ਲੁਧਿਆਣਾ, 10 ਅਗਸਤ (ਪੋਸਟ ਬਿਊਰੋ)- ਲੁਧਿਆਣਾ ਪੁਲਸ ਨੇ ਤਿੰਨ ਉਨ੍ਹਾਂ ਔਰਤਾਂ ਨੂੰ ਗ੍ਰਿਫਤਾਰ ਕੀਤਾ ਹੈ ਜਿਨ੍ਹਾਂ ਦੀ ਹਾਰਡੀਜ਼ ਵਰਲਡ ਤੋਂ ਜਲੰਧਰ ਬਾਈਪਾਸ ਤੱਕ ਦਹਿਸ਼ਤ ਬਣੀ ਹੋਈ ਸੀ। ਇਹ ਔਰਤਾਂ ਰਾਤ ਵੇਲੇ ਸੜਕ 'ਤੇ ਰਹਿੰਦੀਆਂ ਅਤੇ ਰਾਹਗੀਰਾਂ ਨੂੰ ਆਪਣਾ ਜਿਸਮ ਵਿਖਾ ਕੇ ਹਨੇਰੇ ਵਿੱਚ ਲਿਜਾਂਦੀਆਂ। ਫਿਰ ਉਨ੍ਹਾਂ ਨੂੰ ਬਦਨਾਮ ਕਰ ਦੇਣ ਦਾ ਡਰ ਵਿਖਾ ਕੇ ਨਕਦੀ ਅਤੇ ਹੋਰ ਕੀਮਤੀ ਸਾਮਾਨ ਲੁੱਟ ਲੈਂਦੀਆਂ ਸਨ।
ਥਾਣਾ ਸਲੇਮਟਾਬਰੀ ਦੀ ਪੁਲਸ ਨੇ ਸ਼ਿਮਲਾਪੁਰੀ ਈਸ਼ਰ ਨਗਰ ਦੀ ਅਮਨਦੀਪ ਕੌਰ, ਜੱਸੀਆਂ ਰੋਡ ਦੀ ਵਸਨੀਕ ਪ੍ਰੀਆ ਅਤੇ ਸਲੇਮ ਟਾਬਰੀ ਅਮਨ ਨਗਰ ਦੀ ਵਾਸੀ ਪਰਮਜੀਤ ਕੌਰ ਨੂੰ ਗ੍ਰਿਫਤਾਰ ਕੀਤਾ ਹੈ। ਜਾਂਚ ਅਫਸਰ ਸੁਰਿੰਦਰ ਸਿੰਘ ਨੇ ਦੱਸਿਆ ਕਿ ਇਹ ਤਿੰਨੇ ਔਰਤਾਂ ਰਾਤ ਵੇਲੇ ਹਾਰਡੀਜ਼ ਵਰਲਡ ਤੋਂ ਜਲੰਧਰ ਬਾਈਪਾਸ ਦਾ ਚੱਕਰ ਲਾਉਂਦੀਆਂ ਸਨ ਅਤੇ ਰਾਹਗੀਰਾਂ ਨੂੰ ਆਪਣੇ ਜਿਸਮ ਵਿਖਾ ਕੇ ਹਨੇਰੇ ਵਿੱਚ ਲਿਜਾਂਦੀਆਂ ਤੇ ਬਦਨਾਮ ਕਰਨ ਦੇਣ ਦਾ ਡਰ ਦਿਖਾ ਕੇ ਉਨ੍ਹਾਂ ਕੋਲੋਂ ਮੋਬਾਈਲ ਨਕਦੀ ਅਤੇ ਹੋਰ ਕੀਮਤੀ ਸਾਮਾਨ ਲੁੱਟ ਲੈਂਦੀਆਂ ਸਨ। ਪੁਲਸ ਨੂੰ ਜਾਣਕਾਰੀ ਮਿਲੀ ਸੀ ਕਿ ਇਹ ਔਰਤਾਂ ਹਾਰਡੀਜ਼ ਵਰਲਡ ਤੋਂ ਜਲੰਧਰ ਬਾਈਪਾਸ ਵੱਲ ਨੂੰ ਆ ਰਹੀਆਂ ਹਨ, ਜਿੱਥੋਂ ਉਨ੍ਹਾਂ ਨੂੰ ਪੁਲਸ ਨੇ ਗ੍ਰਿਫਤਾਰ ਕੀਤਾ ਤਾਂ ਤਲਾਸ਼ੀ ਦੌਰਾਨ ਔਰਤਾਂ ਦੇ ਕਬਜ਼ੇ 'ਚੋਂ ਛੇ ਮੋਬਾਈਲ ਅਤੇ ਕੁਝ ਨਕਦੀ ਬਰਾਮਦ ਹੋਈ ਹੈ।