ਹਵਾਈ ਸਫਰ ਕਰਨ ਵਾਲਿਆਂ ਨੂੰ ਮਾਸਕ ਨਾ ਪਾਉਣ
ਲਈ ਦੇਣਾ ਹੋਵੇਗਾ ਮੈਡੀਕਲ ਸਬੂਤ
ਓਟਵਾ, 11 ਅਗਸਤ (ਪੋਸਟ ਬਿਊਰੋ) : ਜਹਾਜ਼ ਵਿੱਚ ਬਿਨਾਂ ਮਾਸਕ ਦੇ ਚੜ੍ਹਨ ਵਾਲੇ ਕੈਨੇਡੀਅਨਾਂ ਨੂੰ ਹੁਣ ਇਸ ਗੱਲ ਦਾ ਮੈਡੀਕਲ ਸਬੂਤ ਦੇਣਾ ਹੋਵੇਗਾ ਕਿ ਉਹ ਮਾਸਕ ਕਿਉਂ ਨਹੀਂ ਪਾ ਸਕਦੇ| ਫੈਡਰਲ ਸਰਕਾਰ ਵੱਲੋਂ ਟਰੈਵਲ ਸਬੰਧੀ ਸੋਧੇ ਗਏ ਨਿਯਮਾਂ ਦਾ ਇਹ ਨਿਯਮ ਵੀ ਹਿੱਸਾ ਹੈ|
ਜ਼ਿਕਰਯੋਗ ਹੈ ਕਿ 20 ਅਪਰੈਲ ਤੋਂ ਹੀ ਨੌਨ ਮੈਡੀਕਲ ਮਾਸਕਸ ਜਹਾਜ਼ਾਂ ਵਿੱਚ ਲਾਜ਼ਮੀ ਹੋਏ ਪਏ ਹਨ| ਪਰ ਪਿਛਲੇ ਹਫਤੇ ਤੱਕ ਯਾਤਰੀ ਇਹ ਆਖ ਕੇ ਮਾਸਕ ਪਾਉਣ ਤੋਂ ਬਚ ਜਾਂਦੇ ਸਨ ਕਿ ਉਨ੍ਹਾਂ ਨੂੰ ਕੋਵਿਡ-19 ਨਹੀਂ ਪਰ ਉਨ੍ਹਾਂ ਨੂੰ ਸਾਹ ਲੈਣ ਵਿੱਚ ਦਿੱਕਤ ਹੈ| ਪਰ ਹੁਣ ਇਹ ਬਹਾਨਾ ਹੋਰ ਨਹੀਂ ਚੱਲਣ ਵਾਲਾ| ਟਰਾਂਸਪੋਰਟ ਕੈਨੇਡਾ ਦੇ ਅਪਡੇਟ ਕੀਤੇ ਗਏ ਨਵੇਂ ਆਰਡਰ ਤਹਿਤ ਹੁਣ ਜਹਾਜ਼ ਵਿੱਚ ਸਫਰ ਕਰਨ ਵਾਲੇ ਵਿਅਕਤੀ ਵੱਲੋਂ ਜੇ ਮਾਸਕ ਨਹੀਂ ਪਾਇਆ ਜਾਂਦਾ ਤਾਂ ਉਸ ਪਿੱਛੇ ਲੁਕੇ ਮੈਡੀਕਲ ਕਾਰਨ ਵਾਸਤੇ ਉਸ ਨੂੰ ਮੈਡੀਕਲ ਸਰਟੀਫਿਕੇਟ ਦੇਣਾ ਹੋਵੇਗਾ|
ਨਿੱਕੇ ਬੱਚਿਆਂ ਤੇ ਬਿਨਾਂ ਕਿਸੇ ਦੀ ਮਦਦ ਦੇ ਆਪਣਾ ਫੇਸ ਮਾਸਕ ਹਟਾ ਪਾਉਣ ਤੋਂ ਅਸਮਰੱਥ ਲੋਕਾਂ ਲਈ ਇਸ ਨਿਯਮ ਵਿੱਚ ਛੋਟ ਹੋਵੇਗੀ| ਇਹ ਮਾਸਕ ਸਕਿਊਰਿਟੀ ਜਾਂਚ ਸਮੇਂ, ਏਅਰਪੋਰਟ ਤੋਂ ਲੰਘਦੇ ਸਮੇਂ ਤੇ ਜਹਾਜ਼ ਵਿੱਚ ਸਵਾਰ ਹੋਣ ਸਮੇਂ ਪਾ ਕੇ ਰੱਖਣਾ ਹੋਵੇਗਾ|