ਚੰਡੀਗੜ੍ਹ, 11 ਅਗਸਤ (ਪੋਸਟ ਬਿਊਰੋ)- ਸੰਸਾਰ ਪ੍ਰਸਿੱਧ ਬਾਸਮਤੀ ਵਾਲਾ ਜੀ ਆਈ ਟੈਗ ਪ੍ਰਾਪਤ ਕਰਨ ਲਈ ਪੰਜਾਬ ਤੇ ਹਰਿਆਣਾ ਵੱਲੋਂ ਪਹਿਲਾਂ ਵੀ ਕੌਮਾਂਤਰੀ ਪੱਧਰ 'ਤੇ ਯਤਨ ਹੋਏ ਹਨ, ਪਰ ਭਾਰਤ ਸਰਕਾਰ ਸਮੇਂ-ਸਮੇਂ ਬਾਕੀ ਦੇਸ਼ਾਂ 'ਚ ਆਪਣੀ ਬਾਸਮਤੀ ਨੂੰ ਜੀ ਆਈ ਟੈਗ ਦਿਵਾਉਣ ਲਈ ਕੀਤੇ ਕੇਸ ਜਿੱਤਦੀ ਰਹੀ ਹੈ।
ਇਸ ਵਾਰੀ ਮੱਧ ਪ੍ਰਦੇਸ਼ ਵੱਲੋਂ ਆਪਣੀ ਬਾਸਮਤੀ ਨੂੰ ਜੀ ਆਈ ਟੈਗ ਦਿਵਾਉਣ ਲਈ ਕੇਂਦਰ ਸਰਕਾਰ ਨੂੰ ਚਿੱਠੀ ਲਿਖਣ ਦਾ ਪੰਜਾਬ ਨੇ ਜੰਮ ਕੇ ਵਿਰੋਧ ਕੀਤਾ ਹੈ ਕਿਉਂਕਿ ਇਸ ਨਾਲ ਪੰਜਾਬ, ਹਰਿਆਣਾ ਅਤੇ ਬਾਸਮਤੀ ਦੀ ਬਿਜਾਈ ਕਰਨ ਵਾਲੇ 15 ਲੱਖ ਦੇ ਕਰੀਬ ਕਿਸਾਨਾਂ ਦੇ ਹਿੱਤ ਪ੍ਰਭਾਵਿਤ ਹੋਣ ਦਾ ਖ਼ਦਸ਼ਾ ਹੈ। ਬਾਸਮਤੀ 1121 ਸਮੇਤ ਹੋਰ ਵਧੀਆ ਕਿਸਮ ਦੀ ਬਾਸਮਤੀ, ਜਿਹੜੀ ਹਿਮਾਲੀਆ ਪਹਾੜਾਂ ਦੇ ਹੇਠਾਂ ਚੰਗੀ ਕਿਸਮ ਦੀ ਮੰਨੀ ਜਾਂਦੀ ਹੈ, ਜੀ ਆਈ ਟੈਗ ਵਾਲੀ ਹੈ। ਦੇਹਰਾਦੂਨ, ਅੰਮ੍ਰਿਤਸਰ, ਕਾਦੀਆਂ, ਤਰਾਵੜੀ ਅਤੇ ਹੋਰ ਖ਼ਾਸ ਇਲਾਕਿਆਂ ਦੀ ਬਾਸਮਤੀ ਸੰਸਾਰ 'ਚ ਪ੍ਰਸਿੱਧ ਹੈ। ਪੰਜਾਬ, ਹਰਿਆਣਾ ਸਮੇਤ ਕਰੀਬ ਸੱਤ ਰਾਜਾਂ ਦੇ ਵਿਸ਼ੇਸ਼ ਇਲਾਕਿਆਂ 'ਚ ਖ਼ਾਸ ਬਾਸਮਤੀ ਬੀਜੀ ਜਾਂਦੀ ਹੈ, ਜਿਸ ਦਾ ਜੀ ਆਈ ਟੈਗ ਹੈ ਅਤੇ ਹੋਰ ਖੇਤਰਾਂ 'ਚ ਇਸ ਬਾਸਮਤੀ ਦੀ ਬਿਜਾਈ ਜੀ ਆਈ ਜੀ ਆਈ ਟੈਗ ਕਰਕੇ ਨਹੀਂ ਵੇਚੀ ਜਾ ਸਕਦੀ।
ਆਲ ਇੰਡੀਆ ਰਾਈਸ ਐਕਸਪੋਰਟਰ ਐਸੋਸੀਏਸ਼ਨ ਦੇ ਸਾਬਕਾ ਪ੍ਰਧਾਨ ਵਿਜੇ ਸੇਤੀਆ ਦੇ ਕਹਿਣ ਮੁਤਾਬਕ ਪਾਕਿਸਤਾਨ ਇਨ੍ਹਾਂ ਇਲਾਕਿਆਂ ਦੀ ਬਾਸਮਤੀ ਦੇ ਬੀਜ ਚੋਰੀ ਕਰਕੇ ਲੈ ਗਿਆ ਸੀ। ਮੱਧ ਪ੍ਰਦੇਸ਼ ਵਿੱਚ ਕੁਝ ਥਾਂਈਂ ਪੂਸਾ ਅਤੇ 1121 ਦੀ ਬਿਜਾਈ ਕੀਤੀ ਜਾਂਦੀ ਹੈ ਤੇ ਇਹ ਬਾਸਮਤੀ ਪੰਜਾਬ ਤੇ ਹਰਿਆਣਾ ਤੋਂ ਸੱਤ ਤੋਂ ਅੱਠ ਰੁਪਏ ਪ੍ਰਤੀ ਕਿੱਲੇ ਸਸਤੀ ਦੱਸੀ ਜਾਂਦੀ ਹੈ, ਪਰ ਇਹ ਪੰਜਾਬ ਤੇ ਹਰਿਆਣਾ ਦੇ ਮੁਕਾਬਲੇ ਨਹੀਂ ਖੜੋਂਦੀ। ਉਤਰ ਪ੍ਰਦੇਸ਼ ਦੇ ਪੱਛਮੀ ਇਲਾਕੇ ਵਿੱਚ ਜੀ ਆਈ ਟੈਗ ਵਾਲੀ ਬਾਸਮਤੀ ਬੀਜੀ ਜਾਂਦੀ ਹੈ। ਇਨ੍ਹਾਂ ਖੇਤਰਾਂ 'ਚ ਸੰਸਾਰ ਪ੍ਰਸਿੱਧ ਬਾਸਮਤੀ ਹੋਣ ਕਰਕੇ 500 ਐਕਸਪੋਰਟਰਾਂ ਤੋਂ ਇਲਾਵਾ 10 ਲੱਖ ਕਿਸਾਨ ਬਾਸਮਤੀ ਦੀ ਬਿਜਾਈ ਨਾਲ ਜੁੜੇ ਹੋਏ ਹਨ, ਪਰ ਆਪਣੀ ਸੀਮਤ ਮਾਤਰਾ 'ਚ ਬਾਸਮਤੀ ਦੀ ਖੇਤੀ ਕਰਨ ਵਾਲਾ ਮੱਧ ਪ੍ਰਦੇਸ਼ ਉਸ ਨੂੰ ਜੀ ਆਈ ਟੈਗ ਦਿਵਾ ਸਕਦਾ ਹੈ। ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਮੱਧ ਪ੍ਰਦੇਸ਼ ਵੱਲੋਂ ਬਾਸਮਤੀ ਦਾ ਜੀ ਆਈ ਟੈਗ ਲੈਣ ਦੇ ਯਤਨ ਦਾ ਜੰਮ ਕੇ ਵਿਰੋਧ ਕੀਤਾ ਹੈ।