* ਬਚਿੱਤਰ ਨਾਟਕ ਵਿੱਚ ਵੀ ਇਹੋ ਲਿਖਿਆ ਪਿਐ
ਅੰਮ੍ਰਿਤਸਰ, 11 ਅਗਸਤ (ਪੋਸਟ ਬਿਊਰੋ)- ਕੀ ਸਿੱਖ ਗੁਰੂ ਸਾਹਿਬਾਨ ਸ੍ਰੀ ਰਾਮ ਚੰਦਰ ਦੇ ਪੁੱਤਰਾਂ ਲਵ ਤੇ ਕੁਸ਼ ਦੇ ਵੰਸ਼ ਵਿੱਚੋਂ ਹਨ? ਇਹ ਸਵਾਲ ਕੁਝ ਦਿਨਾਂ ਤੋਂ ਚਰਚਾ ਵਿੱਚ ਹੈ। ਸਿੱਖ ਇਤਿਹਾਸ ਦੇ ਮੂਲ ਸਰੋਤ ਕਹੇ ਜਾਂਦੇ ਦਸਮ ਗ੍ਰੰਥ ਦੇ ਬਚਿੱਤਰ ਨਾਟਕ ਵਿੱਚ ਵੀ ਦਰਜ ਹੈ ਕਿ ਗੁਰੂ ਨਾਨਕ ਜੀ ਕੁਸ਼ ਤੇ ਗੁਰੂ ਰਾਮਦਾਸ ਜੀ ਲਵ ਦੀ ਅੰਸ਼ ਵਿੱਚੋਂ ਸਨ।
ਇਹ ਦਾਅਵਾ ਕਿਸੇ ਹੋਰ ਸੰਸਥਾ ਨਹੀਂ ਕੀਤਾ, ਸਗੋਂ ਸਿੱਖ ਪਾਰਲੀਮੈਂਟ ਕਹੀ ਜਾਂਦੀ ਸੰਸਥਾ ਸ਼੍ਰੋਮਣੀ ਗੁਰਦੁਵਾਰਾ ਪ੍ਰਬੰਧਕ ਕਮੇਟੀ ਵੱਲੋਂ ਛਾਪੇ ਬਚਿੱਤਰ ਨਾਟਕ ਵਿੱਚ ਸਾਬਤ ਹੁੰਦੀ ਹੈ। ਗੋਬਿੰਦ ਗੀਤਾ ਤੇ ਗੋਬਿੰਦ ਰਮਾਇਣ ਬਾਰੇ ਚੱਲ ਰਹੇ ਵਿਵਾਦ ਦੌਰਾਨ ਇੱਕ ਨਵਾਂ ਪੱਖ ਉਭਰ ਕੇ ਸਾਹਮਣੇ ਆਇਆ ਹੈ। ਸ਼੍ਰੋਮਣੀ ਕਮੇਟੀ ਪਿਛਲੇ ਲੰਮੇ ਸਮੇਂ ਤੋਂ ਇੱਕ ਕਿਤਾਬ ਬਚਿੱਤਰ ਨਾਟਕ ਦੇ ਨਾਮ ਹੇਠ ਪ੍ਰਕਾਸ਼ਤ ਕਰ ਕੇ ਸੰਗਤਾਂ ਨੂੰ ਦੇ ਰਹੀ ਹੈ। ਬਚਿੱਤਰ ਨਾਟਕ ਬਾਰੇ ਕਿਹਾ ਜਾਂਦਾ ਹੈ ਕਿ ਇਹ ਗੁਰੂ ਗੋਬਿੰਦ ਸਿੰਘ ਜੀ ਦੀ ਰਚਨਾ ਹੈ ਤੇ ਉਨ੍ਹਾਂ ਇਸ ਨਾਮ ਹੇਠ ਆਪਣੀ ਸਵੈ ਜੀਵਨੀ ਲਿਖੀ ਹੈ। ਇਸ ਵਿੱਚ ਲਿਖਾਰੀ ਨੇ ਗੁਰੂ ਸਾਹਿਬ ਦੇ ਨਾਮ ਹੇਠ ਗੁਰੂ ਸਾਹਿਬਾਨ ਨੂੰ ਰਾਮ ਅੰਸ਼ ਦੱਸਣ ਵਿੱਚ ਕਸਰ ਨਹੀਂ ਛੱਡੀ ਤੇ ਇਸ ਕਥਾ ਮੁਤਾਬਕ ਰਾਮ ਜੀ ਦੇ ਪੁੱਤਰ ਲਵ ਤੇ ਕੁਸ਼ ਤੋਂ ਸ਼ੁਰੂ ਹੋ ਕੇ ਦੋ ਅੰਸ਼ਾਂ ਬੇਦੀ ਤੇ ਸੋਢੀ ਅੰਸ਼ ਕਹਾਉਂਦੀਆਂ ਹਨ। ਬੇਦੀ ਅੰਸ਼ ਤੋਂ ਗੁਰੂ ਨਾਨਕ ਸਾਹਿਬ ਜੀ ਦਾ ਜਨਮ ਹੋਇਆ। ਬਚਿੱਤਰ ਨਾਟਕ ਵਿੱਚ ਪੂਰੇ ਵਿਸਥਾਰ ਨਾਲ ਬੇਦੀ ਤੇ ਸੋਢੀ ਵਰੇਡਿਆਂ ਦਾ ਵੇਰਵਾ ਦਰਜ ਹੈ। ਇਸ ਨੂੰ ਪੜ੍ਹਨ ਤੋਂ ਬਾਅਦ ਜੇ ਇਹ ਕਿਹਾ ਜਾਵੇ ਕਿ ਗਿਆਨੀ ਇਕਬਾਲ ਸਿੰਘ ਝੂਠ ਬੋਲਦਾ ਹੈ ਤਾਂ ਗ਼ਲਤ ਹੈ। ਸਾਲ 1999 ਵਿੱਚ ਜਦ ਅਕਾਲੀ ਦਲ 'ਤੇ ਸੰਕਟ ਦੇ ਬੱਦਲ ਸਨ, ਉਸ ਵੇਲੇ ਅਕਾਲੀ ਦਲ ਦੇ ਸੰਕਟ ਮੋਚਨ ਬਣ ਕੇ ਸਾਹਮਣੇ ਆਏ ਗਿਆਨੀ ਪੂਰਨ ਸਿੰਘ ਵੀ ਧੜੱਲੇ ਨਾਲ ਦਾਅਵਾ ਕਰਦੇ ਸਨ ਕਿ ਸਿੱਖ ਲਵ ਕੁਸ਼ ਦੀ ਸੰਤਾਨ ਹਨ। ਉਨ੍ਹਾਂ ਦੇ ਬਿਆਨ ਦਾ ਕਿਸੇ ਨੇ ਖੰਡਨ ਕਰਨ ਦੀ ਜੁਅਰੱਤ ਨਹੀਂ ਕੀਤੀ। ਡੇਰਿਆਂ ਵਿੱਚ ਵੀ ਇਹੋ ਪੜ੍ਹਾਇਆ ਜਾਂਦਾ ਹੈ।