦੌਰਾਨ ਜਨਤਾ ਲਈ ਸਿਟੀ ਦੀਆਂ ਕਈ ਫੈਸਿਲਿਟੀਜ਼ ਆਰਜ਼ੀ ਤੌਰ ਉੱਤੇ ਬੰਦ ਕਰਨੀਆਂ ਪਈਆਂ ਹਨ ਤੇ ਕਈ ਪ੍ਰੋਗਰਾਮ ਰੱਦ ਕਰਨੇ ਪਏ ਹਨ|
ਅਜਿਹੇ ਅਜੀਬ ਹਾਲਾਤ ਵਿੱਚ ਕੁੱਝ ਵਿਭਾਗਾਂ ਵਿੱਚ ਕੰਮ ਦੀ ਘਾਟ ਕਾਰਨ ਸਿਟੀ ਨੂੰ ਅੰਦਾਜ਼ਨ 1100 ਕਰਮਚਾਰੀਆਂ ਦੀ ਆਰਜ਼ੀ ਛਾਂਗੀ ਕਰਨ ਦਾ ਔਖਾ ਫੈਸਲਾ ਲੈਣਾ ਪੈ ਰਿਹਾ ਹੈ| 2019 ਵਿੱਚ ਸਿਟੀ ਆਫ ਵਾਅਨ ਕੋਲ 1768 ਫੁੱਲ ਟਾਈਮ ਇੰਪਲੌਈਜ਼ ਸਨ| ਅਜੇ ਇਹ ਸਪਸ਼ਟ ਨਹੀਂ ਹੋ ਸਕਿਆ ਹੈ ਕਿ ਪਾਰਟ ਟਾਈਮ ਵਰਕਰਜ਼ ਵਿੱਚੋਂ ਕਿੰਨਿਆਂ ਨੂੰ ਕੱਢਿਆ ਜਾ ਰਿਹਾ ਹੈ ਪਰ ਇਹ ਕਦਮ ਸਿਟੀ ਦੀ ਵਰਕਫੋਰਸ ਨੂੰ ਵੱਡੀ ਪੱਧਰ ਉੱਤੇ ਪ੍ਰਭਾਵਿਤ ਕਰੇਗਾ|
ਸਿਟੀ ਵੱਲੋਂ ਇਹ ਖੁਲਾਸਾ ਵੀ ਨਹੀਂ ਕੀਤਾ ਗਿਆ ਹੈ ਕਿ ਇਹ ਛਾਂਗੀਆਂ ਕਿਹੜੇ ਡਿਪਾਰਟਮੈਂਟਸ ਵਿੱਚੋਂ ਹੋਣਗੀਆਂ ਤੇ ਇਹ ਕਿੰਨਾ ਚਿਰ ਰਹਿਣਗੀਆਂ|