ਨਵੀਂ ਦਿੱਲੀ, 11 ਅਗਸਤ (ਪੋਸਟ ਬਿਊਰੋ)- ਫੇਸਬੁੱਕ ਦੀ ਮਾਲਕੀ ਵਾਲਾ ਵਟਸਐਪ ਇੱਕ ਅਜਿਹੇ ਨਵੇਂ ਫੀਚਰ 'ਤੇ ਕੰਮ ਕਰ ਰਿਹਾ ਹੈ, ਜਿਸ ਨਾਲ ਯੂਜ਼ਰ ਛੇਤੀ ਹੀ ਇੱਕੋ ਨੰਬਰ ਨਾਲ ਚਾਰ ਮੋਬਾਈਲ ਫੋਨ 'ਤੇ ਵਟਸਐਪ ਚਲਾ ਸਕਣਗੇ। ਇਹ ਪਲੇਟਫਾਰਮ ਜਿਸ ਨਵੇਂ ਫੀਚਰ 'ਤੇ ਕੰਮ ਕਰ ਰਿਹਾ ਹੈ, ਉਸ ਨਾਲ ਯੂਜ਼ਰਜ਼ ਆਪਣੀ ਚੈਟ ਹਿਸਟਰੀ ਨੂੰ ਘੱਟੋ ਘੱਟ ਚਾਰ ਡਿਵਾਈਸਾਂ 'ਤੇ ਸਿੰਕ ਕਰ ਸਕਣਗੇ।
ਇਸ ਵੇਲੇ ਵਟਸਐਪ ਇੱਕ ਨੰਬਰ ਤੋਂ ਸਿਰਫ ਇੱਕੋ ਡਿਵਾਈਸ 'ਤੇ ਕੰਮ ਕਰ ਸਕਦਾ ਹੈ। ਕਈ ਡਿਵਾਈਸਾਂ 'ਤੇ ਹਾਲੇ ਇਸ ਦੀ ਵਰਤੋਂ ਸੰਭਵ ਨਹੀਂ। ਯੂਜ਼ਰਜ਼ ਲੰਬੇ ਸਮੇਂ ਤੋਂ ਇਹ ਫੀਚਰ ਮੰਗ ਰਹੇ ਹਨ। ਵਾਬੇਟਾਇੰਫੋ ਵੈੱਬਸਾਈਟ ਦੇ ਅਨੁਸਾਰ ਇਹ ਮੈਸੇਜਿੰਗ ਐਪ ਇੱਕ ਿਅਕਾਊਂਟ ਨੂੰ ਕਈ ਡਿਵਾਈਸਾਂ 'ਤੇ ਚਲਾਏ ਜਾਣ ਦੀ ਸੰਭਾਵਨਾ 'ਤੇ ਕੰਮ ਕਰ ਰਿਹਾ ਹੈ। ਇੱਕ ਸਮੇਂ 'ਚ ਇਕੱਠਿਆਂ ਚਾਰ ਡਿਵਾਈਸਾਂ 'ਤੇ ਇੱਕੋ ਅਕਾਊਂਟ ਨੂੰ ਚਲਾਏ ਜਾਣ ਨੂੰ ਲੈ ਕੇ ਪ੍ਰੀਖਣ ਕੀਤਾ ਜਾ ਰਿਹਾ ਹੈ। ਇਹ ਪਲੇਟਫਾਰਮ ਐਂਡਰਾਇਡ ਨਾਲ ਆਈ ਓ ਐੱਸ ਲਈ ਇੱਕ ਇੰਟਰਫੇਸ ਬਣਾਉਣ 'ਤੇ ਕੰਮ ਕਰ ਰਿਹਾ ਹੈ।
ਰਿਪੋਰਟ ਮੁਤਾਬਕ ਜਦੋਂ ਯੂਜ਼ਰ ਕਿਸੇ ਦੂਜੇ ਮੋਬਾਈਲ ਫੋਨ 'ਤੇ ਵਟਸਐਪ ਦੀ ਵਰਤੋਂ ਕਰਨਾ ਚਾਹੁੰਦਾ ਹੈ ਤਾਂ ਇਸ ਲਈ ਚੈਟ ਹਿਸਟਰੀ ਨੂੰ ਕਾਪੀ ਕਰਨ ਦੀ ਲੋੜ ਪੈਂਦੀ ਹੈ। ਇਸ ਸਥਿਤੀ 'ਚ ਹਮੇਸ਼ਾ ਵਾਈ-ਫਾਈ ਕੁਨੈਕਸ਼ਨ ਦੀ ਜ਼ਰੂਰਤ ਪੈਂਦੀ ਹੈ, ਕਿਉਂਕਿ ਇਸ ਕੰਮ 'ਚ ਜ਼ਿਆਦਾ ਡਾਟਾ ਖਰਚ ਹੋਣ ਦੀ ਸੰਭਾਵਨਾ ਰਹਿੰਦੀ ਹੈ।