ਹਾਂਗਕਾਂਗ, 11 ਅਗਸਤ (ਪੋਸਟ ਬਿਊਰੋ)- ਹਾਂਗਕਾਂਗ ਸਰਕਾਰ ਨੇ 30 ਜੂਨ ਤੋਂ ਲਾਗੂ ਕੌਮੀ ਸੁਰੱਖਿਆ ਕਾਨੂੰਨ ਦੀ ਵੱਡੀ ਕਾਰਵਾਈ ਕਰਦਿਆਂ ਹਾਂਗਕਾਂਗ ਦੇ ਚੋਟੀ ਦੇ ਮੀਡੀਆ ਗਰੁੱਪ ‘ਨੈਕਸ ਮੀਡੀਆ' ਅਤੇ ‘ਐਪਲ ਡੇਲੀ' ਅਖ਼ਬਾਰ ਦੇ ਮਾਲਕ ਜਿੰਮੀ ਲਾਇ ਅਤੇ ਉਸ ਦੇ ਦੋ ਪੁੱਤਰਾਂ ਨੂੰ ਨੌਂ ਸਹਿਯੋਗੀਆਂ ਸਣੇ ਵਿਦੇਸ਼ੀ ਤਾਕਤਾਂ ਨਾਲ ਮਿਲੀਭੁਗਤ ਅਤੇ ਦੇਸ਼ ਵਿਰੋਧੀ ਹੋਰ ਕਾਰਵਾਈਆਂ ਦੇ ਸ਼ੱਕ ਹੇਠ ਗ਼੍ਰਿਫ਼ਤਾਰ ਕੀਤਾ ਗਿਆ ਹੈ। ਉਨ੍ਹਾਂ ਉਨ੍ਹਾਂ ਦੇ ਹੋ-ਮਨ-ਤਿਨ ਨਿਵਾਸ ਤੋਂ ਗ਼੍ਰਿਫ਼ਤਾਰ ਕਰਨ ਦੇ ਬਾਅਦ ਪੁਲਸ ਦੇ 200 ਦੇ ਕਰੀਬ ਅਧਿਕਾਰੀਆਂ ਵੱਲੋਂ ਐਪਲ ਡੇਲੀ ਦੀ ਚੂੰ-ਕਵਾਨ-ਓ ਦੀ ਇਮਾਰਤ 'ਤੇ ਛਾਪੇਮਾਰੀ ਕਰਕੇ 25 ਡੱਬਿਆਂ ਦੇ ਕਰੀਬ ਸਮੱਗਰੀ ਤਫ਼ਤੀਸ਼ ਲਈ ਚੁੱਕ ਲਈ ਹੈ।
ਇਸ ਸੰਬੰਧ ਵਿੱਚ ਹਾਂਗਕਾਂਗ ਦੇ ਆਖ਼ਰੀ ਗਵਰਨਰ ਕ੍ਰਿਸ ਪੈਟਨ, ਤਾਇਤਾਨ ਦੇ ਸੀਨੀਅਰ ਅਧਿਕਾਰੀਆਂ ਅਤੇ ਹਾਂਗਕਾਂਗ ਦੀਆਂ ਕੁਝ ਸੰਸਥਾਵਾਂ ਨੇ ਹਾਂਗਕਾਂਗ ਸਰਕਾਰ ਦੇ ਇਸ ਕਦਮ ਦੀ ਨਿੰਦਾ ਕਰਦਿਆਂ ਇਸ ਨੂੰ ਪ੍ਰੈਸ ਦੀ ਆਜ਼ਾਦੀ 'ਤੇ ਭਿਆਨਕ ਹਮਲਾ ਦੱਸਿਆ ਹੈ। ਐਪਲ ਡੇਲੀ ਅਖ਼ਬਾਰ ਦੇ ਮੁੱਖ ਸੰਪਾਦਕ ਰਿਆਨ ਲਾਅ ਨੇ ਕਿਹਾ ਕਿ ਅਖ਼ਬਾਰ ਦਾ ਸਟਾਫ ਸ਼ਾਮ ਨੂੰ ਛਾਪੇ ਤੋਂ ਬਾਅਦ ਆਮ ਵਾਂਗ ਕੰਮ 'ਤੇ ਪਰਤ ਆਇਆ ਹੈ। ਐਪਲ ਡੇਲੀ ਅਖ਼ਬਾਰ ਰੋਜ਼ ਵਾਂਗ ਛਪਦੀ ਰਹੇਗੀ, ਭਾਵੇਂ ਉਸ ਦੇ ਪਲੇਨ ਪੇਪਰ ਛਾਪਣੇ ਪੈਣ। ਦੇਰ ਰਾਤ ਤੱਕ ਲੋਕਤੰਤਰ ਪੱਖੀ ਕਾਰਕੁੰਨ ਐਗਨਸ ਚੋਅ ਨੂੰ ਰਾਸ਼ਟਰੀ ਸੁਰੱਖਿਆ ਕਾਨੂੰਨ ਤਹਿਤ ਗ਼੍ਰਿਫ਼ਤਾਰ ਕੀਤੇ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ।