ਨਵੀਂ ਦਿੱਲੀ, 11 ਅਗਸਤ (ਪੋਸਟ ਬਿਊਰੋ)- ਭਾਰਤ ਨੂੰ ਚੀਨ ਦੇ ਖ਼ਿਲਾਫ਼ ਇੱਕ ਪਿੱਛੋਂ ਦੂਸਰਾ ਸਖ਼ਤ ਕਦਮ ਚੁੱਕਦੇ ਦੇਖ ਚੀਨ ਘਬਰਾ ਗਿਆ ਜਾਪਦਾ ਹੈ। ਇਹ ਘਬਰਾਹਟ ਚੀਨ ਦੇ ਸਰਕਾਰੀ ਮੀਡੀਆ ਗਲੋਬਲ ਟਾਈਮਸ 'ਚ ਦੇਖੀ ਜਾ ਸਕਦੀ ਹੈ। ਗਲੋਬਲ ਟਾਈਮਸ ਨੇ ਦਾਅਵਾ ਕੀਤਾ ਹੈ ਕਿ ਚੀਨ ਦੇ ਸਾਮਾਨ ਦਾ ਬਾਈਕਾਟ ਕਰਨ ਦੀਆਂ ਕੋਸ਼ਿਸ਼ਾਂ ਅਤੇ ਗੱਲਾਂ ਦੇ ਬਾਵਜੂਦ ਭਾਰਤ ਨੇ ਚੀਨ ਤੋਂ ਇੰਪੋਰਟ ਹੋਰ ਵਧਾ ਦਿੱਤੀ ਹੈ, ਯਾਨੀ ਕੋਰੋਨਾ ਕਾਲ 'ਚ ਵੀ ਇੰਪੋਰਟ ਡਿੱਗਣ ਦੀ ਥਾਂ ਉਲਟਾ ਉਸ 'ਚ ਵਾਧਾ ਹੋਇਆ ਹੈ। ਗਲੋਬਲ ਟਾਈਮਸ ਨੇ ਅਸਲ ਵਿੱਚ ਅੰਕੜਿਆਂ ਨਾਲ ਖੇਡਿਆ ਹੈ।
ਚੀਨ ਦਾ ਕਸਟਮ ਡਾਟਾ ਦਿਖਾਉਂਦਾ ਹੈ ਕਿ ਭਾਰਤ ਦੀ ਚੀਨ ਤੋਂ ਇੰਪੋਰਟ ਜੁਲਾਈ ਵਿੱਚ 5.6 ਅਰਬ ਡਾਲਰ ਹੋ ਗਈ ਹੈ ਜੋ ਜੂਨ 'ਚ 4.78 ਅਰਬ ਡਾਲਰ ਸੀ। ਇਸ ਤੋਂ ਪਹਿਲਾਂ ਮਈ 'ਚ ਇਹ ਅੰਕੜਾ 3.25 ਅਰਬ ਡਾਲਰ ਸੀ ਜਦੋਂ ਕਿ ਅਪ੍ਰੈਲ 'ਚ ਇਹ 3.22 ਅਰਬ ਡਾਲਰ ਸੀ। ਚੀਨ ਦਾ ਇਹ ਅੰਕੜਾ ਭਾਰਤ ਦੇ ਇੰਪੋਰਟ ਦੇ ਅੰਕੜੇ ਨਾਲ ਮੇਲ ਨਹੀਂ ਖਾ ਰਿਹਾ। ਭਾਰਤ ਦੀ ਕਾਮਰਸ ਮਿਨਿਸਟਰੀ ਨੇ ਹਾਲੇ ਜੁਲਾਈ ਦਾ ਡਾਟਾ ਨਹੀਂ ਦਿੱਤਾ ਹੈ ਪਰ ਅਪ੍ਰੈਲ 'ਚ ਇਹ 3.03 ਅਰਬ ਡਾਲਰ, ਮਈ 'ਚ 4.66 ਅਰਬ ਡਾਲਰ ਅਤੇ ਜੂਨ 'ਚ 3.32 ਡਾਲਰ ਸੀ।